ء«بىزدىڭ ناقتى جوسپارىمىز بار, باعىت-باعدارىمىز ايقىن. ەڭ الدىمەن, حالىقتىڭ تۇرمىس ساپاسىن جاقسارتۋعا باسا ءمان بەرۋىمىز كەرەك. مەملەكەت بۇعان بار كۇش-جىگەرىن جۇمىلدىرۋعا ءتيىس. جالپى, كۇندەلىكتى اتقارىلاتىن جۇمىس از ەمەس. كوكتەم كەلگەندە جەر جىرتۋ, ەگىن ەگۋ سياقتى ءتۇرلى ناۋقان باستالادى. قاۋىپسىزدىك, دەنساۋلىق ساقتاۋ, ءبىلىم بەرۋ, قارجى سالاسىنداعى تۇراقتىلىق, مۇنىڭ ءبارى – وزەكتى ماسەلە. باسقا دا ماڭىزدى شارۋالار بار», دەدى ەل پرەزيدەنتى.
مەملەكەت باسشىسىنىڭ ايتۋىنشا, ازاماتتارىمىز ەلدە وڭ وزگەرىس بولىپ جاتقانىن ۇنەمى سەزىنۋى قاجەت. ول ءۇشىن يگى باستامالاردىڭ ءمان-ماڭىزىن حالىققا ۇدايى ايتىپ وتىرعان ءجون. تۇراقسىزدىققا اپاراتىن ارەكەتتەرگە جول بەرمەۋىمىز ءتيىس.
«مۇنداي زاڭسىز ارەكەتتەردىڭ الدىن الۋ قاجەت. ەلگە ىرىتكى سالىپ, قوعامدىق ءتارتىپتى بۇزۋعا شاقىرعان ادامدار قاتاڭ جازالانادى. ارانداتۋعا قارسى كۇرەس زاڭ اياسىندا, جەدەل ءارى جۇيەلى تۇردە جۇرگىزىلۋى كەرەك», دەپ اتاپ ءوتتى ق.توقاەۆ.
سونىمەن قاتار پرەزيدەنت ءتيىستى زاڭدار قاتاڭ ساقتالۋى كەرەك ەكەندىگىن دە ايتتى. ايتپەسە ارەكەتسىزدىكتىڭ سالدارى ەلىمىز ءۇشىن وتە قاۋىپتى بولۋى مۇمكىن. بىزگە, ەڭ الدىمەن, زاڭ ۇستەمدىگى اسا قاجەت. زاڭ ساقتالسا جانە ازاماتتىق جاۋاپكەرشىلىك جوعارى بولسا, قوعامدا ءتارتىپ بولاتىنىن قوسا ايتتى.
