ماجارستاننىڭ شىعىسىندا ورنالاسقان, حالىق سانى بويىنشا ەل استاناسى بۋداپەشتتەن كەيىنگى قالا دەبرەتسەندەگى تۋرنيردە قازاقستان قۇراماسىنىڭ 13 بوكسشىسى شارشى الاڭعا شىعىپ, توعىزى جۇلدەگەرلەر قاتارىنان كورىندى. الەم جانە ازيا چەمپيوناتتارىنان كەيىنگى ءىرى تۋرنيرلەردىڭ ءبىرى سانالاتىن جارىستا جەرلەستەرىمىز ارالاس قۇراممەن ونەر كورسەتكەنىن ايتا كەتكەن ءجون. ولاردىڭ جارتىسىنا جۋىعى ۇلتتىق قۇرامانىڭ ەكىنشى جانە ءۇشىنشى ءنومىرلى بوكسشىلارى. سونداي-اق دەبرەتسەندەگى تۋرنيردە سەرىك تەمىرجانوۆ, ايبەك ورالباي سەكىلدى كوشباسشى جىگىتتەر دە باق سىنادى.
جارىس قورىتىندىسى بويىنشا, 51 كيلو سالماقتاعى ەل چەمپيونى, اسكەريلەر اراسىنداعى الەم بىرىنشىلىگىنىڭ كۇمىس جۇلدەگەرى دامير ابدىقادىر, بىلتىرعى ەل چەمپيوناتىنىڭ قولا جۇلدەگەرى داۋلەت مولداشەۆ (54 كگ) جانە جاستار اراسىنداعى ازيا چەمپيونى, الەم بىرىنشىلىگىنىڭ قولا جۇلدەگەرى ەرماحان جاكپەكوۆ (71 كگ) ماجارستانداعى ءتۋرنيردىڭ قولا جۇلدەگەرى اتاندى.
ال جارىستىڭ فينالىندا ونەر كورسەتكەن التى جەرلەسىمىز اقتىق باسەكەدە بارلىق قارسىلاسىن تىزە بۇكتىرىپ, دەبرەتسەندە مىقتىلىعىمەن دارالاندى. اتاپ ايتار بولساق, اسا جەڭىل سالماقتاعى ەل بىرىنشىلىگىنىڭ بىرنەشە دۇركىن جەڭىمپازى, 2021 جىلعى الەم چەمپيونى تەمىرتاس ءجۇسىپوۆ (48 كگ) فينالدا قىرعىزستان بوكسشىسى اسىلبەك امانكۋلۋلۋنان ايلاسىن اسىرسا, سەربياداعى الەمدىك دودانىڭ كۇمىس جۇلدەگەرى سەرىك تەمىرجانوۆ (57 كگ) 2022 جىلعى ەۋروپا چەمپيونى بەلگيالىق ۆاسيلە ءۋستۋرويدى تورەشىلەردىڭ ءبىراۋىز شەشىمىمەن قاپى قالدىرىپ, تۋرنير جەڭىمپازى اتاندى. سونداي-اق جاستار اراسىنداعى ازيا چەمپيونى, ەل بىرىنشىلىگىنىڭ جەڭىمپازى ءساماتالى تولتاەۆ (60 كگ) فينالدا اۋستراليالىق فرەد دززيۆامەن قولعاپ ءتۇيىستىرىپ, ايقىن باسىمدىقپەن ۇتتى. ءتىپتى جەرلەسىمىز ءبىرىنشى راۋندتا قارسىلاسىن نوكداۋنعا جىبەردى. 75 كيلوداعى اياتۋللا تاكىجانوۆ ۋكراينا وكىلى يۆان پاپكينمەن تارتىستى جەكپە-جەك وتكىزىپ, تورەشىلەردىڭ ارالاس شەشىمىمەن جەڭىس تۇعىرىنان كورىندى. ال 67 كيلوداعى دۋلات بەكباۋوۆ پەن 92 كيلوداعى ايبەك ورالباي جەكپە-جەكسىز-اق چەمپيون اتاندى. ولاردىڭ فينالداعى قارسىلاستارى رينگكە شىعۋدان باس تارتتى.
وسىلايشا, قازاقستان ۇلتتىق قۇراماسى 6 التىن, 3 قولا جۇلدەمەن جالپىكوماندالىق ەسەپتە كوش باستادى. ەنشىسىندە 10 مەدال (3 التىن, 3 كۇمىس,
4 قولا) بار ۋكراينا بوكسشىلارى ەكىنشى ورىننان كورىنسە, گەرمانيا جەتى مەدالمەن (2 التىن, 2 كۇمىس, 3 قولا) ۇزدىك ۇشتىكتى تۇيىندەدى. ال وزبەكستان (1 التىن, 2 كۇمىس, 3 قولا) مەن قىرعىزستان (1 التىن, 1 كۇمىس) بوكسشىلارى ءتورتىنشى جانە بەسىنشى ورىنعا جايعاستى.
سونىمەن قاتار ماروككوداعى «Golden Belt Series Marrakesh» («التىن بەلبەۋ») حالىقارالىق تۋرنيرىنە قاتىسقان ەلىمىزدىڭ قىزدار قۇراماسى دا جالپىكوماندالىق ەسەپتە ۇزدىك شىقتى. ماروككونىڭ مارراكەش قالاسىندا ۇيىمداستىرىلعان حالىقارالىق جارىستا الەمنىڭ 34 ەلىنەن كەلگەن ەڭ ۇزدىك بىلعارى قولعاپ شەبەرلەرى باق سىنادى. قازاقستان قۇراماسى ساپىنان 12 بۇرىمدى بوكسشى ونەر كورسەتىپ, 10 مەدال جەڭىپ الدى. ونىڭ ىشىندە بەسەۋى – التىن, ەكەۋى – كۇمىس, ۇشەۋى – قولا.
حالىقارالىق تۋرنيردە ەل قۇراماسىنىڭ ۇزدىكتەرى – الۋا بالقىبەكوۆا (48 كگ), نازىم قىزايباي (50 كگ), جاينا شەكەربەكوۆا (54 كگ), كارينا يبراگيموۆا (57 كگ) جانە ۆالەنتينا حالزوۆا (75 كگ) التىننان القا تاعىنىپ, قازاق ەلىنىڭ ءانۇرانىن شىرقاتسا, فينالدا قارسىلاستارىنا جول بەرگەن ايدا ابىكەەۆا (63 كگ) مەن ءلاززات كۇنگەيباەۆا (+ 81 كگ) كۇمىس مەدالعا يە بولدى. ال نادەجدا ريابەتس (66 كگ), ءمادينا نۇرشاەۆا (70 كگ) جانە فاريزا شولتاي (81 كگ) قولا جۇلدەگەرلەر قاتارىنان كورىندى.
وكىنىشكە قاراي, بىلتىرعى ازيا چەمپيوناتىنىڭ قولا جۇلدەگەرى جازيرا وراقباەۆا (52 كگ) مەن 2021 جىلعى سارى قۇرلىق دوداسىنىڭ ءفيناليسى ۆلاديسلاۆا كۋحتا (60 كگ) جۇلدەسىز قالدى.
جالپىكوماندالىق ەسەپتە رەسەي قۇراماسى ەكى التىنمەن ەكىنشى ورىنعا يە بولسا, ءبىر مارتەدەن جەڭىس تۇعىرىنا كوتەرىلگەن يتاليا, تايۆان, موزامبيك جانە ماروككو قۇرامالارى كەيىنگى ورىنداردى ءوزارا ءبولىستى.
