ايتكەنمەن ورتالىق ازيا ەلدەرىنىڭ سۇرانىسىن باعامداعان ماماندار, جونەلتىلگەن استىق كولەمىن ءالى دە از دەپ ەسەپتەيدى. وكىنىشتىسى, سارىاعاش شەكارالىق بەكەتى بۇدان ارتىق استىق وتكىزۋگە قابىلەتتى ەمەس. سوندىقتان داربازا-ماقتاارال جوباسىن قولعا الۋ جەدەلدەتىلىپ جاتقان كورىنەدى. سەبەبى اي سايىنعى جاڭادان جينالعان استىق تيەۋ كورسەتكىشى بۇگىندە 1 ميلليون توننادان اسىپ كەتىپ جاتىر.
2022 جىلدىڭ قازان ايىندا تيەلگەن 1 ميلليون توننا استىق 2021 جىلدىڭ سايكەس كەزەڭىمەن سالىستىرا قاراعاندا 26 پايىزعا كوپ. 2023 جىلدىڭ قاڭتارىندا جۇكتەلگەن استىق كولەمى قازان ايىمەن سالىستىرعاندا 22 پايىزعا ارتىق بولىپ شىقتى. وسىنى ەسكەرگەن استىق تيەۋشىلەر دابىل قاعىپ وتىر.
قازاق استىعى ءداستۇرلى تۇردە ەلىمىزدىڭ سولتۇستىك ايماقتارىنان ورتالىق ازيا ەلدەرى مەن قىتايعا جەتكىزىلەدى. اتاپ ايتقاندا, سوڭعى 4 ايدا استىق ەكسپورتى تۇرىكمەنستانعا – 56, اۋعانستانعا – 30, وزبەكستانعا – 8, تاجىكستانعا 10 پايىزعا وسكەن. ال قىتايعا جونەلتىلىپ جاتقان استىقتىڭ كولەمى ەكى ەسە ارتىپتى.
كوڭىلدەگى ءبىر كىدى – سوڭعى بەس جىلدا ەلىمىزگە رەسەيدەن تەمىرجول ارقىلى استىق اكەلۋ تىم ۇلعايعان. مىسالى, 2022 جىلى 100 مىڭ توننادان 1,5 ملن تونناعا دەيىنگى استىق رەسەيدەن كىرگىزىلگەن. وسىعان قاراپ قازاقستان اۋماعى ارقىلى ءۇشىنشى ەلدەرگە ودان ءارى ەكسپورتتاۋ ماقساتىندا رەسەي استىعىنىڭ سۇر يمپورتىنىڭ بار ەكەندىگى تۋرالى كۇدىك تۋىندايدى. بۇل ەندى – وكىلەتتى ورگاندار ەنشىسىندەگى ءىس.
استىقپەن قاتار تەمىرجول كولىكتەرىنە ۇن تيەۋ ءىسى دە قارقىن الىپ جاتىر. سوڭعى 4 ايدا 1,2 ملن توننا ۇن ورتالىق ازيا ەلدەرىنە ەكسپورتتالعان. بۇل جەتىستىك وتكەن جىلدىڭ سايكەس كەزەڭىمەن سالىستىرعاندا 19 پايىزعا دەيىن ءوسىپتى. مىسالى ۇن ەكسپورتى وزبەكستانعا – 39, اۋعانستانعا – 56, تۇرىكمەنستانعا 6 پايىزعا ارتقان.
«قازىر نەگىزگى سۇرانىسقا يە ەكسپورتتىق باعىت سارىاعاش ماتپ ارقىلى ورتالىق ازيا ەلدەرى بولىپ سانالادى. بۇگىندە ستانسا ءوزىنىڭ تەحنيكالىق مۇمكىندىكتەرىنىڭ شەگىندە جۇمىس ىستەۋدە. وتكىزۋ قابىلەتىن ارتتىرۋ ءۇشىن جانە سارىاعاش ارقىلى تاسىمالداۋعا سۇرانىستىڭ ارتۋىن ەسكەرە وتىرىپ, 2023 جىلى داربازا-ماقتاارال تارماعىنىڭ قۇرىلىسىن باستاۋ جوسپارلانىپ جاتىر», دەلىنگەن «قازاقستان تەمىر جولى» ۇك» اق ءباسپاسوز قىزمەتىنەن بىزگە كەلگەن اقپاراتتا.
سونىمەن قاتار وازيس شەكارالىق وتكەلدەرى ارقىلى وزبەكستانعا, سوناۋ جاڭاوزەندەگى بولاشاق ارقىلى تۇرىكمەنستانعا, ودان ءارى يرانعا وتەتىن باعىتتار ءالى كۇنگە ىسكە قوسىلماي تۇر. ول باعىتتىڭ ىسكە قوسىلماي تۇرعانى وكىنىش تۋدىرعانىمەن, بۇل تەمىرجول جەلىسى ۇنەمى پەرسپەكتيۆالى بولىپ قالا بەرەدى.
قازىرگى كۇندە قتج ورتالىق اپپاراتىندا جانە ەلدىڭ نەگىزگى استىق تيەۋ جانە استىق وڭدەۋ وڭىرلەرىندە تاۋلىك بويعى رەجىمدە جەدەل شتابتار جۇمىس ىستەيدى. ۆاگونداردى بەرۋ جانە جيناۋ ماسەلەلەرى بويىنشا اقپاراتتى جەدەل قابىلداۋ ءۇشىن چاتقا ەكسپورتتاۋشى كومپانيالاردىڭ 400-دەن استام وكىلى ەنگىزىلىپ, تىركەلگەن. جۇك جونەلتۋشىلەرگە ىڭعايلى بولۋ ءۇشىن تاۋار كاسسالارى تاۋلىك بويعى جۇمىس رەجىمىنە اۋىسقان.
