1977 جىلى ۇلكەن اۆياتسياعا بارۋدى ۇيعارعان گرۋزين ۇشقىشى ميمينونىڭ باسىنان كەشكەن وقيعاسى قىزىق تا قىم-قۋىت. اسىرەسە اتاقتى اكتەر فرۋنزيك مكرتچيان ەكەۋىنىڭ تاندەمى ءتىپتى ءفيلمدى تۇرلەندىرىپ جىبەرگەن. كومەديا – ارمانىنا قول سوزعان اۋىل بالاسىنىڭ قانشا بيىككە ۇشسا دا تۋعان جەردەن ارتىق باقىت تاپپايتىنىن باياندايدى. ماسكەۋدەن كەلگەن ستيۋاردەسساعا عاشىق بولعان قاراپايىم جىگىتتىڭ ماحاببات دەرتتى ءومىرىنىڭ شۋاقتى ساتىندەي تۇنعيىققا تارتادى. فيلم جارىققا شىققاننان كەيىن «چيتو-گۆريتو...» ءانىن بۇكىل ەل ايتىپ, ۆاليكو مەن رۋبيكتىڭ ديولوگىن قالجىڭعا اينالىپ كەتتى.
شىعارما جەلىسىنە ۇڭىلسەڭىز شىتىرمان وقيعالار شەرۋى قوجاناسىردىڭ باسىنان كەشكەن حيكايالارى سەكىلدى كۇلكىلى جاعدايعا تولى. دارىندى رەجيسسەر گەورگي دانەليا ءتۇسىرىم بارىسىندا قوس اكتەردىڭ شەبەرلىگىنە تاڭداي قاعىپ, شەك-سىلەسى قاتا كۇلگەنىن جاسىرمايدى. قىزىعى سول, ءفيلمنىڭ يدەياسى دراماتۋرگ رەزو گابريادزەنىڭ تاۋدا تۇراتىن ۇشقىشتىڭ تۇندە تىكۇشاعىن اعاشقا شىنجىرلاپ قوياتىنىن ايتىپ بەرگەننەن كەيىن تۋىنداعان. وسى قاراپايىم اڭگىمەدەن اسەرلەنگەن رەجيسسەر كينو تۇسىرۋگە بەكىنىپ, ستسەناريگە سەزىم يرونيالارىن قوسادى. باستاپقىدا كومەديانى «ەرەكشە ەشتەڭە ەمەس» دەپ اتايدى. ايتسەدە, ارتىنان ويىن وزگەرتەدى.
«موسفيلم» كينوستۋدياسى اقشا ءبولىپ, ستسەناري بەكىتىلگەننەن كەيىن, رەجيسسەر ولەڭ جازىپ, كەرنەي تارتاتىن «جۇگەرى زاۋىتىنداعى» ۇشقىش تۋرالى حيكايانى تۇسىرۋدەن باس تارتادى. تۇسىرىلىمگە ءبىر-ەكى اي قالعاندا ارىپتەسى رۋستام يبراگيمبەكوۆپەن اقىلداسىپ, حالىقارالىق لاينەردە ۇشۋدى ارماندايتىن ءارى تاۋداعى اۋىلدار اراسىندا جۇك تاسيتىن اۋىل بالاسى تۋرالى ويىن ايتادى. ءارى قاراي ستسەناريستەر رەزو گابريادزە مەن ۆيكتوريا توكارەۆا جاڭعىرتىپ اكەتەدى.
جاڭا ستسەناري جازۋ بارىسىندا رەجيسسەر «گوسكينوعا» ءفيلمنىڭ اتىن وزگەرتكىسى كەلەتىنىن جەتكىزەدى. ولار بىردەن «ميمينو» ءسوزىنىڭ نەنى بىلدىرەتىنىن سۇرايدى. «ميمينو» گرۋزين تىلىندە «سۇڭقار» دەگەن ماعىناعا يە. بىراق, تالعامپاز «گوسكينو» بۇل اتاۋدى ۇناتپادى. توراعا فيليپپ ەرماش تاسپانى فەستيۆالدىك فيلم تۇرعىسىنان باعالاپ, كينوكارتينا ماسكەۋ حالىقارالىق كينوفەستيۆالىندە كورسەتۋگە دايىندالىپ جاتقان. سول زاماندا كەڭەستىك ءفيلمدى «ەرەكشە ەشتەڭە ەمەس» دەپ قالاي اتاۋعا بولادى؟! بۇل ۇلكەن قىلمىسپەن پارا-پار. ءسويتىپ, «ميمينو» نەعۇرلىم قىزىقتى اتاۋ رەتىندە ماقۇلداندى.
