1 ناۋرىزدا Qazaqstan ورتالىق كونتسەرت زالىنىڭ ساحناسىندا اتى اڭىزعا اينالعان «گۇلدەر» ءانسامبلىنىڭ جاڭا قۇرامىنىڭ تانىستىرىلىمى جانە العاشقى كونتسەرتى وتەدى. قر مادەنيەت جانە سپورت مينيسترلىگىنىڭ قولداۋىمەن ۇيىمداستىرىلاتىن شاراعا قازاق ەستراداسىنىڭ جۇلدىزدارى, جاس ورىنداۋشىلار جانە ۇجىمنىڭ بۇرىنعى مۇشەلەرى قاتىسادى.
بۇل كونتسەرت مينيسترلىكتىڭ 50 جىلدىق تاريحى بار ءانسامبلدى جانداندىرۋ جولىنداعى قاجىرلى ەڭبەگىنىڭ ناتيجەسى. جوبا وتكەن جىلدىڭ تامىز ايىندا باستالدى. الدىمەن «گۇلدەر» بي جانە اسپاپتىق توپتارىنا ونەرپازدار قابىلداندى. ىرىكتەۋ تۋرى شىعارماشىلىق وقۋ ورىندارىنىڭ تۇلەكتەرى اراسىندا وتكىزىلدى.
تالىمگەرلەردىڭ ءبىرى رەتىندە بالەتمەيستەر انۆارا سادىقوۆا شاقىرىلدى, ال جوبانىڭ كوركەمدىك جەتەكشىسى, ديريجەرى - سەرىك داۆلەتوۆ.
- «گۇلدەر» ءانسامبلىنىڭ شىعارماشىلىعىنا قازاقستاندىقتاردىڭ بىرنەشە بۋىنى ءتانتى بولىپ ءوستى, سوندىقتان وسىنداي تاعىلىمدى تاريحى مول ۇجىم تىڭداۋشىلاردى قۋانتۋدى جالعاستىرۋى وڭدى بولار ەدى. اسىرەسە, قازىرگى جاستارىمىز ۇجىمنىڭ رەپەرتۋارىنان رۋحاني قۋات الارى ءسوزسىز. العاشقى كۇندەرىنەن باستاپ تالانتتاردىڭ ناعىز ۇستاحاناسى بولعان انسامبل اتى اڭىزعا اينالعان ونداعان ورىنداۋشىنىڭ ۇلكەن ساحناعا شىعۋىنا جول اشتى. مۇنداي داڭقتى ءداستۇردى جاڭعىرتۋ كەرەك دەپ سانايمىن», – دەدى مادەنيەت جانە سپورت ءمينيسترى اسحات ورالوۆ.
ايتا كەتەيىك, «گۇلدەر» ءانسامبلى 1969 جىلى قۇرىلعان. ونىڭ قۇرامىندا ءار ۋاقىتتا روزا رىمباەۆا, ايجان نۇرماعامبەتوۆا, ماقپال ءجۇنىسوۆا, ناعيما ەسقاليەۆا, جەڭىس سەيدوللا ۇلى, باقتيار تايلاقباەۆ جانە باسقا دا كورنەكتى ورىنداۋشىلار ونەر كورسەتتى.
قايتادان جاڭارتىلعان ۇجىمنىڭ كونتسەرتتەرى قازاقستاننىڭ باسقا دا قالالارىندا وتەدى. سونداي-اق انسامبل شەتەلگە دە شىعارماشىلىق ساپارمەن شىعۋدى جوسپارلاپ وتىر.
