سپورتتى دامىتۋ ديرەكتسياسىنىڭ ديرەكتورى ورالباي جاقسىمبەتوۆ بىرەر كۇن بۇرىن ساداق اتۋدان ۇلتتىق قۇراما وكىلدەرىن قابىلداپ, پاريج وليمپياداسىنا دايىندىعىن پىسىقتادى. القالى جيىنعا قۇرامانىڭ باس جاتتىقتىرۋشىسى ارتيوم كيچكين, فەدەراتسيانىڭ باس حاتشىسى اينۇر تىرتىقاەۆا, سونىمەن قاتار كورەيادان كەلگەن جاتتىقتىرۋشى-كەڭەسشى كيم دجەچەن جانە وزگە دە قىزمەتكەرلەر قاتىستى.
جيىن بارىسىندا سپورتتىڭ وسى ءتۇرىن دامىتۋ ماسەلەلەرى, ونىڭ پروبلەمالارى مەن شەشۋ جولدارى تالقىلاندى. ماسەلەن, ۇلتتىق قۇرامانىڭ جاتتىقتىرۋشى-كەڭەسشىسى كيم دجەچەننىڭ ايتۋىنشا, ەلىمىزدەگى ساداق اتۋ سپورتىنىڭ بولاشاعى زور. كوماندانىڭ تاجىريبەسى, رەزەرۆى بار. تەك سپورت بازالارىنىڭ جەتكىلىكسىزدىگى عانا بۇدان دا قارقىندى دامۋعا كەرى اسەر ەتىپ وتىر.
«قازىر ەڭ باستى ماقسات – وليمپيا ويىندارىنا ليتسەنزيا الۋ. سوندىقتان قىتايداعى ازيا ويىندارىندا جانە باسقا دا ليتسەنزيالىق تۋرنيرلەردە لايىقتى ونەر كورسەتۋ ءۇشىن بارلىق كۇش-جىگەردى جۇمساۋ قاجەت. حانچجوۋ ويىندارىندا قويىلاتىن جوسپار – كۇمىس جانە قولا مەدال يەلەنۋ. بۇل مىندەت ۇدەسىنەن شىعۋ كەرەك. كيم مىرزا سەمينارلار وتكىزىپ, كوماندا ءبىر جۇيەمەن جانە كۇنتىزبەلىك جوسپار بويىنشا جۇمىس ىستەگەنى دۇرىس. ءبىزدىڭ جاتتىقتىرۋشىلار وسىنداي كەرەمەت مۇمكىندىكتى پايدالانىپ, ارنايى شاقىرىلعان كەڭەسشىمەن تىعىز جۇمىس ىستەپ, تاجىريبە الۋى كەرەك», دەدى ورالباي ەرگەن ۇلى.
قازىرگى تاڭدا ۇلتتىق قۇراما شتاتىندا 24 سپورتشى بار. الدا وتاندىق ساداقشىلاردى الەم كۋبوگى, ازيا جانە الەم چەمپيوناتتارى, حانچجوۋداعى جازعى ازيا ويىندارى كۇتىپ تۇر. ۇلتتىق قۇراماعا جاتتىقتىرۋشى-كەڭەسشى بولىپ تاعايىندالعان كيم دجەچەن – ساداق اتۋ سپورتىنان الەمدەگى ەڭ ۇزدىك مەملەكەتتەردىڭ ءبىرى سانالاتىن كورەيا وكىلى. كيم بۇعان دەيىن ءوز ەلىندە پاراليمپيادا قۇراماسىن جاتتىقتىرعان. 2008 جىلعى بەيجىڭ پاراليمپياداسىندا ونىڭ شاكىرتتەرى 2 التىن جانە 1 كۇمىس مەدال يەلەنگەن. سونداي-اق كولۋمبيا ۇلتتىق قۇراماسىن دا جاتتىقتىرعان.
حالىقارالىق وليمپيادا كوميتەتىنىڭ اتقارۋشى كوميتەتى بەكىتكەن قۇجاتقا سايكەس, 2024 جىلعى پاريج وليمپياداسىندا مەرگەندەر بەس جۇلدە جيىنتىعىن ساراپقا سالادى. ساداق اتۋدان ەرلەر مەن ايەلدەر اراسىندا جەكەلەي سىن, ەرلەر مەن ايەلدەر اراسىندا كوماندالىق سىن جانە ارالاس كوماندالىق جارىستان جەڭىمپازدار مەن جۇلدەگەرلەر انىقتالادى. توكيوداعى دودادا العاش رەت ارالاس كوماندالىق سىندا مەدال ۇلەستىرىلگەن بولاتىن. ال ساداق اتۋدان كوماندالىق جارىس وليمپيا ويىندارىنىڭ باعدارلاماسىنا 1988 جىلى ەنگەن.
سونداي-اق سپورتشىلارعا بولىنەتىن كۆوتا دا وزگەرىسسىز قالدى. گەندەرلىك تەڭدىك ساقتالىپ, ەرلەردەن 64, ايەلدەردەن 64 سپورتشى باق سىنايدى.
