«ەرسىندى العاش سۋمو كۇرەسىنىڭ اڭىزى, 68-ەكوزۋنا (چەمپيون) اساشيوريۋ كورىپ, بولار بالۋاندى جازباي تانيدى. ايگىلى ءاساشيوريۋدىڭ كومەگىمەن ەرسىن 18 جاسىندا جاپونياعا كەلىپ, ۋنيۆەرسيتەتكە وقۋعا ءتۇستى. ول سۋمو كۇرەسىنەن جاپونيانىڭ جاستار اراسىندا وتكەن چەمپيوناتىندا جارق ەتىپ كوزگە ءتۇسىپ, اتويلاپ العا شىقتى. بەس باشودا جەتكەن جەڭىستەرىنەن كەيىن سۋمو كۇرەسىنىڭ قازىلارى ءبىراۋىزدان كەلىسىپ, جوعارى ديۆيزيون – ماكۋشيتاعا (تابىسى مول) وتكىزدى», دەپ جازدى جاپونيا باسىلىمدارى.
ە.بالتاعۇل ريۋو كوكۋگيكان سارايىندا وتكەن ءباسپاسوز ءماسليحاتىندا جۋرناليستەردىڭ ساۋالدارىنا جاۋاپ بەردى.
– مەن اۋەلى قازاقستان اتىنان شىعىپ, ەڭ جوعارى ديۆيزيوندا كۇرەسەتىن دارەجەلى سۋموشى بولعانىما وتە قۋانىشتىمىن. نەگىزى, بۇل مەجەگە العاشقى ءبىر-ەكى تۋرنيردە-اق كوتەرىلۋىمە مۇمكىندىك بولعان ەدى. ەندىگى ماقساتىم – الدا بولاتىن بەلدەسۋلەردە 50 پايىزدىق جەتىستىككە جەتىپ, اناما سىيلىق جاساۋ جانە جاراقات الماۋ. جۋىردا انام سىرقاتتانىپ قالعاندىقتان, ەلىمە بارىپ قايتتىم. انام ماعان «مىقتى بول» دەپ باتاسىن بەردى. قازاقستاندا سۋمو كۇرەسىن جۇرت جاقسى بىلە بەرمەيدى, سوندىقتان مەنى ءالى كوبى تانىمايدى. ويتكەنى ەلدە سۋمو كۇرەسى تەلەديداردان كورسەتىلمەيدى, تەك سۋمونى بىلەتىندەر ينتەرنەت ارقىلى كورەدى. ءبىزدىڭ ەلىمىز الەمگە كوبىنەسە دزيۋدو مەن بوكس ارقىلى تانىمال. قازىر قازاقستاندا جاپونياعا كەلىپ, سۋمو كۇرەسىمەن اينالىسقىسى كەلەتىن جاستاردىڭ قاتارى كوبەيىپ كەلەدى, – دەدى ول.
ەرسىن قازىر 25 جاستا, بويى 192 سم, سالماعى 174 كيلو. ول بۇعان دەيىن ەلىمىزدە دزيۋدو كۇرەسىمەن اينالىسقان.
«بۇل جىگىت ءبىز كۇتكەن بەلەستەن بيىك شىقتى. ول العاش سۋمو كۇرەسىنە قادام باسقان كەزدە كۋماموتو جەرىندەگى كينبوزان تاۋىن قاتتى ۇناتتى. سوندىقتان وعان كينبوزان دەپ لاقاپ ات قويدىق. ونىڭ ايقاستارداعى ۇمتىلىسى مىقتى, جەڭىسكە جەتۋ مۇمكىندىگى – قاشاندا 90 پايىز. ەندى چەمپيون اتانعانشا ءوزىنىڭ قارسىلاستارىمەن بەلدەسە بەرەدى. سۋمو جاۋىنگەرلىك كۇرەس بولعاندىقتان, جاسىماس جىگەر مەن قايتپاس قايرات قاجەت. كينبوزان ءوز وتانىنىڭ رۋحىن كوتەرىپ, ماقتانىشىنا اينالۋى كەرەك», دەيدى وتانداسىمىزدىڭ باپكەرى كيسە.
