ارينە, بۇل جەڭىس قازاقستان حالقى, سپورت جانكۇيەرلەرى ءۇشىن ءىرى جەتىستىك بولعانىمەن, حالىقارالىق ارەناداعى جەتىستىكتەرمەن سالىستىرعاندا, قاتارداعى جەڭىستەردىڭ ءبىرى ەكەنى بەلگىلى. ويتكەنى ءبىر عانا جەڭىل اتلەتيكا سپورتىنان الەم چەمپيوناتىندا 49 جۇلدە جيىنتىعى ساراپقا سالىناتىنىن ەسكەرسەك, نورانىڭ جەڭىسى 49 جەڭىستىڭ تەك بىرەۋى عانا. ياعني, ودان بولەك, تاعى دا بىرنەشە سپورتشى الەم چەمپيوناتىنىڭ باس جۇلدەسىن ولجالايدى. كاسىپقوي بوكستا دا ءدال سولاي. ول جاقتا, ءتىپتى اي سايىن سۋ جاڭا چەمپيون شىعىپ جاتادى. بىراق التىن بەلبەۋدى وزىندە ۇزاق ۋاقىت ساقتاپ تۇراتىنداردىڭ قاتارى ساۋساقپەن سانارلىق.
ال الەمدەگى ەليتالى سپورتتىڭ بىرىنە جاتاتىن تەننيس تۋرنيرلەرىندە توپ جارعان سپورتشىلاردىڭ مارتەبەسى الەم جانكۇيەرلەرى الدىندا قاشاندا بيىك تۇرادى. بىلتىر ۇلىبريتانياداعى «ۋيمبلدون» جارىسىندا توپ جارىپ, بيىلعى اۋستراليا اشىق چەمپيوناتىنىڭ فينالىنا دەيىن جەتكەن داڭقتى تەننيسشىمىز ەلەنا رىباكينا بۇل جەتىستىگىمەن قازاقستاندى دۇنيە جۇزىنە تانىتىپ قانا قويماي, ەل تەننيسىنە ۇلكەن سەرپىلىس اكەلدى. وتانداسىمىزدىڭ جەڭىسىن الەم باسىلىمدارى جارىسا جازدى. ويتكەنى ول – ورتالىق ازيا ەلدەرىنەن شىققان العاشقى چەمپيون. 23 جاستاعى تەننيسشىمىزدىڭ ايتۋلى جەڭىسى حالىقارالىق ارەنادا ەلەۋسىز قالماۋعا ءتيىس ەدى.
تاياۋدا 20 جىلدان اسا تاريحى بار الەمدەگى ەڭ مارتەبەلى بايقاۋلاردىڭ ءبىرى «Laureus World Sports» ەلەنا رىباكينانى «جىل سەرپىلىسى» اتالىمى بويىنشا ۇمىتكەر سپورتشىلاردىڭ تىزىمىنە قوستى. بۇل ماراپات سپورت الەمىندە ءبىر جىل بەدەرىندە ماڭىزدى جەڭىسكە قول جەتكىزگەن سپورتشىلارعا بەرىلەدى. اتالعان ۇيىم 1999 جىلدان بەرى جىل ۇزدىكتەرىن ماراپاتتاپ كەلەدى.
جەڭىمپازداردى انىقتاۋ ەكى كەزەڭنەن تۇرادى. ءبىرىنشى كەزەڭدە 80-گە جۋىق ەلدىڭ بەدەلدى سپورت رەداكتورلارى, جۋرناليستەرى جانە كوممەنتاتورلارى «Laureus World Sports» ۇسىنعان ۇمىتكەرلەرگە داۋىس بەرىپ, ءار اتالىم بويىنشا ەكىنشى كەزەڭگە جولداما العان سپورتشىلاردى ىرىكتەپ بەرەدى. سودان كەيىن «Laureus World Sports» اكادەمياسىنىڭ مۇشەلەرى جاسىرىن داۋىس بەرۋ ارقىلى جەڭىمپازداردى تاڭدايدى. ءاربىر جەڭىمپاز «Cartier» زەرگەرلىك ءۇيى ۇسىنعان «Laureus» مۇسىنىنە يە بولادى.
بيىلعى «جىل سەرپىلىسى» اتالىمىنا تەننيستەن قازاقستان ايەلدەر قۇراماسىنىڭ كوشباسشىسى, الەمنىڭ 10-راكەتكاسى ەلەنا رىباكينادان بولەك, تەننيستەن بىلتىرعى اقش اشىق چەمپيوناتىنىڭ جەڭىمپازى, الەمدىك رەيتينگتى ءبىرىنشى ورىنمەن اياقتاعان 19 جاستاعى يسپانيالىق كارلوس الكاراس, قاتارداعى فۋتبولدان الەم چەمپيوناتىندا سەنساتسيا جاساپ, جارتىلاي فينالعا دەيىن جەتكەن ماروككو ۇلتتىق قۇراماسى, مانەرلەپ سىرعاناۋدان وليمپيا ويىندارىنىڭ جەڭىمپازى مەن جۇلدەگەرى, الەم بىرىنشىلىگىنىڭ ءۇش دۇركىن چەمپيونى 23 جاستاعى امەريكالىق نەيتان چەن, 25 جاستاعى نيگەريالىق ايگىلى جەلاياق, بىرنەشە الەمدىك رەكوردتىڭ يەسى توبي امۋسان جانە گولف سپورتىنان 2022 جىلعى ماستەرس ءتۋرنيرىنىڭ جەڭىمپازى, الەمدىك رەيتينگتىڭ كوشباسشىسى, تاعى ءبىر امەريكالىق سپورتشى, سكوتتي شەففلەر بار.
