تۇركيانىڭ ادىلەت مينيسترلىگى جەر سىلكىنىسىنە بايلانىستى قىلمىستاردى تەرگەۋ ءۇشىن ارنايى بولىمدەر اشتى. بۇل تۋرالى تۇركيانىڭ ۆيتسە-پرەزيدەنتى فۋات وكتاي مالىمدەدى.
ونىڭ ايتۋىنشا, عيماراتتاردى سالۋ ەرەجەلەرىن بۇزعان 131 ادام انىقتالدى. عيماراتتار تالاپقا ساي سالىنباعاندىقتان, جەر سىلكىنىسى كەزىندە قيراپ قالعان. ۆيتسە-پرەزيدەنتتىڭ ايتۋىنشا, كۇدىكتىلەردىڭ ءبىرى قاماۋعا الىنىپ, تاعى 113 ادامدى قاماۋعا الۋ تۋرالى بۇيرىق بەرىلگەن.
سوڭعى مالىمەتتەر بويىنشا, جەر سىلكىنىسى سالدارىنان قازا تاپقاندار سانى 33 مىڭنان استى. تەك تۇركيادا اپاتتان 6500 عيمارات قيراعان. وقيعا ورنىندا 32 071 ىزدەۋ-قۇتقارۋ توبى جۇمىس ىستەپ جاتىر. تۇركيا پرەزيدەنتى رەجەپ تايىپ ەردوعان بۇنداي جەر سىلكىنىسى 1939 جىلدان بەرى بولماعانىن ايتتى. ەلدىڭ ون پروۆينتسياسىندا توتەنشە جاعداي رەجيمى جاريالاندى.
