بۇعان دەيىنگى رەكورد بۇكىل كارەراسىندا 38 387 ۇپاي جيناعان تاعى ءبىر امەريكالىق ايگىلى باسكەتبولشى جانە ءدال سول «لوس-اندجەلەس لەيكەرستىڭ» داڭقتى ويىنشىسى بولعان 75 جاستاعى ابدۋل-دجاببارعا تيەسىلى ەدى. ول بۇل ناتيجەنى 1984 جىلدىڭ 5 ساۋىرىندە ورناتقان بولاتىن. ءبىر قىزىعى, 38 جاستاعى لەبرون دجەيمس وسى رەكورد ورناتىلعاننان كەيىن توعىز ايدان سوڭ, ياعني 1984 جىلدىڭ 30 جەلتوقسانىندا دۇنيەگە كەلگەن ەكەن.
«لوس-اندجەلەس لەيكەرس» پەن «وكلاحوما-سيتي تاندەر» اراسىنداعى ماتچتى ارەنادان تاماشالاعان ابدۋل-دجاببار لەبروننىڭ رەكوردتىق ۇپاي اكەلگەن سوققىسىنا قول شاپالاقتاپ ىقىلاسىن ءبىلدىرىپ, كەزدەسۋدەن كەيىن ونى ايتۋلى جەتىستىگىمەن ارنايى قۇتتىقتادى.
– لەبرون بۇل رەكوردتىڭ يەسى اتانۋعا ابدەن لايىق باسكەتبولشى دەپ ەسەپتەيمىن. ول 20 جىل بويى تۇراقتى ويىنىنىڭ ارقاسىندا بارلىق اتاق-داڭققا لايىق سپورتشى ەكەنىن كورسەتتى. وسى ۋاقىت ارالىعىندا ول تىنىمسىز ەڭبەك ەتىپ, ءۇش بىردەي كومانداعا ۇلتتىق باسكەتبول ليگاسىنىڭ چەمپيونى دەگەن اتاقتى الىپ بەردى. سونداي-اق بۇدان باسقا دا تولىپ جاتقان اتاقتارعا قول جەتكىزدى. ونى تاعى ءبىر باعىندىرعان بەلەسىمەن قۇتتىقتايمىن, – دەدى ك.ابدۋل-دجاببار.
راسىمەن, لەبرون دجەيمس بۇل رەكوردتىق كورسەتكىشتى جاڭارتۋ ءۇشىن 20 جىل ءومىرىن ارنادى. كارەراسىن 2003 جىلى «كليۆلەند كاۆالەرس» كلۋبىندا باستاعان امەريكالىق باسكەتبولشى كەيىننەن 2010-2013 جىلدار ارالىعىندا «مايامي حيت», 2014-2018 جىلدارى «كليۆلەند كاۆالەرس» جەيدەسىندە ونەر كورسەتسە, 2018 جىلدان باستاپ اقش-تاعى ەڭ اتاقتى كوماندالاردىڭ ءبىرى – «لوس-اندجەلەس لەيكەرستىڭ» نامىسىن قورعاپ كەلەدى.
«لەيكەرس» جانكۇيەرلەرىنە ەرەكشە العىس ايتقىم كەلەدى. مەن ءۇشىن كاريم سياقتى باسكەتبول اڭىزىمەن ءبىر قاتاردا تۇرۋ, ونىڭ رەكوردىن جاڭارتۋ – ۇلكەن مارتەبە. قۇرمەتتى جانكۇيەرلەر, كاپيتانىمىز ابدۋل-دجاببارعا ورىندارىڭىزدان تۇرىپ, قول شاپالاقتاساڭىزدار ەكەن. ول كەز كەلگەن قۇرمەتكە لايىق سپورتشى. سونداي-اق كەيىنگى 20 جىلدا قاسىمدا بولعان وتباسىما, دوستارىما جانە مەنى قولداعان بارشاڭىزعا ەرەكشە العىسىمدى بىلدىرەمىن», دەپ اعىنان جارىلعان لەبرون كورەرمەن تولى ارەنادا كوز جاسىنا ەرىك بەرىپ.
وگايو شتاتىنىڭ اكرون قالاسىندا دۇنيەگە كەلگەن لەبرون رەيمون دجەيمستىڭ باسكەتبول سپورتىندا باعىندىرماعان بەلەسى كەمدە-كەم. ول – 2008 جىلى قىتايدىڭ باس شاھارى بەيجىڭدە ۇيىمداستىرىلعان وليمپيا ويىندارىنىڭ جانە 2012 جىلعى لوندونداعى تورتجىلدىقتىڭ باستى دوداسىنىڭ جەڭىمپازى, افينى وليمپياداسىنىڭ قولا جۇلدەگەرى (2016 جىلى). سونداي-اق 2005 جىلعى امەريكا قۇرلىعىنىڭ چەمپيونى جانە 2006 جىلى جاپونيادا وتكەن الەم بىرىنشىلىگىنىڭ قولا مەدال يەگەرى.
سونىمەن قاتار ول ۇلتتىق باسكەتبول ليگاسىنىڭ ءتورت دۇركىن چەمپيونى, ۇبل فينالدارىندا ءتورت مارتە ەڭ قۇندى ويىنشى دەپ تانىلىپ, 2007/08 جىلعى باسكەتبول ماۋسىمىندا ەڭ كوپ ۇپاي جيناعان ويىنشىسى جانە 2003/04 جىلعى چەمپيوناتتىڭ جىل جاڭالىعى اتاندى. 2012, 2016 جىلدارى Sports Illustrated جۋرنالىنىڭ نۇسقاسى بويىنشا اقش-تىڭ جىل سپورتشىسى اتاعىنا يە بولسا, 2012, 2013, 2016 جىلدارى جىلدىڭ ۇزدىك سپورتشىسىنا بەرىلەتىن ESPY سىيلىعىن جەڭىپ الدى.
ال باسكەتبول الەمىندەگى ءبىر رەكوردىنان ايىرىلعان كاريم ابدۋل-دجابباار 1947 جىلدىڭ 16 ساۋىرىندە اقش-تىڭ نيۋ-يورك قالاسىندا دۇنيەگە كەلگەن. كارەراسىندا نەبارى ەكى-اق كلۋبتا ويناعان ول 1969-1975 جىلدار ارالىعىندا «ميلۋوكي باكس» ساپىندا ونەر كورسەتسە, 1975-1989 جىلدارى «لوس-اندجەلەس لەيكەرس» كومانداسىندا ويناپ, 42 جاسىندا ۇلكەن سپورتپەن قوشتاستى. كاريم ءبىر رەكوردىنان ايىرىلعانىمەن, ءالى ونىڭ جاڭارماي كەلە جاتقان بىرنەشە رەكوردى بار.
اتاپ ايتار بولساق, ول ماتچتار سانى (1560), ويناعان مينۋتتار (57 446), گول سوعىلعان دوپتار (15 837), سەبەتىنىڭ جانىنداعى جەڭىستەر سانى (9394), كارەراسىنداعى جەڭىستەر (1074) جانە جەكە ويىندار سانى بويىنشا ۇبل-دا ءالى دە كوشباسشى سانالادى. ول جەكە جەڭىستەرى بويىنشا دا ۇلتتىق باسكەتبول ليگاسىنىڭ ءابسوليۋتتى كوشباسشى بولىپ قالا بەرەدى.
