القالى جيىندا كوتەرىلگەن باستى ماسەلەنىڭ ءبىرى 2023 جىلعى ماۋسىمداعى Olimpbet-چەمپيونات, Olimpbet-كۋبوك, Olimpbet-سۋپەركۋبوگىنىڭ جارىس ەرەجەلەرى مەن كۇنتىزبەلەرىن بەكىتۋ بولدى. سونىمەن قاتار وتىرىستا پرەمەر-ليگا كلۋبتارى اراسىندا فۋتبولدان Olimpbet-قازاقستان چەمپيوناتىنىڭ قاتىسۋشىلار قۇرامى ناقتىلانىپ, بالالار-جاسوسپىرىمدەر, بۇقارالىق فۋتبولدان ۇيىمداستىرىلاتىن جارىستاردىڭ دا ەرەجەلەرى بەكىتىلدى. سونداي-اق جيىندا قازاق فۋتبولىنىڭ دامۋىنا قارسى ارەكەت دەۋگە ابدەن بولاتىن تاعى ءبىر ەرەجە قابىلداندى.
اتقارۋشى كوميتەتتىڭ وتىرىسىندا قابىلدانعان جاڭا ەرەجەگە سايكەس پرەمەر-ليگادا دوپ تەبەتىن كوماندالار بۇدان بىلاي الاڭعا بۇرىنعىداي ءبىر ۋاقىتتا التى لەگيونەر ەمەس, جەتى لەگيونەردى شىعارا الادى. وعان تاعى لەگيونەرلەر ساناتىنا جاتپايتىن, قازاقستان فۋتبولشىلارىمەن تەڭەستىرىلگەن ەۋرازيالىق ەكونوميكالىق وداققا مۇشە مەملەكەتتەردىڭ (بەلارۋس, رەسەي, قىرعىزستان, ارمەنيا) فۋتبولشىلارىن قوسىڭىز. ءوزى جاسىل الاڭدا ءبىر كوماندادان بار-جوعى 11 فۋتبولشى وينايدى. ونىڭ جەتەۋى لەگيونەر بولسا, قالعان ءتورت ورىنعا جەرگىلىكتى فۋتبولشىلار شىعا ما, الدە ەۋرازيالىق ەكونوميكالىق وداققا مۇشە ەلدەردىڭ ويىنشىلارىنا مۇمكىندىك بەرىلە مە؟
قازاقستان فۋتبول فەدەراتسياسى مەن قازاقستان كاسىپقوي فۋتبول ليگاسى باسشىلارىنىڭ بىرلەسە قابىلداعان بۇل شەشىمى تۇرالاپ قالعان قازاق فۋتبولىن ودان ءارى تۇڭعيىققا باتىرۋى مۇمكىن. سەبەبى جەرگىلىكتى فۋتبولشىلاردى اياقتان شالاتىن جاڭا ەرەجە پرەمەر-ليگادا دوپ تەبەتىن قاراكوزدەرىمىزدىڭ قاتارىن ازايتىپ قانا قويماي, دەڭگەيىنىڭ تومەندەۋىنە, ءتىپتى ويىن تاجىريبەسىنسىز قالۋىنا اكەلىپ سوقتىرايىن دەپ تۇر. جەرگىلىكتى فۋتبولشىلاردا جەتكىلىكتى دەڭگەيدە ويىن تاجىريبەسى بولماعان سوڭ, ونسىز دا ءبىر ويىندا جەڭىپ, قاتارىنان ءتورت ماتچتا جەڭىلەتىن ۇلتتىق قۇرامادا قايبىر جەتىسكەن ناتيجە بولسىن.
وقىرماندار مەن جانكۇيەرلەر قازاقستان فۋتبولىنداعى باسشىلار بۇل ماسەلەنى جەرگىلىكتى فۋتبولشىلار اراسىنداعى باسەكەلەستىكتى ارتتىرۋ ماقساتىندا ىستەپ جاتقان شىعار دەپ ويلاۋى مۇمكىن. بالكىم, سولاي دا شىعار, بىراق ءدال قازىرگى جاعدايدا قازاق فۋتبولشىلارى ىشكى باسەكەلەستىككە دايىن ەمەس ەكەنىن ەسكەرگەن ءجون. ءبىزدىڭ فۋتبولشىلار قالتانىڭ قالىڭدىعىن ەمەس, تاجىريبە جيناۋدى ءبىرىنشى ورىنعا قويعاندا عانا داميدى جانە باسەكەگە دايىن بولادى. ال ەلىمىزدە ونداي تاۋەكەلگە بارىپ جاتقان فۋتبولشىلار ساۋساقپەن سانارلىق. ۇلتتىق قۇرامانىڭ دەنى ىشكى بىرىنشىلىكتەگى كوماندالاردان جاساقتالاتىنىن دا ۇمىتپاعان ابزال.
