اسىرەسە, دەمىكپە, جۇرەك جانە ديابەت اۋرۋلارىنا شالدىققان ناۋقاستاردىڭ پرەپاراتتارى ۋاقىتىندا قولدارىنا تيمەي, ءبىراز ادام قاجەتتى ءدارىنى ءدارىحانالاردان ءوز قاراجاتىنا ساتىپ العان. ال وڭىرلىك دەنساۋلىق ساقتاۋ باسقارماسىنىڭ وكىلدەرى جەرگىلىكتى مەديتسينالىق ۇيىمداردىڭ ءدارىحانالارىندا ارنايى تىزىمگە ەنگەن پرەپاراتتاردىڭ جالپى سوماسى ملرد تەڭگەدەن اساتىن كولەمى بار, جىل باسىنان تەگىن ءدارى-دارمەككە بايلانىستى شاعىم تۇسكەن جوق دەپ وتىر. بۇل جاعدايعا ادەتتە جىلدىڭ باسى مەن اياعىندا ورىن الاتىن تەحنيكالىق اقاۋلار سەبەپ بولۋى مۇمكىن دەگەن ءۋاج ايتادى.
اقپان ايىنىڭ باسىنداعى دەرەكتەرگە سۇيەنسەك, ء«دارى-دارمەكپەن قامتاماسىز ەتۋدىڭ اقپاراتتىق جۇيەسىندە» جالپى سوماسى 153,3 ملن تەڭگە تۇراتىن دارىلىك پرەپاراتتار اق جەلەڭدىلەرمەن جازىلىپ, ناۋقاستارعا تاراتىلعانى تىركەلگەن. ەمدەۋ ۇيىمدارىنىڭ ءدارىحانالارىندا ءالى دە جالپى قۇنى 1,2 ملرد تەڭگەنىڭ ءدارى-دارمەگى قالىپ وتىر. دەنساۋلىق ساقتاۋ باسقارماسىنداعىلار وڭىردەگى ەمحانالار 505 اتاۋدان تۇراتىن ءدارى-دارمەككە ءوتىنىم بىلدىرگەنىن, ونىڭ 450 ءتۇرى ساتىپ الىنىپ قويعانىن مالىمدەدى. قالعان بولىگى جۋىق ارادا جاۋاپتى ديستريبيۋتورلار ارقىلى جەتكىزىلەدى.
پاۆلودارداعى №2 ەمحانا باس دارىگەرىنىڭ ورىنباسارى ەلەنا كياتكينا 10 مىڭعا جۋىق ەمدەلۋشى ديسپانسەرلىك ەسەپتە تۇر, ونىڭ باسىم بولىگىنە بىلتىرعى جىلدىڭ جەلتوقسان ايىندا ەكى ايعا جەتەتىندەي دارىلىك زاتتار بەرىلگەن دەيدى. ال قاڭتار ايىندا مەكەمەدە قايتا قۇرىلىمداۋ ۇدەرىستەرى جۇزەگە اسىپ, ءدارى-دارمەكتى جازىپ بەرەتىن اقپاراتتىق جۇيەدە ماسەلەلەر تۋىنداعان.
– بولماعان سوڭ ءبىز ناۋقاستارعا تەگىن دارىلەردىڭ تىركەلىمىن قاعازعا شىعارىپ بەردىك. كەيبىر ادامدار رەتسەپت بەرمەي وتىرسىڭدار دەپ شاعىم ايتىپ كەلدى. ول جاعداي تەحنيكالىق سيپاتقا يە ەكەنىن ءتۇسىندىرىپ باقتىق. اقپان ايىنان بەرى ماسەلە شەشىلىپ, رەتسەپت جازىپ بەرۋ ورنىنا كەلدى. قازىر جەڭىلدىكتى پرەپاراتتار قولىمىزدا بار, جەتكىزۋ بويىنشا ماسەلەلەر جوق, – دەيدى ول.
«سق «فارماتسيا» جشس وڭىرلىك فيليالىنىڭ جەتەكشىسى اياگوز ايتباەۆا بىرىڭعاي ديستريبيۋتورمەن قاجەتتى مەديتسينالىق پرەپاراتتار الدىن الا ساتىپ الىنىپ, بەلگىلەنگەن مەرزىمنەن بۇرىن وبلىسقا جەتكىزىلىپ قوياتىنىن ايتادى. بيىلعا قاجەت دارىلىك زاتتار 2022 جىلدىڭ سوڭىندا قويمالارعا سالىنىپتى. جەرگىلىكتى مەديتسينالىق ۇيىمدار ءدارى-دارمەك تۇرلەرى مەن سانىن وزدەرى ايقىنداپ, جەتكىزۋ كەستەسىن دەربەس بەلگىلەيتىن كورىنەدى. سوندىقتان وڭىرلىك جەتكىزۋشى كومپانيانىڭ قىزمەتىندە ءمىن جوق دەپ ماقتاندى ول. بىرىڭعاي ديستريبيۋتوردىڭ پرەپاراتتار تىزبەسىنە 1 765 اتاۋ ەنەدى. پرەپاراتتار ۇيىمدارعا تۇراقتى تۇردە جەتكىزىلىپ, ءارى قاراي ستاتسيونارلار مەن امبۋلاتوريالارعا جول تارتادى. ەگەر الدەبىر دارىلەردى شۇعىل تۇردە اپارۋ قاجەت بولسا, سەرىكتەستىك وعان دا ءاردايىم دايىن ەكەنىن ەسكەرتتى.
وبلىس ورتالىعىنداعى №5 ەمحانا دا 190 ملن تەڭگەنىڭ ءدارى-دارمەگىن الىپ ۇلگەرگەن. بۇل كولەم شامامەن 3 ايعا دەيىن جەتەدى ەكەن. ۇيىم ىشىندەگى ءدارىحانا كۇنىنە 300-دەن اسا ناۋقاستى نوزولوگيا, ارتەريالىق گيپەرتەنزيا, جۇرەكتىڭ يشەميالىق اۋرۋى, قانت ديابەتى, ورفاندىق (سيرەك كەزدەسەتىن) جانە وزگە دە اۋرۋلار بويىنشا پرەپاراتتارمەن قامتاماسىز ەتىپ وتىر.
پاۆلودار
