كەزدەسۋگە استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ, قالالىق بالا قۇقىقتارى جونىندەگى ۋاكىل اسيما بيمەندينا, مەملەكەتتىك ورگانداردىڭ, قوعامدىق بىرلەستىكتەردىڭ وكىلدەرى, مەكتەپ ديرەكتورلارى مەن پەداگوگتەرى, پسيحولوگتار, اتا-انالار قاتىستى.
قازىرگى ۋاقىتتا وزەكتى ماسەلەلەردىڭ ءبىرى – مەكتەپ پەن وتباسىنىڭ ءوزارا قارىم-قاتىناسى. ول مۇعالىمدەر مەن اتا-انالاردىڭ ءوزارا قارىم-قاتىناسىنا بايلانىستى.
«وتباسىنداعى تاربيە بالانىڭ ءومىر سالتىنا اسەر ەتەدى. جانۇياداعى كۇندەلىكتى قارىم-قاتىناس بالا تاربيەسىندە ءوز ءىزىن قالدىرادى. وتباسىلىق پروبلەمالار – بۇل قالامىز بەن ەلىمىزدە عانا ەمەس, بۇكىل الەمدە وزەكتى بولىپ وتىر. بالا مەن اتا-انا اراسىنداعى قارىم-قاتىناستى زەرتتەۋ قاشاندا ماڭىزدى. قازىر كوپتەگەن اتا-انا باسقارمانىڭ نەمەسە مينيسترلىكتىڭ مالىمەتتەرىنە قاراعاندا ينتەرنەتتەگى دەرەككوزدەرگە, جاتتىقتىرۋشىلارعا, Telegram ارنالارىنا كوبىرەك سەنەدى. مەكتەپ پسيحولوگتارىنىڭ ۋاقىتى بارىنە بىردەي جەتپەيتىنىن اتاپ وتكىم كەلەدى. سەبەبى ولار وقۋشىلارمەن عانا ەمەس, اتا-انالارمەن دە, مۇعالىمدەرمەن دە جۇمىس ىستەيدى. مەكتەپتە پسيحولوگ ماماندارىنىڭ سانىن ارتتىرۋ ماسەلەسىن قايتا قاراۋ ماڭىزدى. ويتكەنى ولاردىڭ جۇمىسى بۇرىنعىدان دا ماڭىزدى», دەدى باسقارما باسشىسى.
ءوز كەزەگىندە اسيما بيمەندينا اتا-انالارعا بالا تاربيەسى ءبىرىنشى ورىندا تۇرۋى كەرەك ەكەنىن اتاپ ءوتتى.
«بۇگىنگى ءىس-شارا وسكەلەڭ ۇرپاقتى تاربيەلەۋدىڭ وزەكتى ماسەلەلەرىن تالقىلاۋعا باعىتتالعان. 2022 جىلدىڭ جەلتوقسانىندا ەلوردانىڭ 40 مەكتەبىندە اتا-انالار اراسىندا ساۋالناما جۇرگىزدىك. وندا 3 سۇراق قويدىق: بالا تاربيەسىندەگى قيىندىقتار جانە ولاردى قالاي جەڭۋگە بولادى, سونداي-اق قانداي كومەك كورسەتە الامىز. 21 مىڭ تۇرعىن وسى ءۇش ساۋالعا جاۋاپ بەردى. ەگەر اتا-انا بۇل ماسەلەدە ساۋاتتى بولسا, وندا تاربيەلى جانە دەنى ساۋ بالا كوپ بولادى», دەپ اتاپ ءوتتى ەلوردانىڭ بالا قۇقىقتارى جونىندەگى ۋاكىل.
وتىرىس بارىسىندا پسيحولوگتار, وتباسىلىق تاربيە ورتالىعىنىڭ, قوعامدىق قورلاردىڭ وكىلدەرى ءسوز سويلەدى.
دوڭگەلەك ۇستەلگە قاتىسۋشىلاردىڭ ايتۋىنشا, وتباسى مەن مەكتەپتىڭ ءوزارا قارىم-قاتىناسى پەداگوگتەر مەن اتا-انالاردى وقۋ-تاربيە پروتسەسىنە, ساباقتان تىس بوس ۋاقىتىن پايدالى وتكىزۋگە, بالالار مەن ۇستازدار اراسىنداعى ىنتىماقتاستىققا باعىتتالعان. كەز-كەلگەن جۇمىس ساراپتاۋدان باستالادى. بۇل وقۋشىلاردىڭ ءبىلىم دەڭگەيىن انىقتاۋعا, اتا-انالارمەن ءوزارا بايلانىس ورناتۋعا كومەكتەسەدى.
