سەمينارعا ورتالىق جانە وڭىرلىك مەملەكەتتىك ورگانداردىڭ بىرقاتار ءباسپاسوز حاتشىلارى قاتىستى. ءىس-شارا سوڭىندا ۇيىمداستىرۋشىلار سەمينار قاتىسۋشىلارىنا بەلسەندىلىگى ءۇشىن العىس ايتىپ, سەرتيفيكات تابىستادى. سەميناردىڭ ەكىنشى كۇنى كوۋچ, PR جانە كريزيس-مەنەدجەر اسقار وتەپقاليەۆتىڭ ەموتسيونالدى ينتەللەكت بويىنشا ساراپشى اسەل مۇراتوۆانىڭ, مەدياترەنەر, رەداكتور نازگۇل قوجابەكتىڭ جانە «استانا» حالىقارالىق قارجى ورتالىعىنىڭ كوممۋنيكاتسيا بويىنشا باسقارۋشى ديرەكتورى ەلەنا پاكتىڭ شەبەرلىك ساعاتتارىمەن جالعاسقان بولاتىن. ولار نە ايتتى؟
– ءباسپاسوز حاتشىسىنىڭ مەكەمەنى داعدارىس جاعدايىنا اكەلۋى مۇمكىن دەگەن جازبالار مەن جاريالانىمداردى قاداعالاپ وتىرۋى ماڭىزدى. شەشىمگە ىقپال ەتۋ نەمەسە وزگەرتۋ مۇمكىندىگى بولماسا دەر كەزىندە باسشىلىقپەن كەڭەسۋ قاجەت. PR قىزمەتى ۇيىمنىڭ برەندى مەن بەدەلىن نىعايتۋعا, پوزيتسيانى انىقتاۋعا, نەگىزگى حابارلامالاردى تاراتۋعا جانە داعدارىس كەزىندەگى تاۋەكەلدەردى باسقارۋعا جاۋاپ بەرەدى, – دەدى ە.پاك.
ال بارلىق دەڭگەيدەگى ءباسپاسوز حاتشىلارىنىڭ الدىندا شەبەرلىك سىنىبىن وتكىزگەن كاسىبي سپيچرايتەر دانا ساۋدەگەروۆا مەملەكەتتىك ورگان وكىلى مەن جۋرناليستەر اراسىنداعى قارىم-قاتىناستىڭ وزەكتىلىگىنە توقتالدى.
– ءوز اۋديتورياسىن ءبىلۋ, دۇرىس كوممۋنيكاتسيا ورناتىپ, سەنىم ۇيالاتۋ – باستى ەرەجە. ءاربىر ماقساتتى اۋديتوريا جۇزدەگەن سيپاتقا يە بولۋى مۇمكىن. سوندىقتان كومپانيالار كىمدەرگە ءونىم ۇسىناتىنىن جانە قاجەتتى اقپاراتتى قالاي جەتكىزۋ كەرەكتىگىن ءتۇسىنۋ ءۇشىن ءوز اۋديتورياسىن مۇقيات زەرتتەيدى, – دەدى د.ساۋدەگەروۆا.
سونداي-اق سىرتقى ىستەر مينيسترلىگىنىڭ ەكس-رەسمي وكىلى جانبولات ۇسەنوۆ كوممۋنيكاتسياداعى داعدارىس جاعدايى كەزىندەگى ءباسپاسوز حاتشىلارىنىڭ رولىنە توقتالدى.
