گۋمانيتار سالادان SCOPUS تالاپ ەتۋ ءتيىمسىز
قايرات ساق, ل.گۋميلەۆ اتىنداعى ەۇۋ-دىڭ جۋرناليستيكا جانە ساياساتتانۋ فاكۋلتەتى دەكانى:
– بۇل راسىندا, قازىرگى كەزدەگى وزەكتى ماسەلە. قازاقستان تاريحىنا, قازاق فيلوسوفياسىنا قاتىستى ءبىلىم بەرۋ باعدارلامالارى بويىنشا وقيتىن دوكتورانتتار ءۇشىن Scopus دەرەكتەر بازاسىنداعى جۋرنالدارعا ماقالا جاريالاۋ مىندەتى الىنىپ تاستالعانى سەكىلدى الەۋمەتتىك عىلىمدار بويىنشا دا مۇنداي مىندەت بولماعانى دۇرىس. ويتكەنى قازاق رۋحانياتىنا, قازاق قوعامىنا قاتىستى زەرتتەۋ ەڭبەكتەرىن Web of Scienسe, Scopus بازاسىنا جاريالاۋدىڭ قاجەتى جوق. سونىڭ كەسىرىنەن, كوپتەگەن دوكتورانت, PhD دوكتورانتتار عىلىمي دارەجەسىن قورعاي الماي ءجۇر. ودان دا ونىڭ ورنىن الماستىرىپ, ماقالالاردى ءوزىمىزدىڭ عىلىمي جۋرنالدارىمىزعا جاريالايىق. Web of Scienسe, Scopus بازاسىنا ماقالا جاريالاۋ گۋمانيتارلىق, الەۋمەتتىك عىلىمدار ءۇشىن ءتيىمسىز. ءارى سكوپۋسقا ماقالا جاريالاۋ ءۇشىن دوكتورانتتارىمىز ورتاداعى دەلدالدارعا الدانىپ قالاتىن جاعدايلار دا بولادى.
ءبىزدىڭ كەيبىر تاقىرىپتارىمىز الەم زەرتتەۋشىلەرى ءۇشىن قىزىق بولماۋى مۇمكىن
كەنجەگۇل تەرگەمباي, ل.گۋميلەۆ اتىنداعى ەۇۋ-دىڭ جۋرناليستيكا جانە ساياساتتانۋ فاكۋلتەتىنىڭ دوكتورانتى:
– مەن بىلتىر دوكتورانتۋرانى ءبىتىردىم. بىراق ءالى قورعاۋعا شىققان جوقپىن. 2023 جىلدىڭ جەلتوقسان ايىنىڭ سوڭىنا دەيىن قورعاسام – تەگىن, ۇلگەرمەسەم قوماقتى قاراجات تولەپ قورعاۋعا تۋرا كەلەدى. بۇل جالعىز مەنىڭ عانا باس اۋرۋىم ەمەس, دوكتورانتۋرانى اياقتاعان تالاي تۇلەكتەردىڭ باس قايعىسى. سەبەبى «سكوپۋس» دەگەن قاتال تالاپ بار, سول زەرتتەۋشى عالىمداردىڭ باعىن بايلاپ, ساعىن سىندىرىپ تۇر.
Scopus (سكوپۋس) دەرەكتەر بازاسىندا ماقالا جاريالاۋ قيىننىڭ قيىنى. «قازاق تاريحىنا, تۇلعالارىنا, رۋحانياتىنا, جۋرناليستيكاسىنا, ساياساتىنا ارنالعان «وتاندىق» تاقىرىپتاعى ماقالالار الەمدى قىزىقتىرمايدى. ونى مويىنداۋ كەرەك. ال, ماتەماتيكا, مەديتسينا, بيولوگيا, حيميا جانە فيزيكا سالاسى بولسا ءبىر ءجون, ولارعا تالاس جوق. وسى پروبلەمانى بىلتىر اسحات ايماعامبەتوۆ مىرزانىڭ جەكەسىنە جازعانمىن. ول ازاماتقا العىسىم شەكسىز, سەبەبى پروبلەماعا سالماقتى تۇردە قاراپ, مينيسترلىكتە تالقىلاۋعا سالدى. جاقسى جاڭالىق كۇتىپ جۇرگەندە مينيسترلىك ەكىگە ءبولىنىپ كەتتى دە ءبىزدىڭ پروبلەمامىز ساياسات نۇربەك مىرزانىڭ قۇزىرىنا ءوتتى.
