مينسكىدە ەۋرازيالىق ەكونوميكالىق وداقتىڭ كەلەشەگى مەن مۇمكىندىكتەرى تالقىلاندى

استانا. 23 ماۋسىم. مينسكىدەگى قازاقستان ەلشىلىگىندە ەۋرازيالىق ەكونوميكالىق وداقتىڭ بۇگىنى مەن كەلەشەگى تالقىلانعان عىلىمي-تاجىريبەلىك كونفەرەنتسيا ءوتتى. بۇل تۋرالى «24kz» حابارلادى. كونفەرەنتسياعا عىلىم مەن مادەنيەت قايراتكەرلەرى, ەكونوميكا ساراپشىلارى جانە ديپلوماتتار قاتىستى. جيىندا ەلىمىزدىڭ بەلارۋس مەملەكەتىندەگى توتەنشە جانە وكىلەتتى ەلشىسى ەرعالي بولەگەنوۆ: «ەۋرازيالىق ەكونوميكالىق وداقتىڭ بەكەرگە قۇرىلماعانىن, ەلدىڭ پايداسىن كوزدەيتىنىن وعان مۇشە مەملەكەتتەردىڭ وكىلدەرى ءالى-اق شىنايى سەزىنەتىن بولادى», – دەدى. ال ءوز كەزەگىندە ەۋرازيالىق ەكونوميكالىق كوميسسيانىڭ باسەكەلەستىك جانە مونوپولياعا قارسى رەتتەۋ جونىندەگى ءمينيسترى نۇرلان الدابەرگەنوۆ: «وتكەن جىلى رەسەي مەن بەلارۋس اراسىندا ەلەكتروندىق ساۋدا شەكاراسى اشىلدى, ونىڭ ناتيجەلەرى جامان ەمەس. بۇل ۇدەرىسكە قازاقستان 2014 جىلى قوسىلدى. سول ءۇشىن دە بىزگە ەلەكتروندىق ساۋدا قىزمەتى شارتتارىن تەڭەستىرۋ قاجەت», – دەدى. كونفەرەنتسياعا ارنايى قاتىسقان قىتايدىڭ بەلارۋس ەلىندەگى توتەنشە جانە وكىلەتتى ەلشىسى تسۋي تسيمين دە ءوز پىكىرىن ورتاعا سالدى. ونىڭ ايتۋىنشا, قىتاي ەۋرازيالىق ەكونوميكالىق وداقپەن قارىم-قاتىناسقا تۇسۋدەن ۇلكەن ءۇمىت كۇتەدى. تاياۋدا قىتاي مەن ەۋرازيالىق ەكونوميكالىق وداققا مۇشە-مەملەكەتتەر اراسىندا ىنتىماقتاستىق جونىندە قادام جاسالۋى مۇمكىن. بۇدان بولەك, باسقوسۋدا ەۋرازيالىق ەكونوميكالىق وداق اياسىندا ەركىن ساۋدا اينالىمىنىڭ ارتۋىنا, ەكونوميكا مەن باسەكەلەستىكتىڭ دامۋىنا قول جەتكىزىلەتىنى ءسوز بولدى. جولدىباي بازار. دەرەككوز: «24kz». فوتو: remarka.kz.