سپورتتى دامىتۋ ديرەكتسياسىنىڭ مالىمەتى بويىنشا, ەرەسەكتەر اراسىنداعى جارىستا حالىقارالىق بايراقتى دودالاردا ەل نامىسىن قورعاپ جۇرگەن ۇلتتىق قۇراما وكىلدەرى جۇلدەنى ءوزارا ءبولىستى. ماسەلەن, ەرلەر ساناتىنداعى «سپورت شەبەرى» رازريادىندا ەل چەمپيونى, ماسكەۋدەگى رۋستەر كۋبوگى مەن ىستانبۇلداعى بوسفور كۋبوگى جانە گدانسكىدەگى گران-پري سايىسىندا كۇمىس, بولگاريادا ۇيىمداستىرىلعان «Sofia Trophy» تۋرنيرىندە قولا جۇلدە العان ميحايل شايدوروۆ جەڭىسكە جەتتى. ول ەكى باعدارلاما قورىتىندىسى بويىنشا 254,98 ۇپاي جيناپ, ءوز مىقتىلىعىن تاعى ءبىر مارتە دالەلدەدى. ەكىنشى جانە ءۇشىنشى ورىندارعا حالىقارالىق جارىستاردا باق سىناپ جۇرگەن تالانتتى جاستارىمىز – دياس جيرەنباەۆ (209,71 ۇپاي) پەن راحات برالين (200,94 ۇپاي) يە بولدى.
ال ءدال وسى ساناتتاعى بۇرىمدىلار باسەكەسىندە ەلوردالىق اننا لەۆكوۆەتس توپ جاردى. نۇريا سۇلەيمەن (استانا) كۇمىس جۇلدەگەر اتانسا, سوفيا فارافونوۆا (الماتى قالاسى) ۇزدىك ۇشتىكتى تۇيىندەدى.
IV قىسقى جاستار سپورت ويىنداردىڭ جەڭىمپازى ميحايل شايدوروۆ بۇل جارىسقا الەم چەمپيوناتىنا تىڭعىلىقتى دايىندالۋ ءۇشىن قاتىسقانىن ايتتى.
«بۇل ويىندارعا 2 اپتادان كەيىن جاپونيانىڭ سايتاما قالاسىندا الاۋى تۇتاناتىن الەم چەمپيوناتى قارساڭىندا ءوز شەبەرلىگىمدى بايقاپ كورۋ ءۇشىن كەلدىم. ءوز ونەرىمە كوڭىلىم تولدى. باعدارلاماما بىرقاتار كۇردەلى ەلەمەنتتەردى قوستىم. بۇدان دا جوعارى ۇپاي الۋعا بولاتىن ەدى, بىراق الدا ماڭىزدى جارىس كۇتىپ تۇرعان سوڭ بار ونەرىمدى ورتاعا سالعان جوقپىن», دەيدى ميحايل شايدوروۆ.
سونداي-اق قىسقى جاستار سپورت ويىندارىندا «سپورت شەبەرلىگىنەن ۇمىتكەر» ساناتىندا نيكيتا كوزلوۆ (ەرلەر) پەن زەرە ساربالينا (قىزدار), ء«بىرىنشى سپورت» رازريادىندا تيمۋر ءادىلحانوۆ (ەرلەر) پەن نۇريا قامىسباي (قىزدار), «ەكىنشى سپورتتىق» رازريادىندا جاحونگير ابىلقاسىموۆ (ەرلەر) پەن سوفيا پەتروۆا (قىزدار) ۇزدىك شىقتى.
جارىس قورىتىندىسى بويىنشا, جالپىكوماندالىق ەسەپتە استانا قالاسىنىڭ سپورتشىلار توپ جارسا, الماتى قالاسىنىڭ وكىلدەرى ەكىنشى, قاراعاندى وبلىسىنىڭ ورەندەرى ءۇشىنشى ورىنعا يە بولدى. ماراپاتتاۋ راسىمىنە سپورتتى دامىتۋ ديرەكتسياسى ديرەكتورىنىڭ ورىنباسارى ازامات يماشەۆ, ۇلتتىق كونكي تەبۋشىلەر فەدەراتسياسىنىڭ ۆيتسە-پرەزيدەنتى ەلميرا تۋرگانوۆا قاتىستى.
ايتا كەتەيىك, 20-26 ناۋرىز ارالىعىندا جاپونيانىڭ سايتاما قالاسىندا ۇيىمداستىرىلاتىن مانەرلەپ سىرعاناۋدان الەم چەمپيوناتىندا قازاقستاننىڭ نامىسىن ءۇش سپورتشى قورعايدى. اتاپ ايتساق, ميحايل شايدوروۆ مۇزداعى بي باسەكەسىندە باق سىناسا, گاۋھار ناۋرىزوۆا مەن بويسانگۋر داتيەۆ جۇپتىق سايىستا ونەر كورسەتەدى. سونداي-اق قوسالقى قۇرامدا دياس جيرەنباەۆ ەسىمدى جاس ورەن بار.
