ۇبت باستالعالى شەكتى بالدى 83%-عا جۋىق تالاپكەر جيناپ, 21 مىڭنان استامى (17%-ى) شەكتى بالل جيناي المادى. ۇبت ورتاشا بالى 76 بالدى قۇرادى. ەڭ جوعارى بالل – 139.
«قاڭتار ۇبت-سى 10 قاڭتار-10 اقپان ارالىعىندا ءوتتى. جالپى قاڭتارداعى ۇلتتىق بىرىڭعاي تەستىلەۋگە 123 مىڭعا جۋىق ادام قاتىستى. تەستىلەنۋشىلەردىڭ ەڭ كوپ تاڭداعان كومبيناتسياسى - «ماتەماتيكا-فيزيكا» (19%). تاپسىرۋشىلاردىڭ 18%-ى «بيولوگيا-حيميا» كومبيناتسياسىن تاڭداسا, 10%-ى شىعارماشىلىق ەمتيحاندى تاڭداعان. IT باعىتتارعا تۇسۋگە قاجەتتى جاڭا «ماتەماتيكا-ينفورماتيكا» كومبيناتسياسىن ۇبت-عا قاتىسۋشىلاردىڭ 10%-ى تاپسىرعان», دەپ اتاپ ءوتتى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
تالاپكەرلەردىڭ, سونىڭ ىشىندە ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن ۇبت تاپسىرۋ ۋاقىتى 40 مينۋتقا ۇزارتىلعان. سونىمەن قاتار ولار ءۇشىن سىزبا جانە دياگراممالارسىز سۇراقتار جاسالدى. قابىلدانعان شارالار ارقاسىندا ەرەكشە ءبىلىم بەرۋ قاجەتتىلىكتەرى بار 274 بالا ۇبت تاپسىردى.
62 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 98 ادام شىعارىلىپ, ولاردىڭ ناتيجەلەرى جويىلدى. وزگە تۇلعالار انىقتالعان جوق.
