وقيعا • 08 اقپان، 2023

تۇركيادا تاعى ەكى وتانداسىمىز جوعالىپ كەتتى

تۇركيادا ورىن العان جەر سىلكىنىستەرىنەن كەيىن تاعى ەكى قازاقستان ازاماتى ءىس-ءتۇسسىز جوعالىپ كەتتى. ولار بۇدان بۇرىن جوعالعان Astana Hub تەحنوپاركىنىڭ حالىقارالىق اگەنتى ميرۋس قۇرماشەۆتىڭ ارىپتەستەرى ەدى، دەپ حابارلايدى Egemen.kz.

ايانا توعانبەك

«ميرۋسپەن بىرگە ونىڭ ءۇش ارىپتەسى دە حابارسىز كەتتى. ولار ءادىل قادىربەكوۆ، سابينا مامادياروۆا، جانە تۇركيا ازاماتى قۇبىلاي كەسكين»، دەپ جازدى Astana Hub باس ديرەكتورى ماعجان ماديەۆ Instagram پاراقشاسىندا.

قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ حابارلاعانداي، ولار ىزدەستىرىلىپ جاتىر.

سونىمەن قاتار ماعجان ماديەۆ ىزدەۋ جۇمىستارىنا جەكە قاتىسۋ ءۇشىن حاتاي قالاسىنا اتتانعان. Astana Hub باسشىسىنىڭ ايتۋىنشا، ولاردىڭ قايدا ەكەنى تۋرالى ءبىر-ەكى انىقتاما بار.

ميرۋس قۇرماشەۆ جەر سىلكىنىسى كەزىندە تۇركيانىڭ حاتاي قالاسىندا بولعان. جەر سىلكىنىسىنەن كەيىن ونىمەن بايلانىس ۇزىلگەن. تۇركياداعى ىزدەۋگە قوسىلا الاتىن كەز كەلگەن ادام ميرۋستىڭ اعاسى الماتقا +7 702 430 20 21 تەلەفونى ارقىلى حابارلاسا الادى.

بۇعان دەيىن پرەزيدەنت قاسىم-جومارت توقاەۆ ۇكىمەتكە تۇركيا رەسپۋبليكاسىنا ەلدىڭ وڭتۇستىك-شىعىسىندا بولعان جويقىن جەر سىلكىنىسىنىڭ سالدارىن جويۋعا شۇعىل كومەك كورسەتۋدى تاپسىرعان ەدى.

سەيسەنبى كۇنى تۇركياعا 41 ادامنان تۇراتىن توپ اتتاندى، رەسپۋبليكالىق جەدەل-قۇتقارۋ جاساعىنىڭ قۇتقارۋشىلارىنان بولەك اپاتتار مەديتسيناسى ورتالىعىنىڭ قىزمەتكەرلەرى دە باردى. ولاردى گازيانتەپتە قازاقستاننىڭ تۇركياداعى ەلشىلىگىنىڭ وكىلدەرى قارسى الدى. قر توتەنشە جاعدايلار مينيسترلىگىنىڭ قىزمەتكەرلەرى كەلگەن بويدا تەحنيكا مەن قۇرال-جابدىقتاردى ءتۇسىرىپ العان. قازاقستاننىڭ دەنساۋلىق ساقتاۋ مينيسترلىگى تۇركيانىڭ زارداپ شەككەن ايماقتارىنا 125 دارىگەردەن تۇراتىن جاساق جىبەرۋگە دايىن ەكەنىن ءبىلدىردى.

سونىمەن قاتار تۇركيا پرەزيدەنتى رەجەپ تايىپ ەردوعان ۇلتتىق ازا تۇتۋ كۇنىن جاريالادى.