«Grand Slam» جارىستارى ەلىمىزدە وتەدى

ەكىجاقتى كەلىسىمشارتقا ساي­كەس، قازاقستان الەمدىك «Grand Slam» جارىستارىن 2023-2026 جىل­دار ارالىعىندا قابىلدايدى. اي­تۋلى دودا استانا جانە الماتى قا­لالارىندا «Qazaqstan barysy Grand Slam» اتاۋىمەن وتكىزىلەدى دەپ جوسپارلانعان. سونداي-اق الەم­­­دىك تۋرنير اياقتالعاننان كەيىن ەلى­مىزدە جىل سايىن تۇراقتى تۇر­دە حالىقارالىق وقۋ-جاتتىعۋ لاگەر­لەرى ۇيىمداستىرىلادى.

ءىس-شارا كەزىندە حالىقارالىق دزيۋدو فەدەراتسياسىنىڭ (IJF) پرە­زيدەنتى ماريۋس ۆيزەر IJF ءۇشىن ءتۋر­نيردى وتكىزۋ قۇقىعىن الەمدىك جا­رىستاردا جىل سايىن توپ جارىپ، ۇزدىك ناتيجە كورسەتىپ جۇرگەن قازاقستان سياقتى مەملەكەتكە بەرۋ ۇلكەن مارتەبە ەكەنىن جەتكىزدى.

«كەيىنگى بىرنەشە جىلدا قازاق­ستاندا دزيۋدو سپورتى وتە قار­قىندى دامىپ كەلەدى. ونى قازاق­ستاندىقتاردىڭ «ۇلكەن دۋلىعا»، گران-پري، الەم جانە وليمپيا ويىندارىندا كورسەتىپ جۇرگەن ناتيجەلەرىنەن-اق انىق اڭعارۋعا بولادى. سونداي-اق سىزدەردىڭ ەلدە­رىڭىزدە ارقاشان IJF پەن ازيا اي­ماعىنداعى كوپتەگەن سپورتتىق جا­رىس تۇراقتى تۇردە وتكىزىلىپ كەلەدى. الەمنىڭ توعىزىنشى تەرريتورياسىندا «Grand Slam» تۋر­نيرلەرىن وتكىزۋ دزيۋدونى دا­مى­تۋعا دا، ونى تانىمال ەتۋگە دە جاڭا سەرپىن بەرەتىنىنە سە­نىمدىمىن. قا­زاقستان دزيۋدو فەدەراتسياسىنا جەمىستى بولاشاق تىلەي­مىن»، دەدى حالىقارالىق دزيۋدو فەدەرا­تسيا­سىنىڭ پرەزيدەنتى ما­ريۋس ۆيزەر.

قازاقستان دزيۋدو فەدەرا­تسيا­سىنىڭ پرەزيدەنتى قۋانىشبەك ەسەكەەۆ ەلىمىزدىڭ 2023 جىلدان 2026 جىلعا دەيىن «Grand Slam» جارىستارىن وتكىزۋ قۇقىعىن الۋى دزيۋدو فەدەراتسياسىنىڭ وراسان زور جەتىستىگى جانە حالىقارالىق تۋرنيرلەردە قازاقستان تۋىن اس­قاق­­تاتىپ، لايىقتى ونەر كورسە­تەتىن بارلىق سپورتشىنىڭ ورتاق جەڭىسى ەكەنىن اتاپ ءوتتى.

«ماريۋس ۆيزەر مىرزاعا بىزگە سەنىم ارتقانى ءۇشىن العىس بىل­دىرەمىز. «Grand Slam»-دەگى ال­عاشقى قادام ءبىزدى دزيۋدو وتباسىنا ودان ءارى جاقىنداتا تۇسەدى دەگەن سەنىمدەمىز. جەر-جاھاننىڭ ەڭ ۇزدىك دزيۋدوشىلارى باس قوساتىن الەمدىك جارىستا سپورتشىلار قازاقستاندى جاقسى تانىپ-ءبىلۋ ءۇشىن ءتۋرنيردى جىلدىڭ قولايلى ۋاقىتىندا وتكىزەمىز. ءبىز ءوز تارا­پىمىزدان جارىستى جوعارى دەڭ­گەيدە ۇيىمداستىرۋعا بار كۇش-جى­گەرىمىزدى سالامىز. ەكى فە­دە­­راتسيا اراسىنداعى بۇل ىنتى­ماق­تاستىق ۇلتتىق جانە حا­لىق­ارالىق دەڭگەيدە ودان ءارى وسۋگە كومەك­تەسەدى»، دەدى قۋانىشبەك ەسە­كەەۆ.

