Scopus
قوعام • 14 اقپان, 2023
«Scopus ءسۇرىندىرىپ تۇر»: عالىمدار كەيبىر تالاپتاردى قايتا قاراۋدى سۇرادى
بىرنەشە جىل بۇرىن Scopus دەرەكتەر بازاسىنا گۋمانيتارلىق سالالالار بويىنشا, سونىڭ ىشىندە ۇلتتىق ماسەلەلەرگە قاتىستى عىلىمي ماقالالاردى جاريالاۋدىڭ قاجەتى جوق, بۇل تالاپتى الىپ تاستاساق دەگەن ۇسىنىس ايتىلىپ, قىزۋ تالقىلانعان ەدى. جاقىندا وسى ماسەلەگە قاتىستى قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ 2023 جىلعى 9 قاڭتارداعى № 7 بۇيرىعى جارىق كوردى. (قازاقستان رەسپۋبليكاسىنىڭ ادىلەت مينيسترلىگىندە 2023 جىلعى 10 قاڭتاردا № 31654 بولىپ تىركەلگەن). وندا قازاق ءتىلى مەن ادەبيەتىنە, قازاق فيلولوگياسىنا, قازاقستان تاريحىنا, قازاق فيلوسوفياسىنا قاتىستى ءبىلىم بەرۋ باعدارلامالارى بويىنشا وقيتىن دوكتورانتتار ءۇشىن Scopus (سكوپۋس) دەرەكتەر بازاسىنداعى جۋرنالدارعا ماقالا جاريالاۋ مىندەتتى ەمەس دەلىنگەن. سول سياقتى, عالىمدار جۋرناليستيكا, ساياساتتانۋ, فيلوسوفيا سەكىلدى سالالار ءۇشىن دە اتالعان تالاپ كۇشىن جويعانى ءجون دەيدى.
