«بايتاق» جاسىلدار پارتياسىنىڭ وڭىرلىك شتابى تۇركىستان وبلىسىنىڭ سايرام جانە شىمكەنت قالالارىندا سايرام – شىمكەنت – تۇركىستان باعىتىمەن اۆتوبۋس تۋرىن باستادى. اتالعان ءىس-شاراعا تۇركىستان وبلىسى مەن شىمكەنت قالاسى شتابىنىڭ مۇشەلەرى, تۇركىستان وبلىسى مەن شىمكەنت قالاسىنان ماسليحاتقا كانديداتتار رەتىندە تىركەلگەن ازاماتتار قاتىستى. اكتسيا ءىرى قالالار مەن وڭىرلەردىڭ ەكولوگيالىق ماسەلەلەرىنە, اۋانىڭ, سۋ قويمالارىنىڭ جانە لاندشافتتىڭ لاستانۋىنىڭ جوعارى دەڭگەيىنە نازار اۋدارۋعا باعىتتالعان. ماقساتى – تازا قورشاعان ورتانى قورعاۋعا, تابيعاتقا ۇقىپتى قاراۋعا, تازا ەنەرگيا مەن ونەركاسىپ قۇرۋعا جانە ادامداردىڭ دەنساۋلىعىن ساقتاۋعا شاقىرۋ. تۋر بارىسىندا اكتسياعا قاتىسۋشىلار جەرگىلىكتى تۇرعىنداردىڭ ۇسىنىستارى مەن شاعىمدارىن تىڭدادى.
بۇدان بولەك, «بايتاق» جاسىلدار پارتياسى «تازا ءومىر» اتتى ءبىر اپتالىق ەكولوگيالىق مارافونىن باستادى. ءىس-شاراعا اۋاسى جوعارى لاستانعان قالالاردىڭ تۇرعىندارى, ەكوبەلسەندىلەر مەن پارتيا جاقتاستارى قاتىستى. مارافون قاتىسۋشىلارى گازتۇمشا كيىپ الىپ, استانا, الماتى جانە تەمىرتاۋ ساياباقتارى ارقىلى جۇگىردى. اكتسيا ونەركاسىپتىك كاسىپورىنداردان اتموسفەرالىق اۋانى لاستاۋشى زاتتاردىڭ شىعارىلۋىن ازايتۋدى ماقسات ەتىپ وتىر. سەبەبى ءىرى ونەركاسىپتىك قالالاردا تۇراتىن ادامدار دەنساۋلىققا اسەر ەتەتىن زياندى جانە ۋلى زاتتارعا تولى اۋامەن تىنىس الۋعا ءماجبۇر.
– ءبىز جەكە سەكتوردىڭ كومىر وتىنىنان تابيعي گازعا كوشۋىن جانە جاڭارتىلاتىن ەنەرگيا كوزدەرىن پايدالانۋدى كوزدەيمىز. بۇگىن ءبىز قوعامىمىزدى تۇنشىقتىرىپ جاتقان ماسەلەلەردى حالىققا جەتكىزۋ ءۇشىن گازتۇمشامىزدى شەشتىك. بۇل اكتسيا – تازا تىنىس الۋ, تازا سايلاۋ جانە تازا ساياسات ءۇمىتىنىڭ سيمۆولى. لاس اۋادان زارداپ شەگەتىن بارلىق ايماقتى مارافونىمىزعا قاتىسۋعا شاقىرامىز, – دەدى «بايتاق» جاسىلدار پارتياسىنىڭ كوشباسشىسى ازاماتحان ءامىرتاي.
الماتىداعى تۇڭعىش پرەزيدەنت ساياباعىندا ەستافەتانى پارتيالىق ءتىزىم بويىنشا ءماجىلىس دەپۋتاتتىعىنا كانديدات ارمان قاشقىنبەكوۆ پەن الماتى قالالىق شتابىنىڭ مۇشەلەرى قابىلدادى.
