قاسىم-جومارت توقاەۆ ءۇي ماڭىنداعى اۋماقتىڭ جاعدايمەن تانىسىپ, جەرگىلىكتى تۇرعىندارمەن اڭگىمەلەستى. قالا اۋلالارىندا بالالارعا ارنالعان ويىن جانە سپورت الاڭدارى سالىنىپ, ترەناجەرلەر ورناتىلعان, تروتۋارلار جاسالعان, كولىك تۇراعى ورىندارىنىڭ سانى كوبەيىپ, جولدار اسفالتتالعان.
«حالىق قاتىساتىن بيۋدجەت» جوباسى اياسىندا ستەپنوگورسك قالاسىنىڭ اكىمدىگى ءۇشىنشى جىل قاتارىنان اباتتاندىرۋ جۇمىستارىن جۇزەگە اسىرىپ كەلەدى. ىسكە اسىرىلاتىن جوبالاردى تۇرعىنداردىڭ وزدەرى داۋىس بەرۋ ارقىلى تاڭدايدى.
2023 جىلى اقمولا وبلىسىندا اۋلالاردى جوندەۋگە وڭىرلىك بيۋدجەتتەن 900 ميلليون تەڭگە ءبولىندى, ونىڭ جارتىسى ستەپنوگورسك قالاسىنا باعىتتالعان.
قالا تۇرعىندارىمەن اڭگىمەلەسۋ بارىسىندا پرەزيدەنت ستەپنوگورسك قالاسىنىڭ دامۋىنا ەرەكشە كوڭىل بولەتىنىن اتاپ ءوتتى. جەرگىلىكتى جەو مەن جىلۋ جەلىلەرىنىڭ جاعدايى – ستەپنوگورسك تۇرعىندارىن الاڭداتاتىن ماڭىزدى ماسەلەلەردىڭ ءبىرى. 
«وسى كاسىپورىنداعى جاعدايمەن تانىسقاننان كەيىن بۇل ماسەلەلەردى مۇقيات سارالاۋعا شەشىم قابىلدادىم. ۇكىمەتكە اكىمدىكپەن جانە كاسىپورىن يەلەرىمەن بىرلەسە وتىرىپ, ءىس-ارەكەت الگوريتمىن ازىرلەۋگە, شەشىمدەر قابىلداۋعا تاپسىرما بەردىم», دەدى مەملەكەت باسشىسى.
قالا تۇرعىندارى ەكولوگيا ماسەلەسىن دە كوتەردى. اتاپ ايتقاندا, قاسىم-جومارت توقاەۆ ستەپنوگورسك قالاسىندا پحد قالدىقتارىن ساقتاۋعا بايلانىستى جەرگىلىكتى تۇرعىنداردىڭ الاڭداۋشىلىعىنا قاتىستى ءوز پىكىرىن ايتتى.
«مەن بۇل ماسەلەدەن حاباردارمىن. ماعان ۋتيليزاتسيا بويىنشا شاعىن كاسىپورىن سالۋ جونىندە شەشىم بار ەكەنىن باياندادى. مۇنداي شەشىمدى قولدايمىن», دەدى پرەزيدەنت.
«بەستوبە» كەنىشىنە قاتىستى جاعداي دا نازاردان تىس قالمادى. بۇل ماسەلە پرەزيدەنتتىڭ باقىلاۋىندا, جەرگىلىكتى ورگاندارعا اتالعان پروبلەمانى شەشۋ جونىندە ءتيىستى تاپسىرما بەرىلدى.
كەزدەسۋ سوڭىندا قاسىم-جومارت توقاەۆ قالا تۇرعىندارىنا زور دەنساۋلىق, تابىس, باق-بەرەكە تىلەدى. 
