ادىيامان پروۆينتسياسىندا قۇلاعان ۇيلەردىڭ استىنان 54 ساعاتتان كەيىن قۇتقارىلعان 28 جاستاعى فارماتسەۆت گيزەم وزكان جەر سىلكىنىسىنەن كەيىنگى العاشقى ءبىر ساعات - ەڭ قيىن ۋاقىت ەكەنىن ايتتى.
قازىر بويجەتكەن يزمير قالاسىنداعى بۋدجا سەيفي دەميرسوي وقۋ جانە زەرتتەۋ اۋرۋحاناسىندا ەمدەلىپ جاتىر. ونىڭ ايتۋىنشا جەر استى دۇمپۋلەرىنىڭ سالدارىنان التى قاباتتى عيمارات قيراعان, ال ول وتباسىمەن بىرگە ءتورتىنشى قاباتتاعى پاتەردە تۇرعان.
گيزەمنىڭ وتباسى قيىندىلاردىڭ استىندا قالىپ قويعان, قۋانىشقا وراي بارلىعى امان. تەك سول ءتۇنى بولعان قورقىنىشتى ساتتەر ماڭگى ەستەرىندە قالاتىنى انىق دەيدى وزكان.
«سونداي شاراسىز كۇيگە تۇسەسىڭ. ۇستىڭنەن ۇلكەن بىرنارسە باسىپ تۇرعان سوڭ تىنىس الا المايسىڭ. ءتورت جاعىڭنان كەپتەلىپ قالعاسىن اۋا كىرەتىن جەر دە قالمايدى. مەن ۇستىمنەن دە, استىمنان دا قىسىلىپ جاتتىم», دەيدى جابىرلەنۋشى ارتتا قالعان اۋىر ەستەلىكتەرىمەن ءبولىسىپ.
بويجەتكەننىڭ ايتۋىنشا ول ءوزىن تىنىشتاندىرۋ ءۇشىن ءوزىنىڭ سۇيىكتى اندەرىن ايتىپ, جان-جاعىنا تاستاردى لاقتىرىپ, ءوزىنىڭ ءتىرى ەكەنىن دىبىس ارقىلى كورسەتكىسى كەلگەن.
«ەڭ قيىنى العاشقى ساعاتتا سەزىلدى. سەن بار جانىڭمەن ءولۋدى قالايسىڭ. جەر استى دۇمپۋلەرى دە قايتالانىپ تۇردى. ءبىر ساعاتتان كەيىن ەسىڭدى جينايسىڭ. مۇمكىن مەنى ەشكىم ەستىمەگەن بولار, بىراق مەن ۇنەمى داۋىس شىعارىپ جاتتىم», دەيدى ول.
قۇتقارۋشىلار قىزدى تاۋىپ العاندا ول ەس-ءتۇسسىز جاتقان. كەيىن اۋرۋحاناعا ءتۇرلى جاراقاتتارمەن جەتكىزىلدى. بويجەتكەننىڭ ايتۋىنشا, ول باسىنان وتكەن جاعدايلاردان كەيىن ءومىردىڭ قادىرىن ەكى ەسە تۇسىنگەن.
«مەن ادامداردى قانداي جاعداي بولسادا, ۇمىتتەرىن ۇزبەۋگە شاقىرامىن», دەپ ول سۇحباتىن اياقتادى.
اۋرۋحانانىڭ باس دارىگەرى پروفەسسور يەكتا ونجەل مەديتسينالىق مەكەمەگە قاحرامانماراش پەن ادىياماننان 40-قا جۋىق جارالى تۇسكەنىن ايتتى. ونىڭ ايتۋىنشا, اۋرۋحاناعا جەتكىزىلگەن بارلىق ادامدارعا پسيحولوگيالىق كومەك كورسەتىلەدى.
ەسكە سالايىق, 6 اقپاندا تۇركيانىڭ وڭتۇستىك-شىعىسىندا ەكى جويقىن جەر سىلكىنىسى بولدى: جەرگىلىكتى ۋاقىت بويىنشا 04:17-دە – 7,7 بالل جانە 13:24-تە – 7,6 بالل. قايتىس بولعاندار سانى 35 مىڭنان استى.
تۇركيا پرەزيدەنتى رەجەپ تايىپ ەردوعان تۇركيادا جەتى كۇندىك ۇلتتىق ازا تۇتۋ جاريالادى.
