«كوپ وقيتىن ادامداردا ويلاۋ قابىلەتى كۇشتى بولادى. كىتاپقۇمار جاندار ساراپتامالىق, ياعني اناليتيكالىق تۇرعىدا ويلاي الادى. سوندىقتان كىتاپ اتاۋلى ادامنىڭ ساناسىنداعى پىكىردى جۇيەلەپ جەتكىزۋگە كومەكتەسەدى. سونداي-اق وقۋعا ىنتىق جانداردىڭ سويلەۋ مانەرى جوعارى, ساۋاتتى ءارى ءتىلى باي بولىپ كەلەدى. بۇل رەتتە قوعامدا كىتاپ وقيتىندار سانى ارتىپ تۇرعاندا مەرزىمدى باسىلىمدار ەشقاشان ورنىن جوعالتپايدى. ەسەسىنە, مادەنيەت تە بيىككە ورلەيدى. ءسوز باردا, پىكىر الۋاندىعى جوعالماعان قوعام باردا ءباسپاسوز ەشقاشان ولمەيدى. اسىرەسە گازەت ءىسى حالىقپەن بىرگە ماڭگى جاساي بەرەدى. ستاتيستيكالىق دەرەكتەرگە زەر سالساق رەسپۋبليكا حالقىنىڭ بار-جوعى 23 پايىزدايى گازەت-جۋرنال وقيدى ەكەن. ال قالعان پايىزى – الەۋمەتتىك جەلى قولدانۋشىلاردىڭ ۇلەسىندە. ءتىپتى بۇگىندە 6 جاسار بالادان جاسى جەتپىستەن اسقان قاريالارعا دەيىن الەۋمەتتىك جەلىنىڭ تۇراقتى وقىرماندارىنا اينالىپ ۇلگەرگەن. دەيتۇرعانمەن, زامان تەحنولوگياسى گازەت-جۋرنالدارعا كەرى اسەرىن تيگىزبەيدى. تەك ءار نارسەنى ورنىمەن پايدالانساق, جەتكىلىكتى. كىتاپتى جازۋداعى ماقساتىم دا سول بۇگىنگى ۇرپاق ءداستۇرلى ءباسپاسوز بەن وزىق تەحنولوگيانى بىرگە ۇشتاستىرىپ وتىرسا ەكەن», دەدى تولەن تىلەۋباي.
ءوز كەزەگىندە جاڭا كىتاپ جايىندا ءوز ويىن ورتاعا سالعان «Astana aqshamy» گازەتىنىڭ باس رەداكتورى ەركىن قىدىر ءداستۇرلى باق-تىڭ تسيفرلاندىرۋ ۇدەرىسىنە ساي يكەمدەلۋى بۇگىنگى قوعامنىڭ وزەكتى ماسەلەسى ەكەنىنە توقتالدى. «سونىڭ ىشىندە اتالعان وقۋلىقتا تسيفرلىق تەحنولوگيا داۋىرلەپ تۇرعان زاماندا كونەدەن كەلە جاتقان مەرزىمدى باسىلىمدار باسەكەلەستىككە قالاي شىداماق, جۇرت جاپپاي الەۋمەتتىك جەلىگە كوشسە, باسپاسوزدە ۇلت مۇددەسىن كىم كوزدەيدى نەمەسە سايت پەن قاعاز نۇسقاسىنداعى گازەت-جۋرنال ءبىر-بىرىنە باسەكەلەس پە, الدە بىرلەسىپ دامي ما دەگەن ساۋالدارعا ادەمى جاۋاپتار بەرىلگەن», دەپ ويىن قورىتتى.
«تسيفرلىق جولايرىق: قازاقستان گازەتتەرىنىڭ بۇگىنى مەن ەرتەڭى» ەڭبەگىنەن بولەك اۆتور بۇعان دەيىن دە بىرنەشە كىتاپ جازىپ ۇلگەرگەن. 2006 جىلى ءجۋرناليستىڭ قالامىنان تۋعان «الاساپىران امەريكا» اتتى تۇڭعىش كىتابى جارىق كورسە, اراعا ون جىل سالىپ «تاۋەلسىزدىك – تۇمارىم» اتتى جاڭا ەڭبەگىن جاريالادى.
