– قازاقستان جەرىنە قوش كەلدىڭىزدەر! بۇگىن ۇلتتىق ۇلان باس قولباسشىلىعى ءوزارا كەلىسسوز الاڭى بولىپ وتىر. كەلىسسوزگە مەملەكەتتىك كۇزەت قىزمەتىنىڭ, قارۋلى كۇشتەردىڭ, ىشكى ىستەر مينيسترلىگىنىڭ, ۇلتتىق قاۋىپسىزدىك ورگاندارىنىڭ, «قازاقستان ينجينيرينگ» ۇلتتىق كومپانياسىنىڭ وكىلدەرى مەن ۇلتتىق ۇلاننىڭ باسشىلىق قۇرامى قاتىسىپ وتىر. قاتىسۋشىلار سىزدەردىڭ ۇسىنىستارىڭىزدى مۇقيات تىنداپ, مۇددەلى تاراپتاردىڭ وي-پىكىرلەرىن تىڭداۋعا دايىن, – دەدى كەلىسسوزدىڭ اشىلۋ بارىسىندا ىشكى ىستەر ءمينيسترىنىڭ ورىنباسارى – ۇلتتىق ۇلان باس قولباسشىسى گەنەرال-مايور ەركىن بوتاقانوۆ.
سەربتىك تاراپتان ءسوز العان «Yugoimport» كومپانياسى باس ديرەكتورىنىڭ ورىنباسارى پانتيك دانيەل الدىمەن وسى كەزدەسۋگە مۇمكىندىك بەرگەن ۇلتتىق ۇلان باسشىلىعىنا جانە قازاقستاندىق تاراپقا ءوز العىسىن ايتىپ, وزىمەن بىرگە كەلگەن دەلەگاتسيا قۇرامىمەن تانىستىردى. سودان كەيىن ءسوز العان ديرەكتوردىڭ كومەكشىسى سرادان نيكودجيۆيچ سەربيالىق قارۋ-جاراق زاۋىتتارى ونىمدەرىنىڭ تۇساۋكەسەرىن وتكىزدى. سونداي-اق قازاقستاندىق كۇش-قۇرىلىمدارمەن اراداعى بايلانىس پەن ىقپالداستىق كوكجيەكتەرى تۋرالى العىشارتتاردى تىلگە تيەك ەتتى. شارا بارىسىندا قازاقستاندىق اسكەريلەر تاراپىنان ساۋالدار قويىلىپ, كەزدەسۋ سۇراق-جاۋاپ فورماتىنا اۋىستى. وعان سەربيالىق دەلەگاتسيا مۇشەلەرى تۇششىمدى جاۋاپتار بەردى.
ۇلتتىق ۇلان باس قولباسشىسى گەنەرال-مايور ەركىن بوتاقانوۆ سەربيالىق قارۋ تۇرلەرىنە, پوليتسيا مەن جاندارمەرياعا ارنالعان اۆتوكولىكتەرگە جانە تىكۇشاقتارعا ارنالعان وقشاشارلارعا سۇرانىس بارىن جەتكىزىپ, قازاقستاندا قارۋدىڭ كەي تۇرلەرى مەن قۇرالدارىن شىعاراتىن ورتاق ءوندىرىس ورنىن اشۋ ماسەلەسىن كوتەردى. سەربيالىق تاراپ كەزدەسۋگە وڭ باعاسىن بەرە وتىرىپ, بۇگىنگى كەزدەسۋدەن كوپ ءۇمىت كۇتەتىنىن جەتكىزدى.