اتالعان فيلم جارىققا شىققان سوڭ دانەليانىڭ فيلموگرافياسىنداعى شەدەۆرگە بالاندى. رەجيسسەردىڭ قولتاڭبا ءستيلى شىعارمادا ايقىن كورىندى. تەرەڭ ليريكا مەن جارقىراعان يۋموردىڭ ۇيلەسىمى كورەرمەن بىتكەننىڭ جۇرەگىن جاۋلادى. سيۋجەت تەرەڭ سيمۆولدىق سيپاتقا يە, ونىڭ باسى مەن سوڭى كەيىپكەردىڭ تۋعان جەردىڭ ۇستىنەن ۇشىپ بارا جاتقان كادرلارىمەن ۇندەسەتىندەي. تۇپنۇسقاداعى قىزىقتى دەتال – شىنجىرداعى تىكۇشاق, ياكي ميمينو شىعۋ تەگىنە, شاعىن وتانىنا تۇپتامىرىمەن بايلانعان. كەيىپكەر شەت ەلدەن قۋانىش تاپپاي, تۋعان-تۋىستارى مەن جەرلەستەرىنە ورالادى.
نەگىزىندە باستى كەيىپكەرلەر ۇشقىش ۆاحتانگ كيكابيدزە مەن دارىگەر-ەندوكرينولوگ ەۆگەني لەونوۆ بولۋى كەرەك ەدى. و, باستا رەجيسسەر ستسەناريدى ۆاحتانگتىڭ بولمىسىن ەلەستەتىپ وتىرىپ جازعان. جۇمىس بارىسىندا ويدا جوقتا جاڭا كەيىپكەر پايدا بولادى. ول – ارميان جۇرگىزۋشىسى. ونىڭ ءرولىن سول تۇستا-اق داڭقى شىققان فرۋنزيك مكرتچيان سومدايدى. ال ۇشقىش ۆاليكو قوناقۇي بولمەسىندە كىممەن ورنالاساتىنىن تيىن لاقتىرۋ ارقىلى شەشەدى. باق – فرۋنزيككە اۋادى. وسىلايشا, قوس الىپتىڭ وبرازى سول ءداۋىردىڭ ايناسىنا اينالادى.
العاشىندا فيلم مۋزىكالىق كومەدياعا اينالۋى ءۇشىن كوپتەگەن كوڭىلدى ءان جوسپارلانعان, بىراق ۆاحتانگ كيكابيدزەنىڭ ءوتىنىشى بويىنشا دەنى شىرقالمادى. ونىڭ ۇستىنە اكتەر كادردا ءان سالمايتىنىن باسا ايتتى. سەبەبى بۇل كەيىپكەردىڭ مىنەزىمەن سايكەسپەيدى. بايقاعاندارىڭىزداي ۆاليكو – بىرتوعا گرۋزين, ونىڭ ورىنداۋىنداعى جەڭىل ىرعاقتى اۋەن كوزگە قوراش كورىنەتىنى انىق. رەجيسسەر اكتەردىڭ پىكىرىمەن كەلىسىپ, كيكابيدزەگە ساحنا سىرتىنان ايگىلى «چيتو-گۆريتو» تۋىندىسىن ورىنداتادى. اتالعان ءان حيتكە اينالىپ, اكتەردىڭ باعىن ەسەلەدى.
ەسكى داۋىردەن پاراعىن قايىرا اشقاندا كەڭەس كينو الەمىندە «ميمينو» سەكىلدى كىندىك قانى تامعان توپىراققا ادامزات كىندىگىمەن بايلاناتىنىن ايتقان فيلم جوق-اۋ! ءبارىبىر ادامنىڭ جىعىلار جاينامازى تۋعان جەردىڭ شالعىنى مەن قىراتى. ۆاحتانگ پەن فرۋنزيكتىڭ دوستىعى, كەڭەس حالىقتارىنىڭ تاتۋلىعىن بىلدىرگەنىمەن, قاسقىردا ورمانىنا قاراپ ۇليتىنىن ەسكە ءتۇسىردى. قايتالاپ كورۋدەن, جالىقپايسىز!
