20 ناۋرىز بەن 1 ءساۋىر ارالىعىندا مالايزيانىڭ كۋچينگ قالاسىندا World Junior Tennis Competition 14&under ازيا – تىنىق مۇحيت ايماعى بويىنشا ىرىكتەۋ كەزەڭىنىڭ توپتىق باسەكەسى وتەدى.
وسى دودادا قازاقستان نامىسىن تومەندەگى تەننيسشىلەر قورعايدى:
ۇلدار:
ميحايل ميششەنكو (الماتى),
ياروسلاۆ پشەنيچنىي (استانا),
مانسۇر سايىنوۆ (اقتوبە).
كوماندا كاپيتانى - سەرگەي كۆاك.
قىزدار:
ەۆا كورىشەۆا (اقتوبە),
سابينا شۋحراتوۆا (شىمكەنت),
ەركەجان جاڭاتاەۆا (الماتى).
كوماندا كاپيتانى - ءمادينا راحىم.
ىرىكتەۋ كەزەڭىندە 16 كوماندا ءتورت توپقا ءبولىنىپ, باق سىنايدى. ءار توپتان ەكى قۇراما پلەي-وفف كەزەڭىنە شىعادى. سوسىن كوماندالىق الەم چەمپيوناتىنىڭ فينالىنا بەرىلەتىن جولدامانى ساراپقا سالادى. بيىل ازيا – تىنىق مۇحيت ايماعىنان ۇلدار قۇراماسىنا 4, قىزدارعا 3 جولداما بەرىلەدى.
وتكەن جىلى 14 جاسقا دەيىنگىلەر اراسىندا قازاقستاندىق جاسوسپىرىمدەر العاش رەت كوماندالىق الەم چەمپيوناتىنىڭ فينالدىق كەزەڭىنە قاتىسىپ, قولا جۇلدە ءۇشىن باسەكەدە اقش قۇراماسىنا جول بەردى. ءسويتىپ ۇزدىك تورتتىككە ىلىكتى.