ايتا كەتەيىك، «Grand Slam» («ۇلكەن دۋلىعا») – حالىقارالىق جارىس كۇنتىزبەسىنە سايكەس «IJF World Tour» اياسىندا وتكىزىلەتىن الەمدىك جارىستار سەرياسى سانا­تىنا ەنەدى. IJF ەرەجەسى بويىن­شا، جارىس جەڭىمپازى مەن جۇلدە­گەر­­لەرىنە الەم جانە وليمپيادا رەي­­تينگتەرىنە ۇپاي قوسىلادى. اتاپ ايتقاندا، 1-ورىنعا – 1000، 2-ورىنعا – 700، ال 3-ورىنعا 500 ۇپاي­دان بەرىلەدى.

بيىلدان باستاپ ەلىمىزدە ۇيىم­­­داستىرىلاتىن «Qazaqstan barysy Grand Slam» جارىسىندا دزيۋدوشىلار 2024 جىلى پاريجدە الاۋى تۇتاناتىن جانە 2028 جىلى لوس-اند­جەلەستە وتەتىن جازعى وليم­پيا ويىندارىنا ۇپاي جينايدى.

ايتا كەتۋ كەرەك، پاريجدەگى «Grand Slam» جارىسىندا قازاق­ستان دزيۋدوشىلارى ەكى مەدال جە­ڭىپ الدى. پورتۋگالياداعى گران-پريدە توپ جارعان اسا جەڭىل سال­ماقتاعى (48 كگ) ءابيبا ابۋ­جاقىنوۆا بۇل جولى قولا جۇل­دەنى قاناعات تۇتتى. ۇلتتىق قۇراما كوش­­باسشىسى ىرىكتەۋ سايى­سىن­دا جارىس قوجايىنى مە­لاني ۆيەۋدى ۇتقانىمەن، كەيىنگى كە­­زەڭ­دە يسپانيالىق لاپۋەرتا كو­ماس ميرەيادان جەڭىلىپ قال­دى. ال جۇ­بانىش بەلدەسۋىندە جاپو­نيالىق رينا تاتسۋكاۆانى تازا ادىسپەن جەڭىپ، قولا جۇلدە ءۇشىن وتكەن بەلدەسۋدە كورەيالىق لي حيو­كيوننەن باسىم ءتۇستى.

سونىمەن قاتار ەرلەر ارا­سىن­­داعى 73 كگ سالماقتا بەل­­­دەس­­­كەن جەرلەسىمىز دانيار شام­­­­شاەۆ تا پاريجدەگى دودادا ءۇشىن­شى ورىنعا تابان تىرەدى. وتان­­دا­سى­مىز «ا» توبىنداعى ال­عاش­­قى بەل­دەسۋلەرىندە برازي­ليا­­لىق مايكل مارسەلينو مەن فران­تسيا­لىق دانيل زۋبكونى جەڭ­­گەنى­مەن، كەيىنگى اينالىمدا وليم­پيا­­دانىڭ بارلىق مەدالىنە قول جەت­كىزگەن گرۋزيالىق لاشا شاۆ­داتۋاشۆيليگە ەسە جىبەردى. ال جۇ­بانىش كەزدەسۋىندە تاعى ءبىر تا­تامي يەسى دجوان-بەندجامين گا­­­بانىڭ وسال تۇسىن تاپسا، شە­شۋ­­شى بەلدەسۋدە كانادالىق ارتۋر مار­­­گە­ليدوننان ايلاسىن اسىرىپ، ەل قور­­­جىنىنا ەكىنشى قولا جۇل­دەنى سالدى.

پاريجدەگى جىلدىڭ العاشقى «Grand Slam» جارىسىندا الەمنىڭ 82 ەلىنەن كەلگەن 520 سپورتشى باق سىنادى.