بۇل تۋرالى جەكە تۇلعالاردىڭ بانكروتتىعى تۋرالى وتكەن بريفينگتە ايتىلدى.
ورتالىق كوممۋنيكاتسيالار قىزمەتىندەگى بريفينگ بارىسىندا جۋرناليستەر بانكروتتىقتان كەيىنگى ماسەلەگە قاتىستى سۇراقتار قويدى.
قايرات مياتوۆ بانكروتتىقتان كەيىن جەكە تۇلعالارعا كرەديتتەر الۋعا شەكتەۋلەر, سونداي-اق بورىشكەردىڭ قارجىلىق جاعدايىنا مونيتورينگ جۇرگىزىلەتىنىن ايتتى.
«قارجىلىق مونيتورينگ زاڭسىز ىستەردىڭ الدىن الۋ ءۇشىن قاراستىرىلعان. ءۇش جىل ىشىندە سالىق ەسەپتەرىن قاداعالاي وتىرىپ, ءبىز بانكروتتىق كەزەڭىندە ءوز مۇلكىن نەسيە بەرۋشىلەردەن جاسىرعان جانە قارىزدارىن وتەمەگەن بورىشكەرلەردى انىقتايمىز. ەگەر مۇنداي فاكتىلەر انىقتالسا, بانكروتتىق ءراسىمى جويىلادى جانە بارلىق ءوندىرىپ الۋ شارالارى اعىمداعى تارتىپپەن قايتا باستالادى», دەدى مياتوۆ.
الايدا وزدەرىن بانكروت دەپ جاريالاعاننان كەيىن رەسمي جۇمىسقا ورنالاسقان ادامدار ءۇشىن ءتارتىپ باسقاشا بولادى.
«بانكروتتىقتان كەيىن زاڭدى تۇردە جۇمىسقا ورنالاسىپ, جالاقى الا باستاعان ادامدارعا كەلەتىن بولساق, ولارعا ەشقانداي شەكتەۋلەر مەن ايىپپۇلدار سالىنبايدى. ويتكەنى بىلىكتى مامان جوعارى جالاقى الۋعا تولىقتاي قۇقىلى», دەپ تۇيىندەدى ول.
