«Respublica» باسشىلارى مەن ءماجىلىس دەپۋتاتتىعىنا كانديداتتار جانە باسقا دا پارتيا مۇشەلەرى قاتىسقان القالى جيىن ءوتتى. جيىنعا بارلىق ايماقتىق شتابتاردىڭ باسشىلارى مەن قىزمەتكەرلەرى بەينەبايلانىس ارقىلى قوسىلدى. پارتيا توراعاسى ايداربەك قوجانازاروۆ قاتىسۋشىلارعا ساتتىلىك تىلەدى.
– كوپتەن كۇتكەن ءسات تە كەلىپ جەتتى. سايلاۋدىڭ ۇگىت-ناسيحات ناۋقانى باستالدى. ەندى ءبىز بارلىق كۇشىمىزدى جۇمىلدىرىپ, ساپالى جۇمىس ىستەيمىز. بارلىعىڭىزدىڭ قانشالىقتى ۇزاق جانە اۋىر جۇمىس ىستەگەندەرىڭىزدى بىلەمىن. قاتەلىكتەر دە بولدى, جەڭىستەرىمىز دە از ەمەس. ەڭ باستىسى, ءبىز پارتيانى قۇرعان كۇننەن باستاپ, وسى ماڭىزدى كەزەڭگە ابىرويمەن جەتتىك. بۇگىننەن باستاپ رەسپۋبليكالىق, وبلىستىق شتابتاردىڭ ەسىگى ءار ازاماتقا ايقارا اشىق. ءبىز حالىقتى وزىمىزگە داۋىس بەرۋگە شاقىرا باستادىق. بۇگىننەن باستاپ رەسمي سايتىمىزدا جاريالانعان سايلاۋالدى باعدارلامامىزبەن تانىسىپ, نەنى جاقتايتىنىمىزدى, قانداي يدەيالاردى ناسيحاتتاپ, قوعامدىق تالقىلاۋعا قانداي باستامانى شىعارعىمىز كەلەتىنىن بىلە الاسىزدار, – دەدى پارتيا ليدەرى.
جيىننان سوڭ پارتيا ليدەرى ايداربەك قوجانازاروۆ, تەڭ توراعا سىرىمبەك تاۋ جانە باسقا دا جەتەكشىلەر العاشقى ۇگىت-ناسيحات پلاكاتتارىن ءىلۋ ءۇشىن ەلىمىزدىڭ ءار قالاسىنداعى كوشەلەرگە شىقتى. وسىلايشا, ۇگىت-ناسيحات توبى ەلىمىزدىڭ بارلىق ايماعىندا ىسكە قوسىلدى. قىزمەتكەرلەر مەن ەرىكتىلەر باننەرلەر ءىلىپ, پلاكاتتار جاپسىرىپ, ازاماتتارعا ۇگىت پاراقشالارىن تاراتۋدى باستاپ كەتتى.
«Respublica» – مەملەكەت قىزمەتىنىڭ ءتۇرلى سالالارىن قالپىنا كەلتىرۋگە ۇمتىلاتىن بەلسەندى ازاماتتاردى بىرىكتىرگەن پارتيا ەكەنىن مالىمدەگەن بولاتىن. وعان كاسىپكەرلەر مەن قوعام قايراتكەرلەرى تارتىلعان. «باستى ماقساتىمىز – ءاربىر ازامات ساياسي, الەۋمەتتىك جانە ەكونوميكالىق وزگەرىستەرگە ءوزىنىڭ اتسالىسىپ جاتقانىن سەزىنۋى ءۇشىن ەل ساياساتىنا ىقپال ەتۋ تەتىكتەرىن جاساۋ. ۇرانىمىز – «جاڭا ادامدار – جاڭا قادامدار» دەيدى پارتيا وكىلدەرى. پارتيانىڭ قۇرىلعانى تۋرالى 2022 جىلدىڭ تامىزىندا جاريالانعان بولاتىن. 2023 جىلدىڭ 18 قاڭتارىندا «Respublica» پارتياسى تىركەۋ قۇجاتتارىن قابىلدادى.
