جۇزدەسۋ اياسىندا سەرىكتەستىك قىزمەتكەرلەرىنە الداعى ناۋقاننىڭ ماڭىزدىلىعى مەن پارتيانىڭ سايلاۋالدى باعدارلاماسى كەڭىنەن ءتۇسىندىرىلدى. ايماقتاعى وتكىر ماسەلەلەر كوتەرىلىپ, شەشۋ جولدارى پىسىقتالدى. اتىراۋ وبلىسى – ەلىمىزدە ەكولوگيا جاعدايى ناشار وڭىرلەردىڭ ءبىرى. كولىك سانىنىڭ ارتۋىنا بايلانىستى اۋانىڭ لاستانۋ دەڭگەيى دە جوعارى. وڭىردە قۇرعاقشىلىق ماسەلەسى دە جىلدان-جىلعا كۇردەلەنىپ كەلەدى.
ءماجىلىس دەپۋتاتتىعىنا كانديدات مارال كوشەنوۆ پارتيانىڭ ماقساتتارىن ءتۇسىندىرىپ, ۇجىم تاراپىنان تۇسكەن ۇسىنىستاردى الداعى ارەكەت ەتۋ جوسپارىنا قوستى. «West DALA» جشس باس ديرەكتورى قايرات سالاحادەنوۆ تە كاسپي تەڭىزىنىڭ تارتىلۋ جايىندا سۇراقتارىنا جاۋاپ الدى. سونىمەن قاتار شاھارداعى جەلدى كۇندەرى بولاتىن شاڭعا قاتىستى «بايتاق» پارتياسىنىڭ پىكىرىن ءبىلدى.
بۇعان دەيىن «بايتاق» جاسىلدار پارتياسى «تازا ءومىر» اتتى ءبىر اپتالىق ەكولوگيالىق مارافونىن باستاعان بولاتىن. ءىس-شاراعا اۋاسى لاستانعان قالالاردىڭ تۇرعىندارى, ەكوبەلسەندىلەر مەن پارتيا جاقتاستارى قاتىسىپ جاتىر. اكتسيا ونەركاسىپتىك كاسىپورىنداردان اتموسفەرالىق اۋانى لاستاۋشى زاتتاردىڭ شىعارىلۋىن ازايتۋدى ماقسات ەتىپ وتىر. سەبەبى ءىرى ونەركاسىپتىك قالالاردا تۇراتىن ادامدار دەنساۋلىققا اسەر ەتەتىن زياندى جانە ۋلى زاتتارعا تولى اۋامەن تىنىس الۋعا ءماجبۇر. ء«بىز جەكە سەكتوردىڭ كومىر وتىنىنان تابيعي گازعا كوشۋىن جانە جاڭارتىلاتىن ەنەرگيا كوزدەرىن پايدالانۋدى كوزدەيمىز», دەيدى پارتيا باسشىلىعى.
پارتيادان پارلامەنت ءماجىلىس دەپۋتاتتىعىنا ءتىزىم بويىنشا 18 كانديدات ۇسىنىلعانىن اتاپ وتكەن ءجون. ولاردىڭ قاتارىندا ايەلدەر كۆوتاسى بويىنشا – 4, جاستار كۆوتاسىمەن – 1 جانە مۇگەدەكتىگى بويىنشا 1 ۇمىتكەر بار. تاعى ءتورت ۇمىتكەر ماجوريتارلىق جۇيە بويىنشا سايلاۋعا قاتىسادى. ال جەرگىلىكتى ماسليحاتتارعا 160 كانديدات تىركەلگەن. ەستەرىڭىزگە سالساق, «بايتاق» جاسىلدار پارتياسى 2022 جىلدىڭ سوڭىندا ەكولوگيالىق تۇراقتى قوعام قۇرۋ, حالىقتىق دەموكراتيا جانە ەكولوگياعا ۇقىپتى قاراۋ قاعيداتتارىن قولداۋ ماقساتىندا قۇرىلعان.
