توتەنشە جاعدايلار ءمينيسترى يۋري يلين وڭتۇستىك ايماقتاردا بەلسەندى قار ەرۋ باستالۋىنا ساناۋلى كۇن قالعانىن ايتتى. سول سەبەپتى قازىر بارلىق كۇش-جىگەر الدىن الۋ شارالارى مەن سۋ تاسقىنىنا دايىندىققا باعىتتالعان.
جالپى وسى جىلدىڭ ەكى ايىندا 15 شاقىرىم ۋاقىتشا بوگەن سالىندى, 24 شاقىرىمعا جۋىعى جوندەلدى, 16 شاقىرىمنان استام جاڭا بوگەن, سونداي-اق ەلدى مەكەندەردىڭ اينالاسىندا 41 شاقىرىم بىلىك تۇرعىزىلدى. ودان بولەك 5 مىڭ شاقىرىمعا جۋىق كانالدار مەن ارىقتار, اۆتوموبيل جولدارى جانە تەمىرجولدار استىندا 8,5 مىڭنان استام سۋ وتكىزۋ قۇرىلىسى تازارتىلدى.
سۋ تاسقىنى جاعدايىنىڭ قولايسىز دامۋى كەزىندە سۋ باسۋ ايماعىندا 255 ەلدى مەكەن بولۋى مۇمكىن. وعان قوسا سۋ تاسقىنى توتەنشە جاعدايلارىنىڭ ىقتيمال جاعىمسىز سالدارىنىڭ الدىن الۋ جانە ولاردى ازايتۋ ماقساتىندا ازاماتتىق قورعاۋدىڭ مەملەكەتتىك جۇيەسىنىڭ وبلىستىق كىشى جۇيەلەرىنىڭ بولىمشەلەرى جوعارى دايىندىق رەجيمىنە اۋىستىرىلدى.
ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا كوكتەمگە ارنالعان جاڭارتىلعان دەرەكتەر تۋرالى, يندۋستريا جانە ينفراقۇرىلىمدىق دامۋ ءمينيسترى مارات قاراباەۆ جولداردى, كوپىرلەردى جانە سۋ وتكىزۋ قۇرىلىستارىن سۋدىڭ كوتەرىلۋىنە دايىنداۋ تۋرالى حاباردار ەتتى.
تۇركىستان وبلىسىنىڭ اكىمى دارحان ساتىبالدى, جامبىل وبلىسىنىڭ اكىمى نۇرجان نۇرجىگىتوۆ جانە باتىس قازاقستان وبلىسىنىڭ اكىمى ناريمان تورەعاليەۆ وڭىرلەردەگى قازىرگى احۋال مەن سۋ تاسقىنى كەزەڭىنە دايىندىق تۋرالى باياندادى.
بايانداماشىلاردىڭ ءسوزىن تىڭداي وتىرىپ, پرەمەر-مينيستر بيىل قاردىڭ كوپ بولۋىنا جانە جەر بەتىنىڭ قاتىپ قالۋىنا بايلانىستى سۋ تاسۋ قاۋپى جوعارى ەكەنىن ايتتى.
ۇكىمەت باسشىسىنىڭ ايتۋىنشا, بيىل ەلىمىزدىڭ وڭتۇستىك وڭىرلەرىندە كۇردەلى جاعداي قالىپتاسۋىنا سۋ بۇرۋ ارنالارىنىڭ, ارىقتاردىڭ, قورعانىش جەر ۇيىندىلەرىنىڭ بولماۋى سەبەپ بولعان. سالدارىنان تۇركىستان, جامبىل جانە الماتى وبلىستارىنداعى درەناجدىق جۇيەلەردىڭ جاۋىن-شاشىننىڭ كوپ مولشەرىنە قۋاتى جەتپەدى. ودان بولەك اتىراۋدا قار كۇرت ەرىپ, كوشەلەردى سۋ باسىپ قالدى.
ودان بولەك, پرەمەر-ءمينيستردىڭ ايتۋىنشا, كوممۋنالدىق, جەكە مەنشىك جانە يەسى جوق گيدروتەحنيكالىق قۇرىلىستاردى جوندەۋ جونىندەگى شارالار ازىرلەپ, سۋ قويمالارىن تولتىرۋ كولەمىن قايتا قاراۋ كەرەك جانە قاجەت بولسا, ولاردى الدىن الا قاۋىپسىز بوساتۋ جونىندە شارالار قابىلدانۋ كەرەك.
«قازىرگى تاڭدا بۇل ماسەلە بويىنشا رەسپۋبليكالىق دەڭگەيدە پرەمەر-ءمينيستردىڭ ءبىرىنشى ورىنباسارى جەتەكشىلىك ەتەتىن ۇكىمەتتىك كوميسسيا جۇمىس ىستەپ جاتىر. كوميسسيا جاعدايدى باقىلاۋدا ۇستاپ, سۋ تاسۋ جاعدايلارىندا جەدەل ارەكەت ەتۋگە دايىن بولۋى ءتيىس», دەپ تۇيىندەدى ءاليحان سمايىلوۆ.