«ورداباسى» جانە بيىك فۋتبول كلۋبتارىنىڭ پرەزيدەنتى باۋىرجان ءابدۋبايىتوۆ شەتەلدىك لەگيونەرلەردىڭ قازاقستان فۋتبولىندا دوپ تەبۋىنە قارسى ەمەس, تەك ولاردىڭ سانىن شەكتەۋ كەرەك ەكەنىن ايتادى. «جۋىردا استانادا فۋتبول سالاسىنداعىلاردىڭ باسىن قوسقان ۇلكەن فورۋم ءوتتى. قىزىقتى ءارى تارتىمدى سۇراقتار قويىلدى. مەن ءۇشىن ماڭىزدى سۇراقتاردىڭ ءبىرى كاسىپقوي فۋتبولشىلاردىڭ اراسىندا شەتەلدىڭ ازاماتتارىن ازايتۋ بولدى. ياعني لەگيونەرلەردىڭ سانىن شەكتەپ, قازاقستان ازاماتتارىنا كوپ مۇمكىندىك بەرۋ كەرەك. دەگەنمەن بۇل ءبىر كۇندىك ماسەلە ەمەس. ويتكەنى ويىنشىلاردىڭ كەلىسىمشارتتارى بار. كەلەشەكتە بۇل ماسەلە وڭ شەشىمىن تابادى دەپ ويلايمىن», دەيدى فۋتبول فۋنكتسيونەرى.
قازىر ەلىمىزدىڭ فۋتبول كلۋبتارى تۇركيادا جاڭا ماۋسىم الدىنداعى وقۋ-جاتتىعۋ جيىندارىن وتكىزىپ, قاتارلارىن مەيلىنشە شەتەلدىك ويىنشىلارمەن تولىقتىرىپ جاتىر. سەبەبى اتقارۋشى كوميتەت كوماندالارعا رۇقسات ەتىلگەن 8 لەگيونەردىڭ جەتەۋىنىڭ الاڭعا شىعۋىنا رۇقسات بەرىپ وتىر. ماسەلەن, ماۋسىمارالىق ۇزىلىستە بىلتىرعى ەل چەمپيونى «استانا» ءوز قاتارىنا سەربيالىق جارتىلاي قورعاۋشى دۋشان ءيوۆانچيچتى, چەرنوگوريالىق قورعاۋشى جاركو توماشەۆيچتى, گامبيالىق شابۋىلشى دەمبو داربوەنى, حورۆاتيالىق قاقپاشى يوسيپ ءچوندريچتى جانە فرانتسيالىق جارتىلاي قورعاۋشى فابەن ۋرەگاندى قوسىپ الدى. ودان بولەك, قۇرامىندا ارميان كامو وگانەسيان, بەلورۋس ماكس ەبونگ, حورۆات مارين توماسوۆ بار.
كۇمىس جۇلدەگەر «اقتوبەنىڭ» دە ترانسفەر بازارىنداعى ساۋداسى قىزىپ تۇر. قاڭتاردان بەرى «اق-قىزىلدار» گرۋزيالىق ورتالىق قورعاۋشى لۋكا گادراني, رەسەيلىك قاقپاشى ميروسلاۆ لوبانتسەۆ, چەرنوگوريالىق جارتىلاي قورعاۋشى ميلوش رايچكوۆيچ, رەسەيلىك قورعاۋشىلار – دميتري ياشين مەن دانيل پەنچيكوۆ, حورۆات شابۋىلشىسى اندريا فيليپوۆيچپەن كەلىسىمشارت جاساستى. قولا جۇلدەگەر قوستانايدىڭ «توبىلى» دا قۇرامىن بەس شەتەلدىك ويىنشىمەن تولىقتىرىپ الدى. ولار: اسمير سۋليچ (جارتىلاي قورعاۋشى, ماجارستان), يوۆان يليچ (جارتىلاي قورعاۋشى, بوسنيا جانە گەرتسەگوۆينا), البەرت گاباراەۆ (قورعاۋشى, رەسەي), يۆان كونوۆالو (قاقپاشى, رەسەي) جانە بويان ملادوۆيچ (قورعاۋشى, سەربيا). كوماندالاردىڭ قازاقستان فۋتبولشىلارىن دا ءوز قاتارلارىنا قوسىپ جاتقانىن ايتا كەتۋ كەرەك.
