الايدا وسى قايعىلى وقيعادان 4 كۇن وتكەن سوڭ, انا مەن بالا ءۇيىندى استىنان امان-ەسەن تابىلعان. جۇرت تاڭعالىسقان وقيعا تۋرالى ەمرە بۋلۋتتىڭ رەپورتاجىندا 33 جاستاعى ايەل جەر استىندا وتكەن كۇندەرى تۋرالى ايتىپ بەرگەن.
- جەر سىلكىنىسى كۇشەيگەن سايىن بولمە دىرىلدەپ, قابىرعالار سەتىنەي باستادى. كۇيەۋىم باسقا بولمەدە بولاتىن. وعان بارعىم كەلگەن ەدى عيمارات قوزعالىپ كەتتى. جەر سىلكىنىسى توقتاعان كەزدە مەن تومەندەگى قاباتقا قۇلاپ تۇسكەنىمدى بىلمەدىم. ايقايلاپ ەدىم ەشكىم جاۋاپ بەرمەدى, - دەدى ول.
سودان كەيىن نەكلا بالاسى قولىندا ەكەنىن بىلەدى. ول ياعىزدىڭ ءالى دە دەم الىپ جاتقانىن بىردەن بايقايدى. ولاردىڭ جانىنا قۇلاعان شكاف ءومىرىن ساقتاپ قالعان.
- شاڭنىڭ اسەرىنەن باستاپقىدا تىنىس الۋ قيىنعا سوقتى. بىراق كوپ ۇزاماي ول باسىلدى. قوقىستاردىڭ استىندا جىلى بولدى. توڭا قويمادىق. بىراق ەركىن قوزعالۋ, قيمىلداۋ مۇمكىن بولمادى, - دەدى ايەل.
ول داۋىستاردى الىستان ەستىپ, ادامداردى كومەككە شاقىرماق بولىپ ايقايلاعان. بىراق ەشكىم كەلمەگەن. نەكلا ەشكىم كەلمەۋى مۇمكىن ەكەنىن ءتۇسىنىپ, سول ويدان قورقىپ كەتكەنىن ايتادى.
- ءسىز ەندى بالالى بولعان كەزدە كوپ نارسەنى جوسپارلايسىز, سودان كەيىن كەنەت ءبىر-اق ساتتە ءۇيىندىنىڭ استىندا قالاسىز. جەر استىنداعى ءومىر... سوعان قاراماستان ياعىزعا قاراۋىم كەرەك ەكەنىن سەزىندىم. قوزعالا الماعاندىقتان, ونى ەمىزۋ قيىن بولدى, - دەدى نەكلا. ول ەشقانداي تاماق جوق بولعاندىقتان, شاراسىزدان ءوزىنىڭ ەمشەك سۇتىمەن جۇرەك جالعاعان.
- ءسات سايىن وتباسىمدى, جاقىندارىمدى ويلادىم. ولار امان قالدى ما ەكەن دەپ ۋايىمدادىم. مەن ءوزىمنىڭ ءتىرى قالاتىنىما سەنگەن جوقپىن. بىراق قۇشاعىمداعى بالام ءۇمىتىمدى ۇزدىرمەدى. ول كوبىنە ۇيىقتاپ جاتتى. ال جىلاپ ويانعان كەزدە ەمىزىپ وتىردىم, - دەدى كەلىنشەك.
جەر استىندا 90 ساعاتتان استام ۋاقىت وتكىزگەننەن كەيىن نەكلا يتتەردىڭ ۇرگەنىن ەستيدى. ودان كەيىن ء«بارى جاقسى ما؟ ەگەر سولاي بولسا, بەلگى بەرىڭىز», دەگەن قۇتقارۋشىلاردىڭ داۋىسىن ەستىگەن. سودان ولاردى تاۋىپ, قۇتقارىپ العان.
ءبىر قىزىعى, نەكلا مەن ياعىز اۋىر فيزيكالىق جاراقات العان جوق. نەكلا مەنىڭ ءومىرىمدى ساقتاپ قالعان ياعىز دەيدى.
«مەنىڭ ويىمشا, ەگەر ۇلىم مىقتى بولماعاندا, مەن دە ءتىرى قالماس ەدىم», دەدى ول.
