باعدارلاماداعى جاڭا وزگەرىستەرگە سايكەس, بۇدان بىلاي تۋروپەراتورلاردىڭ وتىنىمدەرى Kazakh Tourism-گە تۇسكەن كۇننەن باستاپ 7 جۇمىس كۇنى ىشىندە ماقۇلدانادى. بۇعان دەيىن وتىنىشتەر 10 جۇمىس كۇنىنىڭ ىشىندە قاراستىرىلاتىن ەدى. سونداي-اق تولەم مەرزىمى 45 كۇننەن 25 كۇنگە دەيىن قىسقارتىلىپ, ەندى Kazakh Tourism ۇلتتىق كومپانياسى سۋبسيديا سوماسىن تىكەلەي تۋروپەراتورلاردىڭ ەسەپشوتىنا اۋدارۋدى جۇزەگە اسىرادى.
«جاڭا ەرەجەگە ساي, وتىنىمدەردى قاراۋ مەرزىمى 7 جۇمىس كۇنى دەپ بەلگىلەنگەنىمەن, Kazakh Tourism ولاردى بارىنشا قىسقا مەرزىمدە ماقۇلداۋعا تىرىسادى. 2022 جىلدىڭ قورىتىندىسى بويىنشا سۋبسيديالاردى قاراۋدىڭ جانە تولەۋدىڭ ناقتى مەرزىمى ورتا ەسەپپەن 10 جۇمىس كۇنىن قۇرادى. سۋبسيديالار 4 جۇمىس كۇنى ىشىندە تولەنگەن جاعدايلار دا بولعان», دەلىنگەن رەسمي حابارلامادا.
ەرەجەگە ەنگىزىلگەن بۇدان باسقا وزگەرىستەرگە سايكەس, بالالار اۋەبيلەتىن ساتىپ الۋدى راستاۋ تىزبەسى كەڭەيتىلدى. ەگەر بۇرىن وتىنىمگە اۋەبيلەتتىڭ كوشىرمەسىن قوسا بەرۋ قاجەت بولسا, قازىر اۋەكومپانيادان بيلەتتى پايدالانۋ تۋرالى مارشرۋتتىق تۇبىرتەكتى نەمەسە راستاۋ انىقتاماسىن قوسا بەرۋگە بولادى.
2022 جىلدىڭ قورىتىندىسى بويىنشا, Kids go free باعدارلاماسى اياسىندا تۋروپەراتورلارعا 700-گە جۋىق ءوتىنىم ءتۇسىپ, بالالار اۋەبيلەتى ءۇشىن مەملەكەتتىك قازىنادان 76 ملن تەڭگە كولەمىندە سۋبسيديا بولىنگەن. تۋر اياسىندا ەل بويىنشا 1,5 مىڭعا جۋىق بالا تەگىن ۇشقان. ازىرگە ەڭ تانىمال باعىت اقتاۋ قالاسى بولىپ تۇر. ءبىر جىلدىڭ ىشىندە مۇنايلى مەكەنگە 350-دەن اسا تۋرپاكەت ساتىلعان.
تەگىن اۋە بيلەتتەرى ازىرگە تۋريستىك سالانى دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىندا ايقىندالعان باسىم تۋريستىك ايماقتاردىڭ (بتا) ۇزدىك 10 باعىتى بويىنشا عانا قولجەتىمدى. ولارعا مىنا ايماقتار كىرەدى: الاكول كولى, الماتى ءوڭىرىنىڭ تاۋ كلاستەرى, ششۋچە-بۋراباي, باياناۋىل يمانتاۋ-شالقار كۋرورتتى ايماقتارى, بالقاش كولى, تۇركىستان وبلىسى, ماڭعىستاۋ جاعاجاي دەمالىس ايماقتارى, استانا قالاسىندا MICE-ءتۋريزمدى دامىتۋ كورپوراتيۆتىك ءىس-شارالاردى ۇيىمداستىرۋ جانە وتكىزۋگە بايلانىستى ىسكەرلىك تۋريزم جانە بايقوڭىر عارىش ايلاعى.
تەگىن بيلەتتەر مەن بالالار سانىنا شەكتەۋ جوق. دەگەنمەن ساپارعا شىعۋ الدىندا مىناداي بىرنەشە جايتتى ەسكەرگەن ءجون. ماسەلەن Kids go free قوسىلعان تۋريستىك ءونىمدى ساتىپ الا وتىرىپ, بالالار تۋريستىك ورىنداردىڭ اۋماعىندا كەمىندە بەس كۇن جانە ءتورت ءتۇن تۇرۋعا مىندەتتى. ەگەر ءسىز بىردەن بىرنەشە جەرگە بارۋدى جوسپارلاساڭىز, وندا كەم دەگەندە ەكى كۇن جانە ءبىر ءتۇن سول ورىندا بولۋىڭىز كەرەك. تۇرۋ ۋاقىتىنىڭ جالپى سانى بەس كۇننەن جانە ءتورت تۇننەن كەم بولماۋى قاجەت. بۇل جاعدايدا بالالارعا ارنالعان تەگىن اۋە بيلەتتەرى ءبىرىنشى لوكاتسياداعى اۋەجايعا دەيىن جانە سوڭعى لوكاتسياداعى اۋەجايدان ۇسىنىلادى. ياعني ءسىز ءبىر ەمەس بىرنەشە رەت ۇشۋدى كوزدەسەڭىز, ەڭ العاشقى جانە سوڭعى رەيستىڭ بيلەتى عانا تەگىن بولادى. ەكى مەكەنجايدىڭ اراسىنداعى بيلەتتەر مەن كولىك شىعىندارىن ءوز قالتاڭىزدان تولەيسىز. سوندىقتان ءار جەردە كەمىندە بەس كۇن جانە ءتورت ءتۇن تۇرۋ ارقىلى تۋريستىك قىزمەتتەردى ساتىپ العان ءتيىمدى. وسى شارتتار بويىنشا بالالارعا ارنالعان تەگىن بيلەتتەر بارلىق جەردەگى اۋەجاي اراسىندا ۇسىنىلادى.
Kazakh Tourism ۇلتتىق كومپانيا وكىلدەرىنىڭ ايتۋىنشا, مۇنداي باعدارلامانىڭ مەملەكەت دەڭگەيىندە قولدانىلۋى – الەمدىك تاجىريبەدە بولماعان جاعداي. زاڭ كۇشىنە ەنگەن باعدارلاما مەرزىمسىز ۋاقىتقا قابىلدانعان. وسى جىلعا بيۋدجەتتە باعدارلامامەن كەم دەگەندە 20 مىڭ بالانى قامتۋ كوزدەلسە, سۇرانىس ارتقان جاعدايدا, قوسالقى قاراجات تارتىلاتىنى ەسكەرىلگەن. ەكى جىل بويى پاندەميادان زارداپ شەككەن تۋريزم سالاسىنا ەندىگى كەزدە جاڭادان دەم بەرىلدى دەسە بولادى. Kids go free ارقىلى ەل ىشىندە ساياحاتتايمىن دەيتىن جانۇياعا 30%-عا دەيىن ۇنەمدەۋ مۇمكىن بولىپ وتىر.
