قۇجاتتاردىڭ ىشىندە بىرەگەيى – اقمولا قالالىق دۋماسىنىڭ 1874 جىلعى 25 مامىرداعى جارلىعى. بۇل ماتەريالدا قالالىق كەڭەس مۇشەلەرى جۇمىس ىستەي باستاعانى كورسەتىلگەن. العاش دەپۋتاتتار ءتورت جىل مەرزىمگە سايلانعان. الايدا سايلاۋ كۆوتا بويىنشا جاسىرىن داۋىس بەرۋ ارقىلى ءوتىپتى. ونىڭ ۇستىنە قالالىق كەڭەس مۇشەلەرىنىڭ كوپشىلىگى ساۋداگەرلەر بولسا كەرەك. 1891-1916 جىلدارى ارالىعىندا ستەپان كۋبرين دەگەن ازامات اقمولا قالالىق دۋماسىنىڭ باسشىسى قىزمەتىن اتقارىپتى.
«جەرگىلىكتى وكىلدى ورگاننىڭ اۋىسۋ كەزەڭى قازان توڭكەرىسىمەن بايلانىستى. جاڭا كەڭەستىڭ قۇرىلۋىنا بايلانىستى قالالىق دۋما تاراتىلادى. 1920 جىلى 26 ماۋسىمدا جۇمىسشى, شارۋا جانە قىزىل اسكەر دەپۋتاتتارى كوميتەتىنىڭ I سەزىندە اقمولا قالالىق اتقارۋ كوميتەتى ءوز قىزمەتىن باستادى», دەيدى عىلىمي-زەرتتەۋ جانە اقپاراتتىق-ءتۇسىندىرۋ قىزمەتىنىڭ باسشىسى جانگەلدى بيمولدين.
1923 جىلدىڭ باسىندا اقمولا قالالىق كەڭەسى, ارتىنشا ونىڭ بولىمدەرى قۇرىلادى. وسىلايشا, ەلىمىز ەگەمەندىك العانعا دەيىن ەڭبەك ەتىپ, قالانىڭ دامۋىنا زور ۇلەس قوسقان.
1993 جىلى 9 جەلتوقساندا «قازاقستان رەسپۋبليكاسى حالىق دەپۋتاتتارى جەرگىلىكتى كەڭەستەرىنىڭ وكىلەتتىكتەرىن مەرزىمىنەن بۇرىن توقتاتۋ تۋرالى» زاڭ اياسىندا اقمولا قالالىق كەڭەسىن تاراتۋ تۋرالى شەشىم قابىلداندى. ءسويتىپ, 1994 جىلى 1 ساۋىردە اقمولا قالاسى ءماسليحاتىنىڭ اپپاراتى قايتا قۇرىلدى. ءماسليحات سەسسيالارىندا قالا ينفراقۇرىلىمىن دامىتۋدىڭ ەكونوميكالىق جانە الەۋمەتتىك باعدارلامالارى بەكىتىلدى.
ەسكە سالا كەتەيىك, 1993 جىلى 10 جەلتوقساندا «قازاقستان رەسپۋبليكاسىنىڭ جەرگىلىكتى وكىلدى جانە اتقارۋشى ورگاندارى تۋرالى» زاڭ قابىلدانعان بولاتىن. ودان كەيىن 1994 جىلى العاش رەت رەسپۋبليكانىڭ جاڭا وكىلدى ورگاندارى – ءماسليحات دەپۋتاتتارىنىڭ سايلاۋى ءوتتى. سودان بەرى جەرگىلىكتى ءوزىن ءوزى باسقارۋ ورگاندارى مەملەكەتتىك باسقارۋ جۇيەسىندە ماڭىزدى ءرول اتقارا باستادى. مىنە, بۇگىندە ولار ەلىمىزدەگى دەموكراتيالىق وزگەرىستەردى جۇزەگە اسىرۋعا زور ۇلەس قوسىپ كەلەدى.
