استانا اۋەجايىنىڭ اۋە قاۋىپسىزدىگى قىزمەتىنىڭ تەكسەرۋ بولىمشەسى باسشىسىنىڭ ورىنباسارى ابىلاي سارگوزوۆ نەلىكتەن اۋەجايداعى تەكسەرىس كەزىندە كەي جولاۋشىدان اياق كيىمىن شەشۋدى تالاپ ەتەتىنىن ءتۇسىندىردى. اۋەجاي وكىلىنىڭ ايتۋىنشا, بۇل – قاساقانا جاسالاتىن ءراسىم ەمەس, كەرىسىنشە جولاۋشىلاردىڭ قاۋىپسىزدىگى ءۇشىن قاراستىرىلعان شارا.
قازاقستان اۋە قاۋىپسىزدىگى قاعيدالارىنا سايكەس, رەيس جولاۋشىلارى جالپى سانىنىڭ كەمىندە 10 پايىزى مۇقيات تەكسەرىلۋى ءتيىس. بۇلاي ىرىكتەپ جانە كەزدەيسوق تەكسەرۋ راسىمدەرى ICAO حالىقارالىق قاۋىپسىزدىك ستاندارتتارىندا دا قاراستىرىلعان.
«الەمدەگى بارلىق اۋەجاي جولاۋشىلاردىڭ 10 پايىزىن اۆتوماتتى جانە كەزدەيسوق تۇردە انىقتايتىن راندومايزەر فۋنكتسياسى بار دوعال مەتالل دەتەكتورلارىمەن جابدىقتالعان. ماسەلەن, استانا اۋەجايىندا راندومايزەرلەر 2015 جىلدان بەرى قولدانىلىپ كەلەدى. ەگەر تەكسەرۋ كەزىندە قۇرىلعى بەلگى بەرسە, جولاۋشى رەنتگەن-تەلەديدار قوندىرعىسى ارقىلى جەكە تەكسەرۋ ءۇشىن اياق كيىمىن شەشىپ (قۇرامىندا مەتالل زاتتار بولماسا دا), تەكسەرۋدەن ءوتۋى كەرەك. سونىمەن قاتار تەكسەرۋ قىزمەتكەرلەرى بۇل جولاۋشىنىڭ قول جۇگىن مۇقيات تەكسەرۋگە مىندەتتى», دەدى اۋە قاۋىپسىزدىگى قىزمەتىنىڭ تەكسەرۋ بولىمشەسى باسشىسىنىڭ ورىنباسارى ابىلاي سارگوزوۆ.
