ەلوردا اكىمى الماتىدا وتكەن الەم چەمپيوناتىندا جىلدام شاحماتتان (راپيد) كۇمىس جۇلدە العان شاحماتشى دينارا سادۋاقاسوۆانى جارقىن جەڭىسىمەن قۇتتىقتادى.
دينارا سادۋاقاسوۆا استانا قالاسىنىڭ اكىمىنە قولداۋ كورسەتكەنى ءۇشىن العىسىن ايتىپ, سپورتتاعى مانسابىنا بايلانىستى الداعى جوسپارىمەن ءبولىستى.
ءوز كەزەگىندە جەڭىس قاسىمبەك الەمدىك شاحمات دودالارىندا ەل نامىسىن الداعى ۋاقىتتا دا لايىقتى دەڭگەيدە قورعاي بەرەتىنىنە سەنىم ءبىلدىرىپ, تەك بيىكتەن كورىنىپ, جەڭىسكە جەتۋىنە تىلەكتەستىك ءبىلدىردى.
ايتا كەتسەك, بۇگىن دينارا سادۋاقاسوۆا استانا شاحمات فەدەراتسياسىنىڭ قۇرمەتتى پرەزيدەنتى بولىپ سايلاندى. ول بۇل تۋرالى ءوزىنىڭ Facebook جەلىسىندەگى پاراقشاسىندا حابارلادى.
«وسى ماقساتتا مەن شاحماتتى ودان ءارى ناسيحاتتاپ, دامىتۋعا, ماعان ارتقان سەنىمدەرىڭىز بەن ۇمىتتەرىڭىزدى اقتاۋعا تىرىسامىن. فيدە سپورت كوميسسياسىندا تاجىريبەسى بار يۋنيسەف-ءتىڭ ىزگى ەلشىسى رەتىندە ءوز ءبىلىمىم مەن ەنەرگيامدى شاحماتتىڭ كوركەيۋىنە جۇمسايمىن», دەپ جازدى دينارا سادۋاقاسوۆا.