– اۋەلگى تالاپ – وپەراتيۆتى بولۋ. اۋديتوريا ارقاشان جاعدايدىڭ ءتۇسىندىرىلۋىن كۇتەدى. ءوزارا قارىم-قاتىناستىڭ بولماۋى ءسىزدىڭ وقيعاڭىزدى باسقالاردىڭ باسقارىپ كەتۋىنە اسەر ەتەدى. ياعني ەگەر ءسىز تۇسىنىكتەمە بەرمەسەڭىز, ونى باسقا بىرەۋ جاسايدى. اقپاراتىڭىز, ايتار ويىڭىز, مۇمكىندىگىنشە, قاراپايىم جانە قىسقا بولۋى كەرەك. كونتەكستى ءتۇسىنۋ, بايلانىستاردى ۇعىنۋ جانە ولاردى ءىس جۇزىندە قولدانۋ – ءباسپاسوز حاتشىسى جۇمىسىنىڭ ماڭىزدى اسپەكتىلەرى, – دەدى ج.ۇسەنوۆ.
سونداي-اق «TANBA» PR اگەنتتىگىنىڭ باسشىسى, «PRshy» كلۋبىنىڭ مۇشەسى اقسۇلۋ سانعالي ترەنينگتە مەملەكەتتىك ورگاندار مەن جەكە كومپانيالارعا PR جاساۋدىڭ قىر-سىرىمەن ءبولىستى. بۇعان قوسا پرەسس-رەليز جازۋ تۋرالى كەڭىنەن تارقاتتى.
– پرەسس-رەليز جازۋدىڭ 7-8 تەحنولوگياسى بار. ەڭ وڭايى – «11 جاس ءپرينتسيپى». بۇل 11 جاستاعى بالالار ءسىزدىڭ جازعانىڭىزدى ءتۇسىنۋى كەرەكتىگىن بىلدىرەدى. پرەسس-رەليز اۋديتورياسى – تەك جۋرناليست ەمەس, جۋرناليست ونى حالىققا تاراتادى. ول – ءبىر. ەكىنشى – پرەسس-رەليزىڭىزدە, ماتەريالدارىڭىزدا اۋديال, ۆيزۋال, ەستەتيكالىق كونتەنتتى پايدالانساڭىز, ءسىزدىڭ ءماتىنىڭىز الدەقايدا وتىمدىرەك بولادى, – دەپ اتاپ ءوتتى ول.
ايتپاقشى, ەكى كۇندىك سەميناردان ءبىلىم-بىلىگىن شىڭداعانداردىڭ ءبىرى – دانيار اسقار ۇلى. مەديا مامان قازىر جامبىل وبلىسى اكىمىنىڭ ءباسپاسوز حاتشىسى. ءارى وسى قۇرىلىمنىڭ جەتەكشىسى.
– الەۋمەتتىك سيپات العان ءار ءتۇيىندى زەردەلەپ, زەرتتەپ, قالىڭ كوپشىلىككە ۇسىنۋدا جۋرناليستەر مەن جاۋاپتى مەكەمە وكىلدەرىنىڭ اراسىنداعى بايلانىس تۇراقتىلىعى ەسكەرىلۋى شارت. وسى ورايدا ەكى تاراپتىڭ كاسىبيلىگى نازاردان تىس قالماق ەمەس. سوندىقتان بىزگە دە وسىنداي ترەنينگ, سەمينار, شەبەرلىك ساعاتتارى كەرەك-اق. سەميناردا ءباسپاسوز قىزمەتى ستراتەگيالىق اگەنتتىككە قاراي بوي تۇزەۋ كەرەك ەكەندىگى ايتىلىپ ءوتتى. راس. بۇل تۇرعىدا بىزدە شەتەلدەن الاتىن دا تاجىريبەلەر وتە كوپ. بۇل سەميناردىڭ وزىنەن ءبىراز اقپاراتتاردى بىلدىك. اقپارات جانە قوعامدىق دامۋ مينيسترلىگى, پرەزيدەنتتىڭ ءباسپاسوز قىزمەتى, قازاقستاندىق قوعامدىق دامۋ ينستيتۋتى مەن «MediaLab» ورتالىعى ۇيىمداستىرعان يگى ءىسى جالعاسىن تابادى دەگەن سەنىمدەمىن, – دەدى د.اسقار ۇلى.
