«اللاعا شۇكىر, قازاقستاندا تاريحي-مادەني ەسكەرتكىشتەر وتە كوپ. سونىڭ شوعىرى, شوقتىعى بيىگى وسى ۇلىتاۋ وبلىسىندا ورنالاسقان. جەزقازعان- ۇلىتاۋ ايماعىندا 687 تاريحي ەسكەرتكىش بار. تەرەكتى اۋليە ارحەولوگيالىق كەشەنى, الاشا حان, دومباۋىل, جوشى حان, بولعان انا, قۇلان انا, جانسەيىت كەسەنەلەرى, اقمەشىت اۋليە, قويلىباي اۋليە, ەدىگە, توقتامىس قورىمدارى, بايقوڭىر, زىڭعىرتاۋ, تامدى تاستاعى حان وردالارى – تاريحىمىزدان سىر شەرتەتىن كەرەمەت ەسكەرتكىشتەر. قازىر تاريحي ورىندارعا زيارات جاساۋشىلاردىڭ سانى كۇن ساناپ ارتىپ كەلەدى. وسى رەتتە ايتا كەتەر ءبىر ماسەلە بار. ارينە تاريحي كەسەنەلەردى زيارات جاساۋ مۇسىلمان ءۇشىن ساۋاپتى ىستەر قاتارىنا جاتادى. الايدا ونىڭ ادەبى مەن مادەنيەتى ساقتالا بەرمەيدى», دەپ كوپشىلىكتى سىناپ تاستادى.
سونىمەن قاتار ول وسىدان ەكى جىل بۇرىن «زيرات جانە زيارات مادەنيەتى» قۇجاتى قابىلدانعانىن ەسكە سالدى.
«قۇجاتتى قابىلداۋداعى ماقساتىمىز – قوعامدا زيرات كوتەرۋ مەن زيارات جاساۋ مادەنيەتىن قالىپتاستىرۋعا ۇلەس قوسۋ. قابىر باسىندا تۇنەۋگە, مايىتتەن پانا سۇراۋعا, ويناپ-كۇلۋگە, ازىلدەپ-قىلجاقتاۋعا, تاۋاپ ەتۋگە شاريعاتتا تىيىم سالىنادى. قابىردە جاتقان كىسىگە تابىنۋ – زيارات جاساۋدىڭ تۇپكى ماقساتىنا قايشى. وسى ماسەلەگە تاعى دا نازار اۋدارۋدى سۇرايمىز», دەپ قوستى باس ءمۇفتي ناۋرىزباي قاجى تاعان ۇلى.
