6 اقپاندا تۇركيانىڭ وڭتۇستىك-شىعىسىندا جانە سيريانىڭ سولتۇستىگىندە ەكى مارتە ۇلكەن جەر سىلكىنىسى بولدى. 448 مىڭنان استام ادام ەۆاكۋاتسيالاندى. 20 مىڭنان استام عيماراتتىڭ قيراعان ورنىندا ىزدەستىرۋ-قۇتقارۋ جۇمىستارى جۇرگىزىلدى.
45-تەن استام مەملەكەت جاپا شەككەندەرگە قول ۇشىن سوزدى. اپاتتىڭ سالدارىن جويۋ ءۇشىن قارجىلىق كومەك كورسەتتى. قازاقستان دا جاعدايعا بەي-جاي قاراماي, اپات ايماعىنا شۇعىل تۇردە قۇتقارۋشىلار مەن دارىگەرلەردى, سونىمەن قاتار اۆاريالىق-قۇتقارۋ جابدىقتارىنىڭ 150-گە جۋىق ءتۇرىن جىبەردى.
– مەملەكەت باسشىسىنىڭ تاپسىرماسىمەن وسىنداي سىن ساعاتتا ۇلتتىق ۇلاننىڭ اسكەري قىزمەتشىلەرى دە جەر سىلكىنىسى سالدارىن جويۋ جۇمىستارىنا قاتىسىپ, گۋمانيتارلىق جۇكتەردى تاسىمالدادى. ۇشقىشتار سيرياعا 4 رەيس, تۇركياعا 2 رەيس جاسادى, – دەدى ىشكى ىستەر ءمينيسترى مارات احمەتجانوۆ.
وپاتتان ويران بولىپ, ءزىلزالادان جاپا شەككەندەرگە قازاق ەلىنىڭ اتىنان كومەككە اتتانعانداردىڭ ءبىرى بەرىكبولسىن حابيبوللا. ول – 3656 اسكەري ءبولىمىنىڭ ليتەرلىك اۆياتسيالىق جاساعىنىڭ كەمە كومانديرى. «جاۋىنگەرلىك ەرلىگى ءۇشىن» مەدالىمەن ماراپاتتالعان ۇلاندىق اپاتتى جەرگە ۇشۋ مەن قونۋ كەزىندە قيىندىقتاردىڭ بولعانىن ايتادى.
– سيريا مەملەكەتىنە ۇشۋ بۇل ءبىزدىڭ وندا ءبىرىنشى رەت ۇشۋىمىز بولعاندىقتان ەكيپاج ءۇشىن قيىنعا ءتۇستى. وندا GPS-ناۆيگاتسيا جۇمىس ىستەگەن جوق. بۇل ۇشاقتاردىڭ تولىق جۇمىس ىستەۋىنە كەدەرگى كەلتىرەدى. راديوبايلانىسپەن دە قيىندىقتار تۋىندادى. جەر سىلكىنىسى كەزىندە تۇركيا مەن سيريا ەلدەرىنىڭ راديوستانتسيالارىنا ۇلكەن زاقىم كەلگەن, – دەدى ۇلاندىق.
ونىڭ ارىپتەسى قۇرمانعالي توپانوۆ ءىى دارەجەلى «ايبىن» وردەنىمەن ماراپاتتالدى.
– جالپى نەگىزگى قىزمەتىمىز وسى. سوندىقتان بارلىق قيىندىقتاردى ەڭسەرە بىلدىك. ءبارىمىز اسكەري ادام بولعان سوڭ, جۇكتەلگەن مىندەتتى مۇلتىكسىز ورىنداۋعا تىرىسامىز, – دەدى قر ۇلتتىق ۇلانىنىڭ 3656 اسكەري ءبولىمىنىڭ اۆياتسيالىق جاساعىنىڭ كەمە كومانديرى قۇرمانعالي توپانوۆ.
ەرلىك – ەلگە مۇرا, ۇرپاققا – ۇلگى. اسكەري بورىشىن ابىرويمەن اتقارىپ كەلگەن جاۋىنگەرلەرگە ۆەدومستۆو باسشىلىعى قىزمەتتە تابىس تىلەدى.
