اقش پرەزيدەنتى دجو بايدەن امەريكا ازاماتتارىن اقش بانك جۇيەسىنە ەشقانداي قاۋىپ ءتونىپ تۇرعان جوق دەپ سەندىردى.
اقش پرەزيدەنتى بارلىق دەپوزيتتەر كەز كەلگەن جاعدايدا قولجەتىمدى ەكەنىن جانە بانكروت بانكتەردىڭ باسشىلارى جۇمىستان شىعارىلاتىنىن ايتتى.
«امەريكالىقتار اقش-تىڭ بانك جۇيەسىنىڭ قاۋىپسىزدىگى ءۇشىن ەش الاڭداماسا بولادى. ال بانكروتقا ۇشىراعان بانكتەردىڭ باسشىلىعى جۇمىستان شىعارىلادى», دەدى دجو بايدەن بانك داعدارىسىنا بايلانىستى جاساعان شۇعىل مالىمدەمەسىندە.
بايدەن ورىن العان ماسەلەگە بايلانىستى سالىق تولەۋشىلەر شىعىنعا ۇشىرامايتىنىن دا جەتكىزدى.
بۇعان دەيىن اقش-تاعى ەڭ ءىرى بانكتەردىڭ ءبىرى - Silicon Valley Bank, سونداي-اق Signature bank بانكروتتىققا ۇشىراعانى بەلگىلى بولدى.
سونداي-اق اقش-تىڭ رەتتەۋشى ورگانى بانكروتتىق سالدارىنىڭ الدىن الۋ ءۇشىن سيليكون القابىنداعى بانكتىڭ بارلىق سالىمشىلارىن قورعايتىنى حابارلانعان بولاتىن.