ديسسەرتاتسيا قورعاۋعا ازىرلەنىپ جۇرگەن دوكتورانتتاردا سۇراق كوپ
گۇلميرا اشىربەكوۆا, ل.گۋميلەۆ اتىنداعى ەۇۋ-دىڭ جۋرناليستيكا جانە ساياساتتانۋ فاكۋلتەتىنىڭ اعا-وقىتۋشىسى:
– قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ 2023 جىلعى 9 قاڭتارداعى №7 بۇيرىعى وتاندىق عالىمدار ءۇشىن جاقسى جاڭالىق بولعانى انىق. ويتكەنى وسى ۋاقىتقا دەيىن قازاق ءتىل ءبىلىمى مەن ادەبيەتتانۋ, فيلولوگيا ماسەلەلەرىنە قاتىستى عىلىمي ماقالالاردىڭ شەتەلدىك باسىلىمداردا جارىق كورۋى قيىندىق تۋعىزىپ كەلدى. سوعان قاراماستان Web of Scienسe, Scopus بازالارىنداعى عىلىمي جۋرنالداردا بىرنەشە ماقالالارىن جاريالاپ ۇلگەرگەن فيلولوگتار از ەمەس. ياعني قازاق ءتىل ءبىلىمى مەن ادەبيەتتانۋ ماسەلەلەرىن الەمدىك عىلىمي ورتاعا تانىستىرا الدىق دەپ ويلايمىن. بۇل – عالىمداردىڭ ۇلكەن جەتىستىگى. جاڭا تولىقتىرۋلار مەن وزگەرتۋلەر ەنگىزىلگەن تالاپتاردىڭ ءالى دە بولسا سۇراق تۋىنداتاتىن تۇستارى بار. ماسەلەن, 35 پروتسەنتى بار جوعارىدا اتالعان بازالاردا تىركەلگەن باسىلىمداردا ماقالاسى شىقسا, باسقا عىلىمي ماقالالار تالاپ ەتىلمەستەن قورعاۋعا جىبەرىلەدى دەلىنگەن. تاعى دا وسىنداي تالاپتار بار. بۇل ماسەلەگە قاتىستى كوميتەتتىڭ تۇسىندىرمەسى قاجەت-اق. ويتكەنى قازىرگى تاڭدا قورعاۋعا دايىندالىپ جۇرگەن دوكتورانتتار اراسىندا سۇراق كوپ. عىلىم كوميتەتى بەكىتكەن قازاقستاندىق عىلىمي جۋرنالدار Scopus بازاسىنا ەنۋ ءۇشىن ماقالا قابىلداۋ ەرەجەلەرىن وزگەرتىپ, تالاپتى كۇشەيتۋدە. ءبىز وتاندىق عىلىمي باسىلىمداردىڭ ساپاسىن جاقسارتۋعا كىرىسكەندە, شەتەلدىك جۋرنالدا شىققان ءبىر ماقالامەن قورعاۋ قانشالىقتى دۇرىس شەشىم؟ سونداي-اق Web of Scienسe, Scopus بازالارىنداعى عىلىمي جۋرنالداردا ماقالا جاريالاۋعا بايلانىستى عىلىم سالالارىنا قاراي ءبولۋدى دۇرىس شەشىم دەپ قابىلدامايمىن. ويتكەنى الەۋمەتتىك عىلىمدار دا قازاق قوعامىنىڭ ماسەلەلەرىن زەرتتەيدى. زەرتتەۋ تاقىرىپتارىنىڭ ىشىندە شەتەلدىك جۋرنالدار قابىلدامايتىن تاقىرىپتاردى جوققا شىعارا المايمىز. سوندىقتان اتالعان وزگەرتۋدى باسقا عىلىم سالالارىنا قاتىستى دا قوسۋ كەرەك دەپ ويلايمىن.
Scopus-قا ماقالا شىعارۋ تالابىن جۋرناليستيكادان دا الىپ تاستاسا...
زاۋرەش قويگەلديەۆا, ل.گۋميلەۆ اتىنداعى ەۇۋ-دىڭ جۋرناليستيكا جانە ساياساتتانۋ فاكۋلتەتى دوكتورانتى:
– Web of Scienسe, Scopus بازالارىنداعى عىلىمي جۋرنالداردا ماقالا جاريالاۋ تالابىن گۋمانيتارلىق باعىتتاعى ماماندىقتاردان عانا ەمەس, الەۋمەتتىك عىلىم ماماندىقتارىنان, سونىڭ ىشىندە جۋرناليستيكادان دا الىپ تاستاعانى دۇرىس. سەبەبى ءبىزدىڭ دوكتورلىق جۇمىسىمىز قازاق تىلىندە زەرتتەلەدى ءارى كوپتەگەن تاقىرىپتار قازاق قوعامىنىڭ ماسەلەلەرى. سونىمەن قاتار سكوپۋسقا ماقالا جاريالاۋ قازىرگى تاڭدا وتە قيىن بولىپ تۇر. مەن ماقالالارىمدى ەۋروپالىق جۋرنالدارعا بىرنەشە رەت تەگىن جىبەردىم. ءۇش رەت قايتىپ كەلدى. اقشا تولەپ تە جاريالاۋعا تىرىسقان ەدىم. بىراق ەكى رەت الدانىپ قالدىم. ءبىزدىڭ تاقىرىبىمىز ۇلتتىق قۇندىلىقتار توڭىرەگىندە بولعاندىقتان, ول شەتەلدىك باسىلىمداردى كوبىنە قىزىقتىرمايدى.
