ساپار بارىسىندا رەسپۋبليكالىقتار وبلىستاعى بىرقاتار ەلدى مەكەن مەن تالدىقورعان قالاسىندا بولدى. فورۋم جۇمىسىنا پارتيا توراعاسى, پارلامەنت ءماجىلىسىنىڭ دەپۋتاتتىعىنا كانديدات ايداربەك قوجانازاروۆ جانە تەڭ توراعاسى سىرىمبەك تاۋ, پارلامەنت ءماجىلىسى دەپۋتاتتىعىنا كانديداتتار ولجاس قۇسپەكوۆ, قىرمىزى جاندوسوۆا, باقىتبەك حاميت, ەكاتەرينا سمولياكوۆا, دينارا ناۋموۆا جانە ولجاس بولاتبەك ۇلى قاتىستى. جيىندا پارتيا مۇشەلەرى, جەرگىلىكتى كاسىپورىنداردىڭ جۇمىسشىلارى, ازاماتتار مەن قوعام بەلسەندىلەرى ەلىمىزدىڭ دامۋى مەن وركەندەۋىنە قاتىستى وي-پىكىرلەرىن ورتاعا سالدى, ۇسىنىستارىن دا جەتكىزدى.
– ءبىز مەملەكەتتىك قىزمەتتە جۇمىس ىستەگەن جوقپىز, تەندەرلەرگە قاتىسپادىق, بىراق مىڭداعان ادامدى جۇمىسپەن قامتاماسىز ەتىپ, حالقىمىزدىڭ يگىلىگى ءۇشىن ەڭبەك ەتتىك. ەندى قاراپايىم ازاماتتاردىڭ لايىقتى ءومىر ءسۇرۋ دەڭگەيىمەن قامتاماسىز ەتۋ ءۇشىن حالىقتىڭ مۇددەسىن قورعاۋعا, ادىلدىك ءۇشىن كۇرەسۋگە دايىنبىز. ءبىزدىڭ باستى بايلىعىمىز – قازاقستاننىڭ ساۋاتتى, تاۋەلسىز جانە قايسار حالقى, – دەدى پارتيا جەتەكشىسى ايداربەك قوجانازاروۆ.
«جاقتاستار» فورۋمىندا سويلەگەن سوزىندە «Respublica» پارتياسىنىڭ تەڭ توراعاسى, ءماجىلىس دەپۋتاتتىعىنا كانديدات دينارا شۇكىجانوۆا پارتيا اتىنان جاستارعا ۇندەۋ تاستادى.
– ءبىز ەلدەگى جاستاردىڭ دامۋ بولاشاعى جارقىن بولعانىن قالايمىز. ولار ەلىمىزدى كوركەيتۋ ءۇشىن ەلگە قىزمەت ەتۋگە ءتيىس. جاستار – ەلىمىزدىڭ بولاشاعى. قازىر ارالارىڭدا قىزدار دا كوپ. ءوزىم ءىرى ماشينا جاساۋ كاسىپورنىن باسقارامىن جانە مەن بيلىكتە ايەلدەردىڭ بارىنشا كوپ بولعانىن قولدايمىن, – دەدى د.شۇكىجانوۆا.
ءوز كەزەگىندە ءماجىلىس دەپۋتاتتىعىنا كانديدات قىرمىزى جاندوسوۆا بۇقارالىق سپورتتى دامىتۋ قاجەتتىگىن ايتتى. سوندىقتان قازىرگى ۋاقىتتا ونىڭ جۇيەلىلىگىن قامتاماسىز ەتۋ قاجەت, قارجىلاندىرۋ قالالار مەن اۋىلداردا بىردەي بولۋى كەرەك. «سپورتتىق نىساندار كوپ ءارى بارلىعىنا قولجەتىمدى بولۋى ماڭىزدى. سوندا عانا بۇقارالىق سپورتتىڭ دامۋىنان ناتيجە كۇتۋگە بولادى», دەپ اتاپ ءوتتى ق.جاندوسوۆا.
