ول بەيجىڭدەي الىپ قالادا «ۇلتتار ادەبيەتى» اتتى قوس ايلىق قازاقشا جۋرنال شىعارىپ, ءار ۇلت قالامگەرلەرىنىڭ تۋىندىلارىن قازاق وقىرماندارىنا ءوز انا تىلىندە تانىستىرۋ جولىندا ەل سۇيىنەر جاقسى جۇمىستار ىستەگەنىن ەستىپ, مارقايىپ قالدىق. شەكارانىڭ ارعى بەتىندەگى از ۇلتتاردىڭ ادەبيەتىن دامىتۋ ماقساتىندا جارىققا شىعىپ جاتقان «ۇلتتار ادەبيەتى» جۋرنالى 2012 جىلدان باستاپ قىتايداعى قازاق وقىرماندارىمەن جۇزدەستى. اتالعان جۋرنالدىڭ تۇڭعىش سانىندا ارعى بەتتە ورازحان احمەت, جۇماباي ءبىلال, شاكەن وڭالباي, اكبار ءماجيت سياقتى قابىرعالى جازۋشىلاردىڭ تۋىندىلارىن جاريالاپتى.
بەيجىڭدەگى ۇلتتار ۋنيۆەرسيتەتىنەن ماگيستراتۋرانى اياقتاي سالا ۇلكەن قالاداعى جالعىز قازاقشا جۋرنالدىڭ جاۋاپتى رەداكتورى سىندى جۇگى اۋىر مىندەتتى ارقالاعان مينار نۇرلاززاتقىزى نەبارى جيىرما كۇننىڭ ىشىندە جۋرنالدىڭ العاشقى سانىن دايارلاپ, وقىرمانعا ۇسىنادى. ول سول ساتتەرىن ەسكە الىپ:«جۋرنالدىڭ جاۋاپتى رەداكتورى رەتىندە اتالعان باسىلىمدى لايىقتى شىعارا الدىم با, جوق پا دەگەن سۇراقتى وزىمە ءجيى قويامىن, بىراق ءبارىن ۋاقىت كورسەتەدى. وقىرمان قاۋىمنىڭ كوڭىلىنەن شىقساق, سول ءبىز ءۇشىن ۇلكەن جەتىستىك. مەن تەك قولىمنان كەلگەنىنشە قۇلشىنىپ, بارلىق مۇمكىندىكتى پايدالانىپ, ساپالى جۋرنال شىعارۋدى ارماندادىم. الەمدە العاش جارىققا شىققان گازەت-جۋرنالداردىڭ ءاۋ باستا تىم كەرەمەت بولىپ كەتپەيتىنى بەلگىلى, ال مەن ۇنەمى وزىمە جوعارى تالاپ قويىپ, وسى ءبىر جۋرنالدى قازاق وقىرمانىنىڭ رۋحاني ازىعى ەتسەم دەگەن ويىمنان ەشقاشان اينىعان ەمەسپىن. كەيدە جۇمىستان شارشايتىنىڭ بار. ويتكەنى تەك وسى جۋرنالدىڭ رەداكتسيالىق جۇمىسىن عانا ەمەس, بارلىق ىشكى-سىرتقى شارۋاسىن تۇگەلدەي ءوزىم اتقارامىن. قانشا قيىندىق بولسا دا, ادەبيەتتى سۇيگەنىم ءۇشىن, وسى جولدى تاڭدادىم», دەدى.
شىنىندا, ءبىر جۋرنالدى جالعىز دايىنداپ, ونى باسپادان شىعارۋ وڭاي-وسپاق شارۋا ەمەس. بۇل ءۇردىس مول ءبىلىمدى, ادەبي ساۋاتتىلىقتى, تاباندىلىقتى قاجەت ەتەتىنى ءسوزسىز. وسى شارتتاردىڭ ءبارىن ورىنداعان ميناردىڭ ەڭبەگى ەرەسەن ەكەنى شىندىق. جالعىز ءوزى جاۋاپتى دا اۋقىمدى جۇمىستى اتقارىپ جۇرگەن الىستاعى قازاق قىزىنىڭ ءار ىسىنە سۇيىنىشپەن قاراۋعا بارمىز.
