بۇل كۇيدى گەنەرال اسقاروۆتان كەيىن ەشكىم تارتپاعان دا سياقتى. كۇي سۇگىردىڭ اڭىزبەن استاس ماحاببات جايىن بايان ەتەدى. تەكتىدەن تەكتى ارالاپ نايمان ەلىنەن ايتتىرىپ الىپ كەلگەن اياۋلى جارى, ايگىلى كۇيشى مافرۋزا ءبىر جىلدان سوڭ كوز ءتيىپ قايتىس بولادى. «نازقوڭىر» – العاشقى كۇندەردىڭ قالىڭ قايعىسىن, كۇيشىنىڭ باسىن تاۋ مەن تاسقا سوعىپ, بويىن ورتەگەن قاسىرەتتەن, وكىنىشتەن «اح» ۇرعان قيامەت ءساتىن بەينەلەيدى. سونداي-اق بۇل كۇيدە سۇگىر العاشقىلاردىڭ ءبىرى بولىپ, ادامنىڭ جۇرەگىندەگى ءتاۋبانى بەينەلەيتىن اۋەندى ويلاپ تاپقان, ەنگىزگەن.
سوناۋ تومەنگى ساعاعا بارىپ, ون ەكى مۇشەنى تالدىرعان, قايعىنى سۋداي ىشتىرگەن كۇي جوعارعى ساعاعا قايتىپ كەلىپ, كەنەت اۋناپ ءتۇسىپ, القوڭىر اۋەنگە اۋىسادى. وسىنشاما قايعىدان كەلىپ كۇيدىڭ ماجورعا اۋىسۋى باسىنداعى بۇراۋدان اۋىتقىمايتىن, سول بۇراۋمەن اياقتالاتىن قازاق كۇيى ءۇشىن جاڭا قۇبىلىس, سىرت قۇلاققا ءتىپتى جاعىمسىز مودۋلياتسيا بولىپ ەستىلۋى مۇمكىن. بىراق قۇلاعىڭىز ۇيرەنە كەلە سۇگىر كۇيىنىڭ بيىك پاراساتىنا باس ۇراسىز.
مەن سۇگىردىڭ اباي پوەزياسىمەن قانشالىقتى تانىس ەكەنىن بىلمەيمىن. ابايدىڭ سۇيىكتى ۇلى ءابدىراحمان ولگەندە قولىن جۇرەگىنە قويىپ, جاراتقان يەگە تاعزىم ەتىپ:
– دۇنيەدە, ءسىرا, سەندەي ماعان جار جوق
ساعان جار مەنەن ارتىق تابىلسا دا, – دەگەن.
وسىنداي ۇلى قايعىنى جەڭگەن, اللا تاعالا قانداي سىنعا سالسا دا ءتاۋباسىنان جاڭىلماعان حاكىم اباي ەنجىلدەگى ايۋپ پايعامبارعا تەڭەلگەن. بۇل جونىندە «Abai.kz» پورتالىندا جاريالانعان ماقالادا جازىلعان. سۇگىر ەنجىلدەن دە بەيحابار بولۋى مۇمكىن, باسىنا تۇسكەن قايعىنى اياعىنا دەيىن ءوزى كەشكەن, تاۋباعا ءوز جولىمەن كەلگەن.
اڭگىمەلەگەن - تالاسبەك اسەمقۇلوۆ