جۋىردا فۋتبول ينسايدەرى ايدىن قوجاحمەت ءوزىنىڭ تەلەگرام ارناسىندا مىناداي قىزىق مالىمەت جاريالادى. ياعني بيىل پرەمەر-ليگادا ونەر كورسەتەتىن 14 كوماندانىڭ ىشىندەگى 13 كلۋبتا بەلارۋس چەمپيوناتىندا دوپ تەپكەن 35 فۋتبولشى بار ەكەن. بۇل ءتىزىم ءالى دە تولىعۋى مۇمكىن. ماسەلەن, شىمكەنتتىڭ «ورداباسى» كومانداسىندا – بوبۋر ابديحوليكوۆ, ۆسەۆولود سادوۆسكي, شاحبوز ۋماروۆ, دميتري بورودين, دومينيك دينگا; «اتىراۋدا» – الەكساندر نويوك, نيكيتا ستەپانوۆ, يگور ستاسەۆيچ, ەگور حاتكەۆيچ; «توبىلدا» – يگور يۆانوۆيچ (كەلىسسوز ءجۇرىپ جاتىر)*, يليا ۆاسيلەۆ*, يسلام چەسنوكوۆ, يۆان كونوۆالوۆ; «كاسپيدە» – دميتري پودسترەلوۆ, گەورگي بۋگۋلوۆ, الەكسەي زالەسكي, ماكسيم پلوتنيكوۆ; «ماقتاارالدا» – جۋنيور كابانانگا, سەكۋ دۋمبيا, رۋسلان يۋدەنكوۆ; «استانادا» – دەمبو داربو, ماكس ەبونگ, كامو وگانەسيان; «جەتىسۋدا» – رۋسلان تەۆەروۆ, مۋرات بۋراەۆ, پاۆەل نازارەنكو; «قىزىلجاردا» – ەۆگەني بەرەزكين, رومان ستەپانوۆ*; «شاحتەردە» – رودجەر كانياس, ستەفان بۋكوراتس; «وقجەتپەستە» – رۋسلان بولوۆ, دميتري رىجۋك; «اقتوبەدە» – دميتري ياشين; «قايراتتا» – گۇلجىگىت الىقۇلوۆ جانە «قايساردا» – سەرگەي بوندارەنكو سەكىلدى فۋتبولشىلار وينايدى.
سپورت ءجۋرناليسى بەك تولەۋ بەلارۋس چەمپيوناتىندا ويناعان فۋتبولشىلاردىڭ قازاقستانعا ۇدەرە كوشۋى جالاقى ماسەلەسىنە بايلانىستى ەكەنىن ايتادى. «2021 جىلى بەلارۋس فۋتبول فەدەراتسياسىنىڭ اتقارۋشى كوميتەتى «جوعارى ليگا كلۋبتارىنىڭ قىزمەتكەرلەرى ءۇشىن ەڭ جوعارى تىركەلگەن ايلىق جالاقىنىڭ, سىياقىنىڭ جانە وزگە دە بونۋستاردىڭ ليميتتەرى تۋرالى» ەرەجەنى بەكىتتى. جاڭا ەرەجەگە سايكەس چەمپيوناتتا 15 مىڭ بەلارۋس رۋبلىنەن جوعارى جالاقى تولەنبەۋ كەرەكتىگى بەكىتىلدى. بۇل سول كەزدەگى باعاممەن 5,8 مىڭ اقش دوللارى ەدى. ونىڭ ءوزى بارىنە ەمەس. مۇنداي اقشانى تەك بەلارۋس ۇلتتىق قۇراماسىنىڭ فۋتبولشىلارىنا (ول ءۇشىن سوڭعى ەكى جىلدا ۇلتتىق قۇراماداعى ماتچتاردىڭ 50 پايىزىندا ويناۋ كەرەك) جانە ءار كلۋبتاعى ءۇش لەگيونەرگە تولەۋگە رۇقسات ەتىلدى. سونىمەن قاتار ءار كلۋبتاعى اي سايىنعى جالپىكوماندالىق جالاقى قورى 150 مىڭ رۋبلدەن اسپاۋعا ءتيىس دەگەن ەرەجە بەكىتىلدى. ال 2022 جىلدىڭ جەلتوقسانىندا فۋتبولشىلاردىڭ جالاقىسىن قىسقارتۋ ءتىپتى كۇشەيتىلدى. تەك ۇلتتىق قۇرامادا ويناپ جۇرگەندەردىڭ جالاقىسىنا تيىسكەن جوق. ولاردىڭ ادەتتەگىدەي 6 مىڭ اقش دوللارىنا دەيىنگى جالاقى الۋىنا بولادى. قالعاندارى ايىنا 1600-2000 دوللارمەن شەكتەلۋگە ءتيىس. سوندىقتان, رەتى كەلسە, بەلارۋس فۋتبولشىلارى جالاقىسى الدەقايدا جوعارى باسقا چەمپيوناتتاردان ءوز باقتارىن سىناۋدى ءجون كورىپ جاتىر. اسىرەسە قازاقستانعا كەلەتىندەر كوبەيگەن», دەيدى.
بەيرەسمي دەرەك بويىنشا قازاقستان چەمپيوناتىندا وينايتىن لەگيونەرلەر ايىنا 20-30 مىڭ اقش دوللارى كولەمىندە جالاقى الادى ەكەن... ال سولاردىڭ ءبارى بىردەي ساپالى ويىنشىلار ما؟
