2022 جىلى قاراشادا مەملەكەت باسشىسىنىڭ فرانتسياعا رەسمي ساپارى اياسىندا «قازاقستان تەمىر جولى» ۇك» اق مەن «Alstom Transport SA» اق اراسىندا بىرقاتار كەلىسىمگە قول قويىلعان بولاتىن. كەلىسىم بويىنشا, «Alstom» كومپانياسى 2023-2029 جىلدار ارالىعىندا قازاقستاندىق زاۋىتتا ەلەكتروۆوز شىعارادى جانە «قازاقستان تەمىر جولى» ۇك» اق ءۇشىن 245 ەلەكتروۆوز جەتكىزىپ بەرەدى.
ءتورت قالادا اشىلعالى وتىرعان وندىرىستىك جوبالاردى جۇزەگە اسىرۋعا «Alstom» 50 ميلليون ەۋرو شاماسىندا ينۆەستيتسيا سالۋدى كوزدەپ وتىر. وسىناۋ يگى شارا ەلىمىزدەگى ەلەكتروۆوز تاپشىلىعى ماسەلەسىن شەشەدى جانە قازاقستان جۇك جونەلتۋشىلەرىنە ساپالى قىزمەت كورسەتۋگە مۇمكىندىك اشادى.
سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ ايتۋىنشا, بىلتىر قازاقستان مەن ەۋروپالىق وداق ەلدەرى اراسىنداعى ءوزارا تاۋار اينالىمى 27,6 پايىزعا ءوسىپ, 40 ملرد اقش دوللارىنا جەتكەن.
«قازاقستان ەو جانە وعان مۇشە مەملەكەتتەرمەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويعان جانە ونى راتيفيكاتسيالاعان ايماقتاعى جالعىز ەل بولىپ قالا بەرەدى. بۇل رەتتە قازاقستان وتكەن جىلى سيرەك كەزدەسەتىن مەتالدار, «جاسىل» سۋتەگى, اككۋمۋلياتور, كولىك-لوگيستيكالىق الەۋەتتى دامىتۋ, سونداي-اق تاۋارلاردى جەتكىزۋ تىزبەگىن ءارتاراپتاندىرۋ سياقتى جاڭا سالالاردا ىنتىماقتاستىق ورناتتى», دەدى ءمينيستردىڭ ورىنباسارى.
