«شەتەلدىك اۆتوكولىكتەردى زاڭداستىرۋدىڭ باستالعانىنا 20 كۇن ءوتتى. بۇگىنگى تاڭدا 61 مىڭ ازامات كولىكتەرىن زاڭداستىرۋعا رۇقسات الدى. 25 مىڭ كولىك يەسى ءتيىستى قۇجاتتارى مەن نومىرلەرىن الدى», دەدى قر ءىىم رەسمي وكىلى شۇعىلا تۇرلىبەك.
ونىڭ ايتۋىنشا, زاڭداستىرۋ بيىلعى جىلدىڭ 1 شىلدەسىنە دەيىن جالعاسادى.
سونداي-اق ىشكى ىستەر مينيسترلىگىنىڭ رەسمي وكىلى پوليتسيانىڭ كۇندەلىكتى قىزمەتىندە زاماناۋي تەحنولوگيالاردى كەڭىنەن قولدانۋ ىشكى ىستەر ورگاندارىنا جۇكتەلگەن نەگىزگى مىندەتتەردىڭ ءبىرى ەكەنىن اتاپ ءوتتى.
«بۇل قۇقىق بۇزۋشىلىقتىڭ الدىن الۋعا دا, قىلمىستاردى تەزىرەك اشۋعا دا مۇمكىندىك بەرەدى», دەپ اتاپ ءوتتى ول.
2022 جىلدىڭ 1 قىركۇيەگىنە دەيىن ەلگە اكەلىنگەن جانە تىركەلمەگەن اۆتوكولىكتەردى بىرجولعى زاڭداستىرۋ مەملەكەت باسشىسىنىڭ تاپسىرماسى بويىنشا جۇزەگە اسىرىلادى. 23 قاڭتاردا ەلىمىزدەگى بارلىق مامانداندىرىلعان حالىققا قىزمەت كورسەتۋ ورتالىقتارىندا زاڭداستىرۋ باستالدى.
