قازىرگى ۋاقىتتا قازاقستان تجم قۇتقارۋشىلارى ىزدەۋ-قۇتقارۋ جۇمىستارىن جالعاستىرىپ جاتىر.
گازيانتەپ قالاسىنا ءبىرىنشى ەشەلونمەن بارعان قۇتقارۋشىلار تاۋلىك بويى ەكى اۋىسىمدا جۇمىس ىستەپ جاتىر.
قۇتقارۋشىلاردىڭ ءبىرىنشى توبى توعىز قاباتتى عيماراتتا جۇمىس جۇرگىزىپ جاتىر. عيمارات تولىعىمەن قيراعان. بۇل جەردە ۇيىندىلەردىڭ استىنان 4 ادام قۇتقارىلدى, قايتىس بولعان 8 ادامنىڭ دەنەسى شىعارىلدى.
قۇتقارۋشىلاردىڭ ەكىنشى توبى التى قاباتتى عيماراتتا جۇمىس جۇرگىزىپ جاتىر. عيمارات ءىشىنارا قيراعان, اپاتتى, قيراۋ ديناميكاسى بايقالادى, تۇراقسىز قۇرىلىمدارعا بايلانىستى عيماراتتاردىڭ تولىق قيراۋ قاۋپى بار. عيماراتتىڭ 2-قاباتىنا دەيىن ينجەنەرلىك تەحنيكانى پايدالانا وتىرىپ, دەمونتاج جۇرگىزىلدى, ۇيىندىلەردىڭ اراسىنان ادامداردى ىزدەۋ جۇمىستارى جالعاسىپ وتىر. قايتىس بولعان 19 ادامنىڭ دەنەسى شىعارىلدى.
ءۇشىنشى توپ تا التى قاباتتى عيماراتقا جۇمىلدىرىلدى. عيمارات تولىعىمەن قيراعان. ۇيىندىلەردىڭ اراسىنان قايتىس بولعان 18 ادامنىڭ دەنەسى شىعارىلدى.
«قازاقستانن تجم ەكىنشى ەشەلونمەن بارعان قۇتقارۋشىلار تۇركياعا كەلگەن ساتتەن باستاپ نۋرداگى قالاسىندا ىزدەۋ-قۇتقارۋ جۇمىستارىن تاۋلىك بويى جۇرگىزىپ جاتىر. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ, ۇيىندىلەر استىندا زارداپ شەككەندەرمەن اۋديو بايلانىس ورناتۋ, قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى. قازاقستاندىق قۇتقارۋشىلاردىڭ ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ, جەدەل جانە ساۋاتتى ءىس-قيمىلدىڭ, سونداي-اق زارداپ شەككەندەردى بلوكتان شىعارۋ بويىنشا ۋاقتىلى قابىلدانعان شارالاردىڭ ناتيجەسىندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعارۋعا مۇمكىندىك تۋدى. ادامدار دەرەۋ مەديتسينالىق قىزمەتتەرىنە جەتكىزىلدى. قايتىس بولعان 4 ادامنىڭ دەنەسى شىعارىلدى. زارداپ شەككەن ادامداردى ىزدەۋگە تەحنيكالىق قۇرالدار, ال ۇيىندىلەردى بولشەكتەۋگە ينجەنەرلىك تەحنيكا پايدالاندى. ۇيىندىلەردىڭ اراسىنان ادامداردى ىزدەۋ جۇمىستارى جالعاسىپ جاتىر», دەپ جازىلعان حابارلامادا.
