ىشىندە ارنايى ءچيپى بار سىرعا-تاڭبانىڭ ءنومىرى «Tanba» بىرىڭعاي بازاسىنا ەنگىزىلىپ, الگى ءيتتىڭ بيوزارارسىزداندىرىلعانىن ايعاقتايدى ەكەن. «سەردتسە پاۆلودارا» قورىنىڭ جەتەكشىسى ماريا گرەبانكينا قاڭعىباس يتتەرگە ارنالعان سىرعالاردىڭ العاشقى پارتياسى ساتىپ الىنعانىن, ول جاقىن ارادا جانۋارلار تەرىسىنە ەنگىزىلەتىنىن ايتادى.
– ازاماتتار مۇنداي بەلگىسى بار جانۋارلاردىڭ كاستراتسيادان نەمەسە ستەريليزاتسيادان وتكەنىن بىلە الادى. ءبىز جەرگىلىكتى ۆەتەرينارلىق ستانسامەن سويلەسىپ, كەلىسىمگە كەلدىك. مۇنداي يتتەردىڭ قاۋىپسىز ەكەنىن, ولارعا تيىسپەۋ قاجەت ەكەنىن بىلەدى, – دەيدى ول.
بۇعان دەيىن قوعامدىق بەلسەندى وبلىس ورتالىعىندا يتتەردى بيوزارارسىزداندىرۋعا ارنالعان الەۋمەتتىك ورتالىق اشىلاتىنى تۋرالى حابارلاعان ەدى. بولاشاق كلينيكاعا قالا تۇرعىندارى قاراجات جيناپ, جيھاز جانە قاجەتتى زاتتارىن ساتىپ اپەردى. دەي تۇرعانمەن, ۇيىمنىڭ شتاتىندا ازىرشە ۆەتەرينار جوق, ماماندى سىرتتان جالداۋعا تۋرا كەلىپ وتىرعان كورىنەدى. ال يتتەردى زارارسىزداندىرۋ اقىلى تۇردە جۇزەگە اسىپ جاتىر. سوندىقتان كوشە كەزگەن بارلىق جانۋاردى قامتۋ مۇمكىن ەمەس ەكەنى ايقىن.
ءبىر قىزىعى, بۇل ورتالىقتى ۇيىمداستىرۋشىلاردىڭ قاڭعىباس يتتەردىڭ ماسەلەسىن كاستراتسيا جاساۋمەن شەشەمىز دەگەنى ويعا سىيمايتىنداي. ۆەتەرينار مامانداردىڭ سوزىنە قۇلاق تۇرسەك, كەستىرىلگەن جانۋارلار كەيىن كوبىنە ىزاقور, قاباعان بولىپ كەتەدى. جانۋارلاردى قورعاۋ ستاندارتىن ەنگىزەمىز دەپ ارنايى زاڭ قابىلدادىق. بۇرالقى جانۋارلار وزدەرىنىڭ زاڭمەن قورعالعانىن ابدەن ءبىلىپ السا كەرەك, بۇگىندە ەلدى مەكەندەردىڭ كەز كەلگەن جەرىندە تايراڭداپ, بالا-شاعانىڭ كوزىنشە ۇيىعىپ جۇرە بەرەدى. جۋىقتا پاۆلودار اۋىلىنىڭ تۇرعىندارى مەكتەپ اۋلاسىندا كۇنى-ءتۇنى يتتەر جۇرەتىنىن, بالالارىنىڭ ءومىرى ءۇشىن الاڭدايتىنىن ايتىپ دابىل قاقتى. الايدا جەرگىلىكتى اكىمدىك ولارعا قارسى شارا قولدانۋعا قاۋقارسىز. اكىمدىكتەگىلەر اتا-انالارعا يتتەردىڭ يەلەرىن وزدەرىن تاۋىپ الىڭدار دەپ سىلتەي سالعان. ال جەرگىلىكتى ۆەتەرينارلىق مەكەمە ماماندارى ولاردى تورعا قاماپ ۇستاپ الۋعا ارەكەتتەنگەندەرىمەن, تۇك شىقپاپتى.
كەيىنگى ۋاقىتتا بالانىڭ دا, كارىنىڭ دە بەرەكەسىن قاشىرىپ قويماي, ءتىپتى كوشە كەزگەن الابايدىڭ جەتكىنشەكتى تالاپ ولتىرگەنىن دە ەستىپ بىلدىك. ادامدار يتتەن وسىنشاما زارداپ شەگىپ, بەيبىت كۇندە بالعىنداردى جازىم ەتىپ جاتسا, قولدانىستاعى زاڭنىڭ شيكىلىگىن بىلدىرمەي مە؟ يت ۇستايتىن ازاماتتاردىڭ جاۋاپكەرشىلىگىن كۇشەيتپەي, سولقىلداق زاڭىمىز ءالى تالاي بالانىڭ سورىن قايناتاتىنداي.
پاۆلودار وبلىسى
