سۋرەتتى تۇسىرگەن ەرلان ومار, «EQ»
استاناداعى «سارىارقا» ويىن-ساۋىق ورتالىعىنىڭ ءبىرىنشى قاباتىندا ديزاين جانە تىگىن تسەحى ورنالاسقان بيبايات اپايعا ارنايى بارىپ كەزدەسىپ, ءتول مەرەكەسىمەن قۇتتىقتادىق. اڭگىمە بارىسىندا ۇققانىمىز, كەيىپكەرىمىز بۇرىمى جەلبىرەگەن كۇنىنەن باستاپ كوڭىلى ادەمىلىككە, تىگىنشىلىك ونەرگە قۇشتار بولىپتى. باقىتىنا وراي مەكتەپتەگى ەڭبەك ساباعىنان ءدارىس جۇرگىزگەن ۇستازدارى وسى سالانىڭ ءتاپ-ءتاۋىر شەبەرلەرى ەكەن. مەكتەپتەگى ۇستازىنىڭ ارقاسىندا ساندىك ونەردىڭ باستاۋىن مەڭگەرىپ, ادەمى ارمان, قيالدارىن جۇزەگە اسىرۋدىڭ جولى اشىلعان. ايتسە دە, اكە-شەشەسى دارىندى قىزدارىنىڭ بۇل ونەردىڭ سوڭىنا تۇسكەنىن قالاماعان. بىراق «وتكىر كەزدىك قىن تۇبىندە جاتپايدى», اناسىنىڭ تىيىم سالعانىنا قاراماستان, تىگىن ماشيناسىن اينالشىقتاۋدى تاستاي المادى.
بۇگىندە جاسى ەگدە تارتقان اپايىمىز: «ول زاماندا, ياعني كەڭەس وداعى كەزىندە قاراپايىم اۋىل, اۋداندا ءسان ونەرىنە دەگەن كوزقاراس پەن جالپى تۇسىنىك تىم تومەن بولاتىن. سوندىقتان مەكتەپ بىتىرگەندە باسقا ماماندىقتى تاڭداۋعا ءماجبۇر بولدىق», دەيدى. الماتىدا وقىپ, جۋرناليستيكادا قىزمەت ىستەگەن بيبايات اپاي ستۋدەنت شاعىندا دا, جۇمىس ىستەپ جۇرگەن كەزىندە دە تىگىنشىلىكتى, ديزايندى بىردە-ءبىر رەت توقتاتپاعانىن ايتادى. توي-جيىنعا باراتىن قىز-كەلىنشەكتەرگە ەرەكشە ءساندى كيىمدەر تىگىپ بەرەتىن. بۇل تىرلىگىنەن تابىس تاپپاسا دا جانى راحاتقا بولەنەتىن.
قازىرگى ۇلىتاۋ وبلىسىنىڭ «جەزقازعان تۋى» گازەتىندە كوررەكتور بولىپ جۇمىسىن باستاپ, ءارى قاراي جۋرناليستيكانىڭ قىزىعى مەن شىجىعى كوپ دۇنيەسىنە ەنىپ كەتتى. جەزدى ءوڭىردىڭ تۇرمىس-تىرشىلىگى تۋرالى تالاي تاتىمدى, تانىمدىق ماقالالاردى دۇنيەگە اكەلدى. بىراق ءبارىبىر جان-جۇرەگى قالاعان تىگىنشىلىك پەن ساندىك ونەرى وزىنە تارتىپ تۇراتىن. جۋرناليستيكا سالاسىندا جاۋاپتى حاتشىنىڭ ورىنباسارلىعىنا دەيىن كوتەرىلگەن بيبايات اپاي جەزقازعان وبلىسى تاراتىلىپ, ەلورداسى سارىارقا تورىنە كوشكەن جىلدارى وتباسىمەن استاناعا قونىس اۋداردى. جاسى 55-كە كەلگەندە ايەل كىسىگە جاڭا جەردەن جۇمىس تابۋ وڭاي ما؟ ايتسە دە, بيبايات اپاي وعان مويىماعان. وتاعاسىنا بالا كۇنگى ارمانىن ايتىپ, جاڭارعان زاماندا جاڭا كاسىپ باستاۋدى ۇسىنادى. وكىنىشكە قاراي, ول كەزدە تىرلىگى دە, تابىسى دا كومەسكى تىگىنشىلىك پەن ديزاينەرلىك كاسىپپەن اينالىسۋدى وتاعاسى قۇپتاي قويمادى.
وعان قاراعان بيبايات اپاي بولمادى. تاۋەكەلگە بەل بۋىپ, ىسكە كىرىسىپ كەتتى. جانى قالاعان جۇمىسى ءا دەگەننەن-اق تالابى مەن ارمانىن تەز-اق العا جەتەلەپ الىپ كەتتى. ديزاينىن ءوزى جاساپ تىككەن كيىم ۇلگىلەرى كوپشىلىكتىڭ كوڭىلىنەن شىقتى. توي-جيىنعا ارناپ تىككەن ساندىك كويلەكتەرى كوزدىڭ جاۋىن الاتىن. سودان ءوزىنىڭ كاسىبىن اشىپ, كوپ جەتىستىكتەرگە قول جەتكىزدى.
