سالتاناتتى ءىس-شاراعا قازاقستان بوكس فەدەراتسياسىنىڭ پرەزيدەنتى كەڭەس راقىشەۆ, قبف اتقارۋشى ديرەكتورى ماراتبەك مىقتىبەكوۆ, الماتى قالاسى بوكس فەدەراتسياسىنىڭ باسشىسى ەرجان قوسمامبەتوۆ جانە قبف پرەزيدەنتىنىڭ كەڭەسشىسى باعلان شالاەۆ قاتىستى.
«يسپانيادا ەلىمىزدىڭ جاستار قۇراماسى جاقسى ناتيجە كورسەتتى. مەدالداردىڭ سانى مەن ساپاسى بويىنشا ءبىزدىڭ قۇراما ۇزدىكتەر قاتارىنان كورىنىپ, ءۇشىنشى ورىنعا يە بولدى. ارادا كوپ ۋاقىت وتسە دە, جاس بوكسشىلارىمىزدى ۇمىتقان جوقپىز. ءبىز جاستارعا سەنىم ارتامىز. بولاشاقتا ولار ۇلتتىق قۇراما بوكسشىلارىنىڭ ورنىن باسادى. اسىرەسە ايەلدەر بوكسىنداعى ناتيجەلەر ەرەكشە قۋانتادى. بوكس – قازاقتىڭ ۇلتتىق سپورتىنا اينالدى. قازىر اۋەسقوي بوكستا ءجۇرىپ تە اتىڭدى شىعارۋعا بولادى. جاقسى قاراجات تا تابا الاسىڭ. قازاقستاننىڭ كاسىپقوي بوكسشىلارى مۇنداي تابىسقا كەنەلمەيدى دەسەم, قاتەلەسپەيمىن. بارلىق بوكسشىلارعا, باپكەرلەر قۇرامىنا جانە ءبىزدىڭ جەڭىستەرىمىزدىڭ جارشىسى – باق وكىلدەرىنە العىس ايتامىن», دەدى كەڭەس راقىشەۆ ءوزىنىڭ قۇتتىقتاۋ سوزىندە.
فەدەراتسيا پرەزيدەنتى الەم چەمپيوندارى – ەلينا بازاروۆا (54 كگ) مەن باقىت سەيدىشكە (66 كگ) 3 ميلليون تەڭگەنىڭ سەرتيفيكاتتارىن تابىستادى. كۇمىس جۇلدەگەرلەر – نۇربەك مۋرسال (67 كگ) مەن داۋلەت تولەمىسوۆ (75 كگ) 1,5 ميلليون, قولا جۇلدەگەرلەر – گۇلناز بورىباەۆا (48 كگ), اسەم تاڭاتار (63 كگ) جانە اسەل توقتاسىن (+81 كگ) 1 ميلليون تەڭگەگە يە بولدى. جەڭىمپازداردىڭ جەكە باپكەرلەرى نۇربوتا سەيىتبەك پەن باعلان وماربەكوۆكە 500 مىڭ تەڭگەدەن بەرىلدى. مۇنداي ماراپاتتار جاستار قۇراماسىنىڭ باسقا دا باپكەرلەرىن ىنتالاندىرا تۇسەدى.
جاستار اراسىنداعى الەم چەمپيوناتىنىڭ جالپىكوماندالىق ەسەبىندە قازاقستان قۇراماسى ۇلىبريتانيامەن بىرگە ءۇشىنشى ورىندى بولىسكەن بولاتىن. ءۇندىستان ەكىنشى ورىنعا يە بولسا, وزبەكستان الەم چەمپيوناتىنىڭ ۇزدىك قۇراماسى اتانعان-دى.