سونداي-اق «جىل سپورتشىسى» اتاعىنان فۋتبولدان 2022 جىلعى الەم چەمپيونى ليونەل مەسسي (ارگەنتينا), «التىن بۋتسى» يەگەرى كيليان مباپپە (فرانتسيا), «ۇلكەن دۋلىعا» ساناتىنداعى تۋرنيرلەردە 22 مارتە ۇزدىك شىققان رافاەل نادال (يسپانيا), فورمۋلا-1 جارىسى بويىنشا الەم چەمپيونى ماكس فەرستاپپەن (بەلگيا), سىرىقپەن سەكىرۋ بويىنشا ءۇش مارتە الەم رەكوردىن ورناتقان موندو ديۋپلانتيس (شۆەتسيا) جانە ۇلتتىق باسكەتبول ليگاسىنداعى (ۇبل) «گولدەن ستەيت ۋورريورز» كومانداسىنا سەگىز جىلدا ءتورت مارتە چەمپيوندىق اتاقتى سىيلاعان ستەف كارري (اقش) ۇمىتكەر.
«جىلدىڭ ەڭ ۇزدىك ايەل سپورتشىسىنان» ۇمىتكەرلەر: 100 مەترگە جۇگىرۋدەن بەس دۇركىن الەم چەمپيونى شەللي-ەنن فرەيزەر-پرايس (يامايكا), 400 مەترگە كەدەرگىلەر ارقىلى جۇگىرۋدەن وليمپيادا چەمپيونى جانە بىرنەشە رەكوردتىڭ يەسى سيدني ماكلافلين-لەۆرون (اقش), جۇزۋدەن 2022 جىلعى الەم چەمپيوناتىندا ءتورت التىن الىپ, باس جۇلدەلەر سانى بويىنشا رەكورد ورناتقان (22 التىن) كەتي لەدەكي (اقش), ايەلدەر اراسىنداعى «التىن دوپ» يەگەرى الەكسيا پۋتەللاس (يسپانيا), تاۋ شاڭعىسى جارىسىنان الەم كۋبوگىنىڭ جەڭىمپازى ميكاەلا شيففرين (اقش) جانە تەننيستەن الەمنىڭ ءبىرىنشى راكەتكاسى يگا سۆەنتەك (پولشا).
«جىل كومانداسىنان» ۇمىتكەرلەر: فۋتبولدان ءۇش دۇركىن الەم چەمپيونى (1978, 1986 جانە 2022 جىلدارى) ارگەنتينا قۇراماسى, چەمپيوندار ليگاسىندا 14 مارتە (رەكورد كورسەتكىش) توپ جارعان «رەال» كلۋبى, ۇلتتىق باسكەتبول ليگاسىنىڭ ءتورت دۇركىن جەڭىمپازى «گولدەن ستەيت ۋورريورز», فورمۋلا-1 جارىسىنىڭ جەڭىمپازى «Mercedes», رەگبيدەن فرانتسيا جانە فۋتبولدان ايەلدەر اراسىنداعى ەۋروپا چەمپيونى انگليا قۇرامالارى.
«مۇمكىندىگى شەكتەۋلى جىل سپورتشىسىنان» ۇمىتكەرلەر: ارباداعى تەننيستەن «ۇلكەن دۋلىعا» ساناتىنداعى جارىستىڭ 9 دۇركىن چەمپيونى ديەدە دە گرووت (نيدەرلاند), پارا جەڭىل اتلەتيكادان 100, 200, 400 جانە 800 مەترگە جۇگىرۋدە الەم رەكوردىنىڭ يەگەرى كەترين دەبرۋننەر (شۆەيتساريا), جۇزۋدەن الەم چەمپيونى كەمەرون لەسلي (جاڭا زەلانديا), پارا حوككەيدەن وليمپيادا چەمپيونى دەكلان فارمەر (اقش), گيگانت سلالومنان بەيجىڭ پاراليمپياداسىنىڭ ءتورت دۇركىن چەمپيونى يەسپەر سالتۆيك پەدەرسەن (نورۆەگيا) جانە پارا بياتلوننان وليمپيادا جەڭىمپازى وكسانا ماستەرس (اقش).
«جىل ورالۋىنان» ۇمىتكەرلەر: جول اپاتىنا ۇشىراپ, 14 ايدان كەيىن قايتادان ۇلكەن سپورتقا ورالعان امەريكالىق داڭقتى كاسىپقوي گولف ويىنشىسى تايگەر ۆۋد, جاراقاتىنا بايلانىستى ەكى جىل سپورتتان قول ءۇزىپ, بىلتىر «گولدەن ستەيت ۋورريورز» كلۋبىمەن ۇبل-نىڭ جەڭىمپازى اتانعان باسكەتبولشى كلەي تومپسون, نورۆەگيالىق جەلاياق ياكوب ينگەبريگتسەن, موتوسپورتتان جىگەرلى جەڭىسكە جەتكەن فرانچەسكو بانيايا, دەرتىمەن كۇرەسە ءجۇرىپ, ايەلدەر اراسىنداعى «تۋر دە فرانس» دوداسىندا دارا شىققان نيدەرلاند ۆەلوشاباندوزى اننەميەك ۆان ۆلەۋتەن. سونداي-اق 2020 جىلعى فۋتبولدان ەۋروپا چەمپيوناتىنداعى ماتچتا ەسىنەن تانىپ, جۇرەگى ءبىر ساتكە توقتاپ قالعان دانيالىق كريستيان ەريكسەن 2022 جىلى جاسىل الاڭعا قايتا ورالعان-دى.