قازاقتىڭ ۇلتتىق كيىمدەرىندەگى ايرىقشا ناقىشتاردى زاماناۋي كيىمدەرمەن ۇيلەستىرىپ جاساعان ديزايندارى جۇرتتىڭ نازارىن بىردەن اۋداردى. كيىم تىگىپ, جاڭا برەندتەر جاساپ وتىراتىن الەمدىك الپاۋىت فيرمالاردىڭ كيىمىن قالتالى ادامنىڭ كەز كەلگەنى الىپ كيە بەرەتىنى ءمالىم. ال بيبايات اپايدىڭ ۇلتتىق ناقىشپەن ادىپتەپ جاساعان بىرەگەي ديزايندارى ەسكىمەن جاڭانىڭ استاسۋى ارقاسىندا ەرەكشە ۇيلەسىم تاپقان, باسقا ەش جەردەن تابىلمايتىن جاڭا برەند ەدى. ونى 2018 جىلى فرانتسيا استاناسى پاريجدە وتكەن Global Fashion Startur كورمەسىنە قاتىسقاندا ەۋروپالىق كيىم ديزاينەرلەرى جوعارى باعالادى.
– سىزدەردىڭ كونە ۇلتتىق ديزاين ونەرلەرىڭىزدىڭ ساقتالىپ قالعانى قانداي جاقسى. ۇلتتىق ويۋ-ورنەك ناقىشتارىڭىز وتە ادەمى ەكەن. ۇلتتىق ادىپتەۋمەن ۇيلەسىم تاپقان مىنا كيىم ۇلگىلەرىڭىز, ءسىزدىڭ ءوزىڭىز تۇرماق ءبىزدىڭ دە جانىمىزعا تىم جاقىن سياقتى. ال ءبىز ۇلتتىق داستۇردەن قول ءۇزىپ قالعان سوڭ, ەرتە داۋىردەن جالعاسىپ كەلگەن كوپ ونەردەن ايىرىلىپ قالدىق, – دەگەندى سوندا ەۋروپالىق كيىم ديزاينەرلەرى.
ۇلتىمىزدىڭ ءتۇرلى ويۋ-ورنەگىن پايدالانۋمەن قاتار, بيبايات اپايدىڭ برەند كيىمدەر كوللەكتسياسىندا قۇراق ۇلگىدە تىگىلگەن كيىمدەردى كورىپ تاڭعالدىق. ءبىزدىڭ بىلۋىمىزدە قازاقتا قۇراق كورپە, قۇراق جاستىق بولاتىن. دەسەك تە, قۇراق ۇلگىدە تىگىلگەن كويلەكتەرى كەرەمەت ادەمى شىققان. ونى كورگەن قىز-كەلىنشەكتەردىڭ كوڭىلى ەرىكسىز اۋاتىنى انىق. بۇل ۇلگىنى ءسان الەمىنە قوسىلعان مۇلدە جاڭا ديزاين دەپ اتاۋعا لايىق.
ديزاين سالاسىنداعى جەتىستىگى مەن وسى ونەردى دامىتۋعا قوسقان ەڭبەگى ءۇشىن ەۋرازيالىق ديزاين وداعىنىڭ مەدالىمەن ماراپاتتالعان كەيىپكەرىمىز Aspara fashion week حالىقارالىق بايقاۋىنىڭ تۇراقتى قاتىسۋشىسى. سوندىقتان سالاداعى تىنىمسىز ىلگەرىلەۋ, بارىنشا جاڭارىپ, دامۋ ءىسى ءبىر ساتكە دە ىركىلگەن ەمەس. ناتيجەسىندە, «اتامەكەن» ۇكپ-نىڭ كاسىپكەرلىك ۇسىنىستار بويىنشا «بيزنەس كەڭەسشى» جوباسى سەرتيفيكاتىنىڭ جانە پرەزيدەنتتىڭ «التىن ساپا» سىيلىعى سەرتيفيكاتىنىڭ يەگەرى بولدى.
جانى سۇيگەن كاسىبىمەن شۇعىلدانىپ, وسىنشاما جەتىستىككە جەتىپ جۇرگەن بيبايات اپايىمىزدىڭ دا كوڭىلىندە الاڭ بار. ول سالاعا مەملەكەتتىك كوزقاراستىڭ وڭالماي تۇرعانى جانە ينە مەن جىپكە, كيىم ديزاينى مەن سانگە قازاق جاستارىنىڭ جاقىنداعىسى كەلمەيتىنى.
«ارينە جۇمىسى قيىن, تابىسى دا تىم كوپ ەمەس. ەگەر تىگىن سالاسىنا مەملەكەتتىك تۇرعىدا كوڭىل بولىنبەسە, وسى ميمىرت تىرلىك جالعاسا بەرمەك. قازىر ەلىمىزدە ديزاين, تىگىنشى ماماندارى دايىندالعانىمەن, ولاردىڭ بارىپ جۇمىس ىستەپ كەتەتىن جەرى جوق. وقۋدى جاڭا بىتىرگەن جاستاردىڭ ءبارى دە جەكە كاسىپ اشىپ كەتە بەرمەيدى عوي. رەسپۋبليكانىڭ ءار-ءار جەرىندەگى قاداۋ-قاداۋ ءبىرلى جارىم تىگىنشى-كاسىپكەرلەر ەشقاشان ءوز كۇشتەرىمەن قىتايدان, وزبەكستاننان, قىرعىز رەسپۋبليكاسىنان اعىلاتىن ارزان كيىم-كەشەك اعىندارىنا باسەكەلەس بولا المايدى. وسىنى دۇرىس ءتۇسىنىپ, تىگىنشىلەر ماسەلەسى مەملەكەتتىك دەڭگەيدە قاراستىرىلىپ, شەشىمىن تاپسا, كوپتەگەن جاسقا جۇمىس ورىندارى اشىلار ەدى», دەپ ويىن جەتكىزدى بيبايات اپاي.
كاسىپكەردىڭ كوتەرىپ وتىرعان ماسەلەسى وتە ورىندى. ەندى ۇكىمەتتەگىلەر ەلىمىزدەگى جەڭىل ونەركاسىپكە مويىن بۇرىپ, جاقسى تىلەكتى قاپەرگە السا قۇبا-قۇپ!
