بالاباقشا قۇرىلىسىنا دايىندىق جۇمىستارى 2022 جىلى جۇرگىزىلدى. «ارسەلورميتتال تەمىرتاۋ» كومپانياسى جوبانى ازىرلەۋگە اسا مۇقيات قارادى.
- ءبىزدىڭ باستى ماقساتىمىز – بالالار قۋانا باراتىن جايلى بالاباقشا سالۋ. بالاباقشا بارلىق تالاپقا ساي كەلەتىن زاماناۋي بولادى. مەملەكەتتىك ساراپتاما جۇرگىزىلىپ بولدى, اتقاراتىن جۇمىس كولەمى ۇلكەن, - دەدى «ارسەلورميتتال تەمىرتاۋ» اق كورپوراتيۆتىك الەۋمەتتىك جاۋاپكەرشىلىك جونىندەگى ديرەكتورىنىڭ مىندەتىن اتقارۋشى گۇلنارا ستامقۇلوۆا.
قالا بيلىگى ناق وسى اۋداندا بالاباقشا وتە قاجەت دەپ سانايدى.
- الەۋمەتتىك مىندەتتەمەلەر اياسىندا ءبىزدىڭ قالا قۇراۋشى كاسىپورنىمىز – «ارسەلورميتتال تەمىرتاۋ» اق 285 ورىندىق جاڭا زاماناۋي بالاباقشا سالۋعا باستاماشى بولدى. جوبا شىنىمەن دە بىرەگەي, ول قالاداعى 2 جاستان 6 جاسقا دەيىنگى بالالاردىڭ 80 پايىزىنا دەيىن قامتۋعا مۇمكىندىك بەرەدى. ويتكەنى تەمىرتاۋدا قازىر 1,5 مىڭنان استام بالا كەزەكتە تۇر. بۇل جوبانى ىسكە اسىرۋ بىزگە ايتارلىقتاي قولداۋ بولادى. بولاشاق بالاباقشانىڭ جانىندا جاقىن ارادا 270 پاتەرلىك الەۋمەتتىك ۇيلەردى سالۋ جوباسى ىسكە اسىرىلماقشى, ال قالانىڭ وسى بولىگىندە بالاباقشا مۇلدەم جوق. وسى جوبانى ىسكە اسىرا وتىرىپ, پرەزيدەنتىمىزدىڭ ساياساتىن قولداعانى ءۇشىن قالا قۇراۋشى كاسىپورنىمىزعا ريزاشىلىعىمىزدى بىلدىرەمىز, - دەدى تەمىرتاۋ قالاسى اكىمىنىڭ الەۋمەتتىك ماسەلەلەر جونىندەگى ورىنباسارى سامات زياشەۆ.
كومپانيا جوبا قۇنىن ازىرگە جاريالاعان جوق. سەبەبى مەردىگەر ۇيىم ءالى انىقتالماعان. كومپانيا تارتۋ ەتەتىن جاڭا بالاباقشا تەمىرتاۋداعى 4ا مەكەنجايىندا بوي كوتەرەدى. ونىڭ قۇرىلىسى وسى جىلدىڭ ءساۋىر ايىندا باستالادى.
- جاڭا بالاباقشا 2024 جىلى جۇمىس ىستەي باستاۋى ءۇشىن ءبىز جوبانى ءبىر جىل ىشىندە اياقتاۋدى جوسپارلاپ وتىرمىز. قۇرامىندا جوبالاۋ-كونسترۋكتورلىق ءبولىم, قارجى جانە جابدىقتاۋ قىزمەتتەرى, كۇردەلى قۇرىلىس باسقارماسى, قاۋىپسىزدىك تەحنيكاسى قىزمەتى, جوعارى بۋىن باسشىلارى بار ءبىزدىڭ مىقتى كوماندامىز كوزدەگەن ماقساتقا جەتەتىنىنە سەنىمدىمىن, - دەدى گۇلنارا ستامقۇلوۆا.
بالاباقشا قۇرىلىسى اياقتالعاننان كەيىن ول قالانىڭ بالانسىنا بەرىلەدى.
