«رەال» افريكا قۇرلىعىندا وتكەن كلۋبتار اراسىنداعى الەم چەمپيوناتىنىڭ دا, فينالدىڭ دا ءسوزسىز ءفاۆوريتى ەدى. كوپشىلىك يسپانيالىق كلۋب فينالدا بىلتىرعى «ليبەرتادورەس» كۋبوگىنىڭ جەڭىمپازى برازيليانىڭ «فلامەنگوسىمەن» كەزدەسەدى دەپ توپشىلاعان ەدى. الايدا 2021 جىلعى ازيا چەمپيوندار ليگاسىنىڭ يەگەرى ساۋد ارابياسىنىڭ ء«ال-حيليال» كومانداسى جارتىلاي فينالدا سەنساتسيا جاساپ, «ليبەرتادورەستى» ماتچ سوڭىنداعى پەنالتي سەرياسىندا جەڭىپ كەتتى.
فينالدىق ماتچ ماروككو استاناسى – راباتتا ورنالاسقان 55 مىڭ جانكۇيەردى سىيدىرا الاتىن «مۋلاي ابدۋللا» اتىنداعى ستاديوندا ءوتتى. ماتچتىڭ العاشقى 10 مينۋتى ساۋديالىقتار ءۇشىن ءساتتى باستالعانىمەن, كەزدەسۋدىڭ 13-مينۋتىندا ۆينيسيۋس جۋنيور كارىم بەنزەمانىڭ پاسىنان كەيىن گول سوعىپ, كومانداسىن ەسەپتە العا شىعاردى. ارادا بەس مينۋت وتكەندە «رەالدىڭ» ۋرۋگۆايلىق شابۋىلشىسى فەدەريكو ۆالۆەردە تابلوداعى كورسەتكىشتى 2:0-گە جەتكىزدى. دەگەنمەن, ويىننىڭ 26-مينۋتىندا ء«ال-حيليال» شابۋىلشىسى مارەگا مەرگەندىگىمەن كوزگە ءتۇسىپ, ەسەپ ايىرماسىن قىسقارتۋعا مۇمكىندىك الدى – 2:1. فينالدىڭ ءبىرىنشى تايمى ءدال وسى ەسەپپەن اياقتالدى.
ەۋروپا چەمپيوندار ليگاسىنىڭ بىلتىرعى جەڭىمپازدارى ۇزىلىستەن كەيىن دە بەلسەندىلىگىن ارتتىرىپ, اينالدىرعان ءتورت مينۋتتىڭ ىشىندە قارسىلاستارىنىڭ قاقپاسىنا جاۋاپسىز ەكى گول سوقتى. ەكىنشى تايمنىڭ 54-مينۋتىندا 2022 جىلعى «التىن دوپ» يەگەرى كارىم بەنزەما بۇل جولى ۆينيسيۋس جۋنيوردىڭ اسىرعان پاسىنان كەيىن قاقپانى ءدال كوزدەسە, 58-مينۋتتا فەدەريكو ۆالۆەردە ءدۋبلدىڭ اۆتورى اتاندى. ساۋد ارابياسى كومانداسىنىڭ ويىنشىلارى دا قارسىلاستارىنا كۋبوكتى وڭاي بەرىپ قويعىسى كەلمەي, ءبىراز قارسىلاسىپ باقتى. كەزدەسۋدىڭ 63-مينۋتىندا لۋسيانو ۆەتتو گول سوعىپ, تارازى باسىن ءبىر دوپقا قىسقارتقانىمەن, 69-مينۋتتا ۆينيسيۋس جۋنيور ەسەپتى 5:2-گە جەتكىزدى. ماتچ اياقتالعانعا دەيىن ۆەتتو تاعى ءبىر مارتە مەرگەندىگىمەن كوزگە تۇسسە دە, كومانداسىن جەڭىلىستەن قۇتقارىپ قالا المادى. وسىلايشا, 5:3 ەسەبىمەن جەڭىسكە جەتكەن «رەال» ءوز تاريحىندا بەسىنشى مارتە كلۋبتار اراسىنداعى الەم چەمپيوناتىندا توپ جاردى.
برازيليانىڭ «فلامەنگو» مەن مىسىردىڭ ء«ال-احلي» كلۋبتارى اراسىنداعى ءۇشىنشى ورىن ءۇشىن باسەكە «يبن باتۋتا» اتىنداعى ستاديوندا ءوتتى. بۇل ماتچتا وڭتۇستىك امەريكادان كەلگەن فۋتبولشىلاردىڭ مەرەيى ۇستەم بولدى – 4:2. ءبىر قىزىعى, ويىنداعى التى گولدى ءۇش فۋتبولشى عانا سوقتى. قولا جۇلدەگەرلەر ساپىنان گابريەل باربوزا مەن پەدرو دۋبل جاساسا, ء«ال-احلي» كومانداسىنان احمەد ابدەلكادەر ەكى مارتە دالدىك تانىتتى. ءسويتىپ, «فلامەنگو» چەمپيوناتتىڭ قولا جۇلدەگەرى اتاندى.
2000 جىلدان بەرى ۇيىمداستىرىلىپ كەلە جاتقان كلۋبتار اراسىنداعى الەم چەمپيوناتىندا ءمادريدتىڭ «رەالى» بيىل بەسىنشى مارتە توپ جارىپ, ەڭ كوپ ولجاعا كەنەلگەن كوماندالاردىڭ كوشىن باستاپ تۇر. كورولدىك كلۋب بۇعان دەيىن 2014, 2016, 2017 جانە 2018 جىلدارى جەڭىس تۇعىرىنان كورىنگەن بولاتىن. سونىمەن قاتار «بارسەلونا» ءۇش مارتە (2009, 2011, 2015), «كورينتيانس» (2000, 2012) پەن «باۆاريا» (2013, 2020) ەكى رەتتەن, «ينتەرناسونال» (2006), «سان-پاۋلۋ» (2005), «ميلان» (2007), «ينتەر» (2010), «مانچەستەر يۋنايتەد» (2008), «ليۆەرپۋل» (2019) جانە «چەلسي» (2021) كلۋبتارى ءبىر-ءبىر مارتەدەن جەڭىمپاز اتانعان.
